Zeekr 8X PHEV ដែលត្រៀមចេញនៅឆមាសដំបូងក្នុងឆ្នាំនេះ គឺប្រើម៉ាស៊ីន 2.0T កម្លាំង 275 សេះ និងកញ្ចប់ថ្មទំហំ 70kWh

Zeekr ដែលជាម៉ាកនៃរថយន្តប្រណិតភាពរបស់ក្រុមហ៊ុន Geely Automotive Holding បានត្រៀមខ្លួនរួចរាល់ក្នុងការប្រកាសចេញលក់រថយន្ត Plug-in-hybrid SUV ស៊េរីថ្មីម៉ូដែល Zeekr 8X នៅក្នុងត្រីមាសដំបូងនៃឆ្នាំ 2026 នេះ។ ដោយនៅពេលនេះ Zeekr 8X PHEV SUV ត្រូវបានធ្វើការចុះបញ្ចីជាផ្លូវការណ៍ដោយស្ថាប័ន MIIT ក្នុងប្រទេសចិនរួចរាល់ហើយ។ បើតាមការចុះបញ្ចីនេះ ក៏មានការបង្ហាញពីលក្ខណៈសម្បត្តិផ្លូវការណ៍មួយចំនួនរបស់ 8X ផងដែរ។

យោងទៅលើការចុះបញ្ចីរបស់ MIIT បានបង្ហាញឲ្យដឹងថា Zeekr 8X Plug-in-hybrid SUV គឺបំពាក់នូវម៉ាស៊ីន 2.0T កម្លាំង 275 សេះ និងកញ្ចប់ថ្ម ternary llithium battery ទំហំធំដល់ 70kWh។ Zeekr 8X PHEV SUV ថ្មីនេះ នឹងមានមកជាមួយជម្រើសម៉ូដែល 5-កៅអី និង 6-កៅអី។ Zeekr 8X គឺជាម៉ូដែលប្អូនស្ថិតនៅក្រោមម៉ូដែល Zeekr 9X បច្ចុប្បន្នបន្តិច។

ឡាន Plug-in-hybrid SUV ថ្មីនេះ គឺស្ថិតក្នុងក្រុម mid-to-large size SUV ដែលមានប្រវែងតួរខ្លួន 5,100mm/ទទឹង 1,998mm/ កម្ពស់ 1,780mm និងគម្លាតចន្លោះកង់មុខទៅកង់ក្រោយ 3,069mm។ Zeekr 8X PHEV នឹងមានជម្រើសទំងន់សរុបចំនួន 6 ផ្សេងគ្នា គឺ 2,660kg, 2,690kg, 2,730kg, 2,760kg, 2,790kg, និង 2,820kg ជាមួយសមត្ថភាពអាចអូសសណ្តោងបន្ទុកទំងន់ខាងក្រោយបាន 2,000kg។

ទៅលើការឌីស្សាញរូបរាងខាងក្រៅរបស់ Zeekr 8X ថ្មីនេះ គឺមិនខុសគ្នាពីម៉ូដែល Zeekr 9X នោះទេ ដោយផ្នែកខាងមុខត្រូវបានឌីស្សាញជាមួយនឹងផ្ទាំងប៉ាណាបែបទឹកធ្លាក់ ឬ Waterfall-style grill ជាមួយចង្កៀងខាងមុខប្រភេទ Split headlight និងនៅលើដំបូលខាងមុខមានបំពាក់នូវសែនស័រ LiDAR ជាដើម។ នៅផ្នែកខាងក្រោយត្រូវបានឌីស្សាញជាមួយចង្កៀងរាងជាបន្ទាត់ពីរជាន់ដោយខាងលើឌីស្សាញអូសកាត់ពីចំហៀងម្ខាងទៅម្ខាងទៀត។ Zeekr 8X PHEV SUV ថ្មី ក៏នឹងមានជម្រើសទំហំយ៉ាន់កង់ និងសម្បកកង់បីខ្នាត គឺ 255/55 R20, 255/50 R21, និង 275/40 R22 ជាមួយជម្រើស 6 ម៉ូដែលផ្សេងគ្នា និងប្រើប្រាស់ឃ្នាប់ស្បែកហ្រ្វាំងពណ៌ក្រហម red brake calliper ថែមទៀតផង។

តាមប្រភពព័ត៌មានមួយចំនួនបានបញ្ជាក់ថា Zeekr X8 Plug-in-hybrid SUV បំពាក់ម៉ាស៊ីន 2.0T ស៊េរី DHE20-PFZ កម្លាំង 275 សេះ ដែលអភិវឌ្ឍន៍ដោយ Aurobay Technologies និងប្រើកញ្ចប់ថ្ម ternary lithium ដែលផ្គត់ផ្គង់ដោយ CATL-Geely មានទំហំ 55.1kWh និង 70kWh តាមស្តង់ដារ WLTC ការសាកភ្លើងពេញម្តងអាចបើកដោយប្រើអគ្គិសនីសុទ្ធបានចម្ងាយ 256km និង 328km តាមទំហំកញ្ចប់ថ្ម។

សម្រាប់ម៉ូដែល High-trim level របស់ Zeekr 8X នឹងមានបំពាក់ដោយប្រព័ន្ធម៉ូទ័រអគ្គិសនីចំនួន 3 មានផលិតកម្លាំងសរុបបានដល់ 1,030kW ឬខ្ទង់ 1,381 សេះ, គាំទ្របច្ចេកវិទ្យាសាកភ្លើងល្បឿនលឿនកម្រិត 6C Fast Charging និងប្រើប្រព័ន្ធជើងក្រោមឆ្លាតវៃ Haohan AI Digital Chassis ដូចគ្នានឹង Zeekr 9X ផងដែរ៕