Galaxy S26 Series នឹងបង្ហាញចេញនៅខែកុម្ភៈ នេះបើតាមការបញ្ជាក់ជាថ្មីនៅថ្ងៃនេះ!

យោងតាមរបាយការណ៌ថ្មីៗមួយដែលចេញផ្សាយដោយសារព័ត៌មានរបស់ប្រទេសកូរ៉េខាងត្បូង កាលពីសប្តាហ៌មុននេះ បាននិយាយថា ក្រុមហ៊ុន Samsung នឹងមានការប្រកាសចេញនូវស្មាតហ្វូនជំនាន់ថ្មីរបស់ខ្លួនម៉ូដែល Galaxy S26 series នៅថ្ងៃទី 25 ខែកុម្ភៈខាងមុខនេះហើយ ដោយព្រឹត្តិការណ៌នេះ គឺនឹងប្រារព្ធធ្វើឡើងនៅទីក្រុង San Francisco សហរដ្ឋអាមេរិក។ កាលបរិច្ឆេតដូចគ្នាខាងលើនេះ ក៏ត្រូវបានបញ្ជាក់ជាថ្មីនៅថ្ងៃនេះ ដោយអ្នកទម្លាយ Evan Blass (evleaks) ផងដែរ។ នៅក្នុងនោះអ្នកទម្លាយរូបនេះ ថែមទាំងបញ្ជាក់ទៀតថា Galaxy S26 series នឹងបង្ហាញខ្លួននៅតាមហាងនានានាដើមខែមីនាទៀតផង។

ផ្អែកតាមការលើកឡើងខាងលើនេះ បានបញ្ជាក់ថា ស្មាតហ្វូនជំនាន់ថ្មី Galaxy S26 នឹងមានការបង្ហាញវត្តមានយឺតយ៉ាវជាងស្មាតហ្វូន Galaxy S25 ដែលប្រកាសចេញនៅលើទីផ្សារនៅថ្ងៃទី 22 ខែមករាឆ្នាំ 2025 ។ យោងតាមការរំពឹងទុកសម្រាប់ការប្រកាសចេញនៅខែកុម្ភៈនេះ គឺដោយសារតែក្រុមហ៊ុន Samsung បានប្រកាសលុបចោលនូវម៉ូដែល Galaxy S26 Edge ដោយជំនួសមកវិញនៅម៉ូដែល Galaxy S26+។

ជាមួយនិងវត្តមានរបស់ស្មាតហ្វូនជំនាន់ថ្មី Galaxy S26, S26+ និង S26 Ultra ត្រូវបានគេរំពឹងថា នឹងមានតម្លៃខ្ពស់ជាងម៉ូដែលមុនសម្រាប់ទីផ្សារមួយចំនួន។ យោងតាមរបាយការណ៌ថ្មីៗនេះ បានបង្ហើបថា Galaxy S26 អាចនឹងមានតម្លៃខ្ពស់ជាង KRW 44,000 ($30) ទៅ KRW 88,000 ($60) ប្រៀបធៀបជាមួយនិង Galaxy S25។ ប៉ុន្តែសម្រាប់ទីផ្សារអាមេរិក អាចនឹងមិនមានការតម្លើងតម្លៃនោះទេ សម្រាប់ស្មាតហ្វូន Galaxy S26 Series។