Huawei ចេញឡានអគ្គិសនីថ្មីមានតម្លៃជាង 2 ម៉ឺនដុល្លារ ប្រជែងជាមួយនិងឡានអគ្គិសនី Xiaomi SU7

HIMA ឬ Harmony Intelligent Mobility Alliance ដែលជាបណ្តាញលក់រថយន្តទំនើបដ៏ធំបំផុតក្នុងអាជីវកម្មរថយន្តរបស់ក្រុមហ៊ុនបច្ចេកវិទ្យា Huawei។ ហើយនៅពេលនេះក្រុមហ៊ុនផលិតរថយន្តម៉ាក Shangjie ស្ថិតក្នុងក្រុមហ៊ុន HIMA បានប្រកាសចេញជាផ្លូវការណ៍ថា ខ្លួនបានត្រៀមធ្វើការប្រកាសចេញលក់រថយន្តអគ្គិសនីស៊េរីថ្មីប្រភេទ Coupe ដែលជាផលិតផលទីពីរម៉ូដែល Z7 នៅត្រីមាសដំបូងក្នុងឆ្នាំ 2026 នេះ។ 

Shangjie Z7 ត្រូវបានក្រុមហ៊ុនបង្ហាញវត្តមានផ្លូវការណ៍នៅថ្ងៃទី 7 មករា ម្សិលមិញនេះ ដែលធ្វើឡើងបន្ទាប់ពីការចេញផ្សាយរូបភាពផ្សព្វផ្សាយមុនៗ និងការបង្ហាញពីការផ្សាយផ្ទាល់ពិសេស “Five Realms” ដែលបានបង្ហាញពីម៉ាកយីហោស្ថិតក្នុងប្រព័ន្ធអេកូឡូស៊ី “HarmonyOS Smart Travel” ។ ក្នុងអំឡុងពេលព្រឹត្តិការណ៍នេះ លោក Richard Yu ដែលជាប្រធានក្រុមហ៊ុន HIMA បានបង្ហើបពីសោភ័ណភាពលំដាប់ខ្ពស់របស់ Shangjie Z7 ដោយថែមទាំងបានបញ្ជាក់ថា រូបរាងរបស់ឡានស៊េរីថ្មីនេះ ត្រូវបានរចនាផលិតឡើងយ៉ាងពិសេសបំផុតដើម្បីត្រៀមប្រកួតប្រជែងជាមួយថ្នាក់រថយន្តប្រណិតៗកម្រិត “million-level European performance car” របស់អឺរ៉ុប។

បើតាមរូបភាពបង្ហាញផ្នែកចំហៀងរបស់ Shangjie Z7 គឺមានលក្ខណៈស្រដៀងគ្នាខ្លាំងទៅនឹងរថយន្ត Porsche Taycan ខណៈដែលផ្នែកខាងមុខរបស់ Z7 ត្រូវបានប្រើប្រាស់ការរចនាបែបគ្រួសារស្រដៀងគ្នាទៅនឹងម៉ូដែល Shangjie H5 រីឯភ្លើងក្រោយក៏ស្រដៀងគ្នានឹងភ្លើងបំភ្លឺខាងក្រោយរបស់ Taycan ដែរ។ Shangjie Z7 ត្រូវបានក្រុមហ៊ុនធ្វើការបំពាក់មកជាមួយប្រព័ន្ធមុខងារចម្បងទំនើបមួយចំនួន រួមមានដូចជា ផ្នែកដំបូលខាងមុខមានបំពាក់នូវប្រព័ន្ធសែនស័រ LiDAR ដែរច្បាស់ណាថា រថយន្ត Coupe ស៊េរីថ្មីនេះ គឺគាំទ្រនូវប្រព័ន្ធសុវត្ថិភាពជំនួយការបើកបរកម្រិតខ្ពស់, ផ្នែកទ្វារជាប្រភេទ  hidden ឬ semi-hidden door handles និងបំពាក់យ៉ាន់កង់ទំហំធំជាមួយសម្បកកង់បែបស្ព័រ។

សម្រាប់ការឌីស្សាញនេះ គឺត្រូវបានមើលឃើញថា ក្រុមហ៊ុនបានធ្វើការផ្លាស់ប្តូរទម្រង់ឌីស្សាញបែប OneBox ដែលជាស្តង់ដាររបស់ HarmonyOS Smart Travel ដោយជំនួសមកវិញ នូវការប្រើរចនាបថ long-hood style ដែលមានភាពស្រដៀងគ្នានឹងឡាន Xiaomi SU7 ដែលការឌីស្សាញបែបថ្មីនេះ ត្រូវបានគេរំពឹងថានឹងទទួលបានការចាប់អារម្មណ៍ខ្លាំងពីស្រទាប់យុវវ័យទូទៅ។ រថយន្តស៊េរីថ្មីនេះ ក៏នឹងមានការឌីស្សាញផ្នែកចង្កៀងខាងមុខថ្មីផងដែរ ដោយអាចនឹងបំពាក់នូវបច្ចេកវិទ្យាអំពូលភ្លើងប្រភេទ “Smart driving indicator lights” ហើយនិងកញ្ចក់មកក្រោយសងខាងរចនាបែបស្លីម “frameless exterior mirrors” ផងដែរ។

ឈរក្នុងនាមជាម៉ាកយីហោរថយន្តប្រណិតដែលមានតម្លៃសមរម្យបំផុតពីក្រុមហ៊ុន HIMA, ក្រុមហ៊ុន Shangjie គឺបាននឹងកំពុងកំណត់គោលដៅជាក់ច្បាស់ទៅលើក្រុមអ្នកប្រើប្រាស់រថយន្តជាយុវវ័យជាមួយនឹងម៉ូដែល Z7។ Shangjie Z7 នឹងមានការប្រកួតប្រជែងខ្លាំងក្នុងផ្នែកតម្លៃរថយន្តខ្ទង់ 200,000យន់ ឬប្រហែល $29,000 អាមេរិកនៅក្នុងទីផ្សារប្រទេសចិន៕