ថ្មីៗនេះ BYD ទើបតែបានធ្វើការប្រកាសចេញរថយន្តអគ្គិសនីស៊េរីថ្មីរបស់ខ្លួនម៉ូដែល Song L DM-i។ ហើយឥលូវនេះបើតាមរបាយការណ៍ក្រុមហ៊ុនបានបង្ហាញថា ក្នុងរយះពេល 72 ម៉ោង បន្ទាប់ពីការប្រកាសចេញ និងទទួលការបញ្ជាទិញ រថយន្តស៊េរថី្មនេះ គឺមានការបញ្ជាទិញពី 8 ទៅ 10 គ្រឿង ពីតំណាងចែកចាយមួយ។ ដែលសរុបក្នុងរយះពេល 72 ម៉ោងនេះ ក្រុមហ៊ុនទទួលបានការបញ្ជាទិញមុន Song L DM-i ចំនួន 20,000 គ្រឿងពីក្រុមហ៊ុនចែកចាយបន្តនៅទូទាំងប្រទេសចិន ដែលមានន័យថា ចំនួន 20,000 គ្រឿង គឺជាការបញ្ជាទិញថ្មីសម្រាប់រថយន្ត BYD Song L DM-i។
BYD Song L DM-i គឺជារថយន្តប្រភេទ Crossover ដែលបំពាក់នូវប្រព័ន្ធបច្ចេកវិទ្យា DM-i plug-in-hybrid system ជំនាន់ទី 5 របស់ BYD ដែលមានអនុភាពខ្លាំងជាងមុន និងសន្សំសំចៃសាំងជាងមុន។ រថយន្តនេះបំពាក់នូវប្រព័ន្ធម៉ាស៊ីន Hybrid ទំហំ 1.5-Liter ដែលមានសមត្ថភាពអាចផលិតកំលាំងបាន 74kW និងកំលាំងរមូល 126Nm ដែលរួមដំណើរការដោយប្រព័ន្ធម៉ូទ័រអគ្គិសនីមួយគ្រាប់កំលាំង 160kW និងកំលាំងរមូលជ 260Nm។ សម្រាប់ម៉ាស៊ីនដែលបំពាក់នៅលើ Song L DM-i គឺមានលេខកូដ BYD472QC ដែលជាម៉ាស៊ីនចំហេះក្នុងដែលមានប្រសិទ្ធិភាពខ្ពស់ដល់ 46.06% ហើយក៏ជាម៉ាស៊ីនដែលបានប្រើនៅលើរថយន្តម៉ូដែល BYD Qin L និងSeal 06 DM-i ផងដែរ។
Song L DM-i មានជម្រើសកញ្ចប់អាគុយទំហំ 12.9kWh, 18.3kWh និង 26.6kWh។ ហើយបើតាមការបញ្ជាក់លើបញ្ចីនៃការធ្វើសាកល្បងរត់ចម្ងាយផ្លូវពីស្ថាប័ន CLTC បានបញ្ជាក់ថា Song L DM-i អាចបើកបរដោយប្រើថាមពលអាគុយអគ្គិសនីសុទ្ធបានចម្ងាយផ្លូវ 75km, 112km និង 160km ទៅតាមជម្រើសកញ្ចប់អាគុយនីមួយៗនៅពេលសាកភ្លើងមួយពេញម្តង។ ចំនែកស្ថាប័ន NEDC វិញបានបញ្ជាក់ថា កម្រិតស៊ីសាំងរបស់ Song L DM-i គឺ 3.88L, 3.90L និង 3.93L/100km ទៅតាមជម្រើសម៉ូដែលនីមួយៗ។ ហើយបើគិតសរុបសមត្ថភាពដែល BYD Song L DM-i អាចបើកបរបាន គឺដល់ 1,500km។
សម្រាប់ឌីស្សាញវិញ អាចនិយាយបានថា BYD Song L DM-i គឺជារថយន្ត Compact-SUV ឬ Crossover-SUV ឬ mid-size SUV ដោយសារតែរថយន្តនេះមានទំហំវិមាត្ររួម គឺ 4,780mm x 1,898mm x1,670mm ជាមួយគម្លាតចន្លោះកង់មុខទៅកង់ខាងក្រោយ 2,782mm។ នៅផ្នែកខាងក្នុងរបស់ Song L DM-i មានបំពាក់នូវកៅអីចំនួន 5 ដែលរៀបជា 2+3 Seat។ ចំនែកការឌីស្សាញផ្នែកខាងមុខរបស់រថយន្តេះ PHEVCrossover នេះ គឺប្រើប្រាស់នូវភាសារចនាបែបមុខនៃសត្វនាគរាជ ឬហៅថា Dragon Face Design Language ដែលរំលេចជាមួយចង្កៀង LED រចនាបែបស្លីមដូចភ្នែកនាគរាជ រួមនឹងផ្ទាំងប៉ាណាធំ និងរន្ធលំហខ្យល់ដែលមានភាពស្រដៀងគ្នាមាត់នាគរាជ។
សូមបញ្ជាក់ថា BYD បានធ្វើការប្រកាសចេញរថយន្តស៊េរីថ្មីឆ្នាំ 2025 Song L DM-i ជាមួយ Song Plus DM-I កាលពីថ្ងៃទី 25 កក្តដា ថ្មីៗនេះ។ រថយន្តស៊េរីថ្មីឆ្នាំ 2025 ទាំងពីរម៉ូដែលនេះមានជួរតម្លៃប្រហាក់ប្រហែលគ្នារថយន្តដែលបំពាក់នូវប្រព័ន្ធ Hybrid ជំនាន់ទី 5 ផ្សេងទៀតដែល និងមានជម្រើសចំនួន 5 ស៊េរី ឬ 5-options ជាមួយតម្លៃចាប់ពីខ្ទង់ $18,800 ដល់ $24,300 នៅទីផ្សារប្រទេសចិន។ តាមការបញ្ជាក់ពី BYD បានឲ្យដឹងថា អតិថិជនបានបញ្ជាទិញម៉ូដែល Song L DM-i 112 Leading ដែលមានតម្លៃខ្ទង់ $20,150 មានចំនួន 40%, ម៉ូដែល 112 Transcendent ដែលមានតម្លៃខ្ទង់ $21,550 មានចំនួន 20% និងម៉ូដែល 160 Transcendent ដែលមានតម្លៃខ្ទង់ $22,950 មានប្រមាណ 20%៕
