សម្រាប់ទីផ្សារលក់រថយន្តអគ្គិសនីក្នុងពេលបច្ចុប្បន្ន ក្រុមហ៊ុន BYD (Built Your Dream) របស់ប្រទេសចិននៅតែបន្តនាំមុខគេទាំងទីផ្សារលក់ក្នុងស្រុក និងទីផ្សារសកល ដោយនាំមុខទាំងក្រុមហ៊ុនផលិតរថយន្តអគ្គិសនីម៉ាកល្បីបំផុតរបស់ពិភពលោក គឺ Tesla របស់សហរដ្ឋអាមេរិកទៅទៀត។ បច្ចុប្បន្ន BYD មានស្រឡាយផលិតផល និងម៉ាកយីហោរថយន្តជាច្រើនក្នុងដៃ ហើយ YangWang គឺជាម៉ាកយីហោថ្មីមួយរបស់ក្រុមហ៊ុននេះ។ ក្រុមហ៊ុននៃម៉ាកយីហោមួយនេះបានធ្វើការប្រកាសចេញកំពូលរថយន្តប្រភេទ Electric Vehicle Off-road SUV ស៊េរីថ្មីម៉ូដែល YangWang U8 កាលពីអំឡុងថ្ងៃទី 20 ខែ កញ្ញា កន្លងទៅ។
BYD YangWang U8 គឺជាកំពូលរថយន្តអគ្គិសនី Off-Road ដ៏ទំនើបបំផុត និងមានការឌីស្សាញប្រណិតទំនើបទាន់សម័យជាមួយភាពហាប់ធន់រឹងមាំមិនចាញ់រថយន្ត Jeep ឡើយ។ YangWang U8 បានបង្កើតស្តង់ដារថ្មីនៃរថយន្តអគ្គិសនីជាមួយរយះចំងាយក្នុងការបើកបរដល់ 180km និងឈានដល់ 1,000km។ រថយន្ត Off-road SUV EV ដ៏ទំនើបមួយនេះបំពាក់នូវប្រព័ន្ធម៉ូទ័រអគ្គិសនីចំនួន 4 អាចបង្កើតកំលាំងបានដល់ 1,200hp ជាមួយកំលាំងបង្វិល 1,200 pound-feet និងអាចជាន់សន្ទុះល្បឿនពី 0 ទៅ 100km/h ចាយពេល 3.6 វិនាទី ដែលនេះជាល្បឿនដែលខ្លាំងកប់ទៅហើយសម្រាប់រថយន្តអគ្គិសនីប្រភេទ Off-road មាឌធំដូចនេះ។
ក្រៅតែពីមានកំលាំងខ្លាំង និងមានថាមពលអគ្គិសនីអាចបើកបរបានរយះចំងាយឆ្ងាយហើយ BYD YangWang U8 នៅមានបំពាក់នូវប្រព័ន្ធបច្ចេកវិទ្យាទំនើបៗចុងក្រោយដែលផ្តល់នូវផាសុខភាព និងសុវត្ថិភាពខ្ពស់ក្នុងការបើកបរថែមទៀតផង។ ជាពិសេសរថយន្ត Off-Road SUV EV មួយនេះ ក៏អាចធ្វើការបើកបរក្នុងទឹកបាន ដោយសារតែមានបំពាក់នូវប្រព័ន្ធការពារទឹកកម្រិតខ្ពស់ដូចជានាវាមុជទឹកអីចឹងដែរ។ ក្រោយពីបានបង្ហាញខ្លួនកាលពីខែកញ្ញា 2023 កន្លងមក រថយន្តស៊េរីថ្មីមួយនេះទទួលបានការចាប់អារម្មខ្លាំងពីសំណាក់អ្នកប្រើប្រាស់។
ហើយនៅពេលនេះ បើតាមរបាយការណ៍ពីស្ថាប័ន Shaanxi Provincial Department of Industry and Information Technology ក្នុងខេត្ត Shaanxi របស់ប្រទេសចិន ដែលជាទីតាំងរោងចក្រផលិតរថយន្ត BYD YangWang ផ្ទាល់បានឲ្យដឹងថា YangWang U8 Luxury NEV ថ្មីនេះ ទទួលបានការកក់សម្រាប់ការផលិតដំបូងពីអតិថិជនចំនួន 3 ម៉ឺនគ្រឿងទៅហើយ។ BYD YangWang U8 មានតម្លៃខ្ទង់ប្រហែលជាង 15 ម៉ឺនដុល្លារអាមេរិកនៅទីផ្សារប្រទេសចិន៕
