Apple ទទួលបានប៉ាតង់ថ្មីមួយដែលមានសមត្ថភាពអាចជួយអ្នកបើកបរអោយនៅតែមើលឃើញផ្លូវបានល្អនៅទោះស្ថិតក្នុងអាកាសធាតុអាក្រក់

កាលពីដើមសប្តាហ៍កន្លងទៅនេះ ក្រុមហ៊ុន Apple បានប្រកាសថា ខ្លួនទទួលបាននូវប៉ាតង់ថ្មីមួយដែលពាក់ព័ន្ធទៅនឹងគម្រោង Project Titan។ នៅក្នុងប៉ាតង់ថ្មីនេះ គឺគឺជាបច្ចេកវិទ្យាថ្មីដែលមានការពាក់ព័ន្ធទៅនឹងការជួយអ្នកបើកបរអោយនៅតែមើលឃើញនៅក្នុងពេលដែលជួបជាមួយនឹងស្ថានភាពដែលពិបាកៗ។ យោងតាមការបញ្ជាក់នៅក្នុងរបាយការណ៍របស់ PatentlyApple នេះ បានអោយដឹងថា ថ្មីៗនេះ ក្រុមហ៊ុនបច្ចេកវិទ្យាយក្ស Apple បានទទួលបាននូវប៉ាតង់ដោយការិយាល័យប៉ាតង់ និងម៉ាកសញ្ញារបស់អាមេរិក ដែលពាក់ព័ន្ធទៅនឹងគម្រោង  Project Titan របស់ខ្លួន ។ 

នៅក្នុងឯកសារនេះ គឺមានការបង្ហាញអំពីប្រព័ន្ធថ្មីដែលអនុញ្ញាតអោយអ្នកបើកបរនៅតែមើលឃើញនូវស្ថានភាពផ្លូវបានយ៉ាងច្បាស់។ បច្ចេកវិទ្យាថ្មីនេះ ត្រូវបានគេចាត់ទុកថា គឺជារឿងមួយពិតជាសំខាន់ខ្លាំងណាស់នៅក្នុងស្ថានភាពធាតុអាកាសដែលអាក្រក់ៗដូចជាការធ្លាក់ព្រិល ការចុះអ័ព្ទ ឬធូលីជាដើម។ នៅក្នុងការបើកបរ ការមើលឃើញខាងមុខនោះ គឺជាផ្នែកមួយដ៏សំខាន់ដែលផ្តល់នូវសុវត្ថិភាពខ្ពស់ក្នុងការបើកបរ។

នៅក្នុងពេលដែលការមើលទៅខាងមុខមិនច្បាស់នោះ ប្រព័ន្ធនេះ វានឹងជួយអ្នកបើកបរជាច្រើន អោយមើលឃើញរថយន្តជាច្រើននៅលើដងផ្លូវបានយ៉ាងល្អ ដើម្បីកាត់បន្ថយនូវគ្រោះថ្នាក់ ដែលអាចកើតមានឡើងជាយថាហេតុនោះ។ នៅក្នុងប៉ាតង់នេះ ក៏បានបញ្ជាក់បន្ថែមដែរ សម្រាប់រថយន្តដែលមានប្រព័ន្ធនេះ គឺនឹងមានសមត្ថភាពបើកបរបានស្រួល នឹងអាចកាត់បន្ថយទៅលើគ្រោះថ្នាក់បានល្អប្រសើរជាងមុន៕