Noi ES6 រថយន្តអគ្គិសនីស៊េរីថ្មីបំពាក់ថាមពលអាគុយបីជម្រើសផ្សេងគ្នា បានប្រកាសចេញផ្លូវការនៅទីផ្សារប្រទេសចិន

Noi គឺជាក្រុមហ៊ុនផលិតរថយន្តអគ្គិសនីដ៏មានឥទ្ធិពលមួយនៅក្នុងប្រទេសចិន និងនៅលើទីផ្សាររថយន្តអគ្គិសនីទូទាំងសកលលោក។ ដោយទទួលបានជោគជ័យខ្លាំងទៅលើទីផ្សារលក់រថយន្តរបស់ខ្លួនទាំងក្នុងស្រុក និងក្រៅស្រុក ក្រុមហ៊ុននេះបានធ្វើការប្រកាសចេញស្រឡាយរថយន្តអគ្គិសនីថ្មីៗរបស់ខ្លួនជាបន្តបន្ទាប់ដើម្បីបំពេញតម្រូវការទីផ្សារ។ ដោយឡែកកាលពីម្សិលមិញនេះ Noi ក៏បានធ្វើការប្រកាសចេញរថយន្តអគ្គិសនីស៊េរីថ្មីមួយម៉ូដែលដែលមានឈ្មោះថា Noi ES6 នៅទីផ្សារប្រទេសចិន។

រថយន្តអគ្គិសនីស៊េរីថ្មី Noi ES6 មានជម្រើសបំពាក់ថាមពលអាគុយ 3 ផ្សេងៗពីគ្នា ប៉ុន្តែ ក្រុមហ៊ុនបានប្រកាសចេញលក់តែជម្រើសពីរប៉ុណ្ណោះ។ ដោយជម្រើសទីមួយ គឺ Noi ES6 ដែលមានបំពាក់ថាមពល អាគុយអគ្គិសនីកំលាំង 75kWh ដែលអាចរត់បានចំងាយផ្លូវ 470 គីឡូម៉ែត្រនៅពេលសាកពេញម្តង និងជម្រើសមួយទៀត គឺ Noi ES6 ដែលបំពាក់ថាមពលអាគុយអគ្គិសនីកំលាំង 100kWh ដែលអាចរត់បានចំងាយផ្លូវ 625 គីឡូម៉ែត្រសម្រាប់ការសាកអាគុយមួយពេញម្តង។ ហើយជម្រើសមួយទៀតដែល Noi ត្រៀមប្រកាសចេញនៅពេលខាងមុខ គឺជាម៉ូដែល ES6 ដែលបំពាក់ថាមពលអាគុយអគ្គិសនីជាប្រភេទ semi-solid state កំលាំង 150kWh ដែលមានសមត្ថភាពរត់បានចំងាយផ្លូវដល់ 930 គីឡូម៉ែត្រ ហើយម៉ូដែលនេះនឹងមកដល់នៅក្នុងខែកក្ដដាខាងមុខនេះ។

រថយន្តអគ្គិសនីស៊េរីថ្មី Noi ES6 នេះត្រូវបានក្រុមហ៊ុនប្រកាសចេញលក់ផ្លូវការណ៍នៅប្រទេសចិនក្នុងតម្លៃខ្ទង់ប្រហែល $52,000 សម្រាប់ម៉ូដែលបំពាក់ថាមពលអាគុយអគ្គិសនីកំលាំង 75kWh និងខ្ទង់ប្រហែល $60,400 សម្រាប់ម៉ូដែលបំពាក់ថាមពលអាគុយអគ្គិសនីកំលាំង 100kWh។ Noi បានបំពាក់នូវម៉ូទ័រអគ្គិសនីទាំងនៅលើកង់មុខ និងកង់ក្រោយដែលផ្តល់នូវកំលាំង 400kW និងអាចជាន់ស្ទុះពី 0 ទៅ 100km ចាយពេលប្រមាណ 4.5 វិនាទី។

បន្ថែមពីនេះ Noi ES6 ក៏បានបំពាក់នូវប្រព័ន្ធ 4-piston calipers ដែលអាចបញ្ឈប់រថយន្តដែលមានល្បឿន 100km/h ឲ្យឈប់ត្រឹមចំងាយ 34.5 ម៉ែត្រតែប៉ុណ្ណោះ ដែលល្អបំផុតសម្រាប់ការជាន់ហ្វ្រាំងភ្លាមៗនៅពេលមានឧបសគ្គបន្ទាន់។ Noi ES6 នឹងត្រូវនាំចេញទៅកាន់ទីផ្សារអឺរ៉ុបនៅមុនដំណាច់ឆ្នាំនេះ ក្រោមស្លាកឈ្មោះថ្មីថា Noi EL6 ប៉ុន្តែ សម្រាប់តម្លៃនៅទីផ្សារអឺរ៉ុបមិនទាន់ត្រូវបានក្រុមហ៊ុនបង្ហើបឲ្យដឹងនៅឡើយទេ៕