Chery បញ្ចេញគំរូឡានហោះស៊េរីថ្មី មានសមត្ថភាពអាចហោះហើរបានចំងាយ 80km

កាលពីពេលថ្មីៗនេះក្រុមហ៊ុនផលិតរថយន្តម៉ាក Chery បានធ្វើការតាំងបង្ហាញគំរូរថយន្តដែលអាចហោះបានដែលមានឈ្មោះថា “Land and Air vehicle” របស់ខ្លួននៅក្នុងព្រឹត្តិការណ៍ 2024 Chery Global Innovation Conference ដែលប្រារព្ធធ្វើឡើងនៅទីក្រុង Anhui ប្រទេសចិន។ Chery ក៏បានបញ្ជាក់ផងដែរថា គំរូប Flying Car ដំបូងរបស់ខ្លួនបាននឹងកំពុងស្ថិតក្នុងដំណាលកាលអភិវឌ្ឍន៍ ហើយរថយន្តនេះទទួលបានជោគជ័យសម្រាប់ការតេស្តសាកល្បងក្នុងរយះចម្ងាយប្រមាណ 80km រួចហើយ។

តាមគំរូឡានហោះរបស់ Chery គឺមានការឌីស្សាញឡើងបែបរថយន្តកាត់កូនយន្តហោះឬហៅថា Three-body hybrid-wing flying car ដែលមិនមានដៃចង្កូត និងឈ្នាន់ហ្គែរ ហើយត្រូវបានបែកចែកជាបីផ្នែកសំខាន់ៗ គឺបែបកូនយន្តហោះជាផ្នែក Aircraft, ផ្នែកកាប៊ីនរថយន្តបំពាក់នូវប្រព័ន្ធបើកបរឆ្លាតវៃជាផ្នែ Intelligent Cockpit និងការបើកបរដោយប្រព័ន្ធស្វ័យប្រវត្តិជាផ្នែក Intelligent Chassis។

គំរូឡានហោះរបស់ Chery មួយនេះ ត្រូវបានរចនាឡើងដោយអាចដំណើរការបានទាំងបើកបរនៅលើដងផ្លូវ និងការហោះហើរដោយសារតែវាគាំទ្រមុខងារផ្លាស់ប្តូរសម្រាបើកបរស្វ័យប្រវត្តិ autonomous flying និង autonomous land driving mode។ Chery បញ្ជាក់ថា ឡានហោះរបស់ខ្លួនផលិតឡើងក្នុងគោលបំណងសម្រាប់ការធ្វើដំណើរចំងាយជិតៗដូចជានៅក្នុងទីក្រុងជាដើម ដើម្បីកាត់បន្ថយការកកស្ទះចរាចរណ៍។ ជាមួយមុខងារ Flying Mode គឺអនុញ្ញាតិឲ្យឡាននេះអាចហោះឡើង និងចុះចតបានប្រកបដោយសុវត្ថិភាព។

យោងតាមសារព័ត៌មានដែលបានចេញផ្សាយលើកមុននិយាយថា ឡានហោះរបស់ Chery ត្រូវបានបង្កើតឡើងដោយឈរនៅលើស្ថាបត្យកម្ម S2ma-scalable intelligent Mars architecture  និងត្រូវបានរចនាឡើងសម្រាប់ដែលអាចផ្ទុកមនុស្សពីរនាក់។ សម្រាប់ការហោះហើរវិញ គឺអាចហោះបានរយះកំពស់ទាបជាង 1000 ម៉ែត្រ ជាមួយល្បឿនហោះហើរអតិបរមាអាចឡើងដល់ 120 គីឡូម៉ែត្រក្នុងមួយម៉ោង ហើយពេលវេលាហោះហើរ អាចធ្វើបានប្រហែល 40 នាទី។

ក្រៅពី Chery នៅមានក្រុមហ៊ុនផលិតរថយន្តក្នុងប្រទេសចិនជាច្រើនទៀតដែលកំពុងធ្វើការលើគម្រោងអភិវឌ្ឍន៍ និងផលិតឡានហោះបានដូចជា Xpeng, GAC និង Geely ជាដើម… ដោយក្នុងនោះក្រុមហ៊ុន Xpeng ទទួលបានជោគជ័យក្នុងការសាកល្បងហោះហើរសម្រាប់ឡានហោះរបស់ខ្លួនកាលពីខែមិនា កន្លងទៅនៅទីក្រុង Guangzhou ប្រទេសចិន។

ឡានហោះ Xpeng AeroHT មានទំងន់ប្រមាណ 2,500kg, មានសមត្ថភាពអាចហោះហើរបានល្បឿនធម្មតា cruising speed ប្រមាណ 248km/h និងល្បឿនអតិបរិមាប្រមាណ 230km/h ហើយអាចដាក់អ្នកដំណើរការបានចំនួន 6 នាក់។ យ៉ាងណាមិញសម្រាប់ការចេញលក់ផ្លូវការណ៍៍ក្រុមហ៊ុនមិនទាន់បញ្ជាក់នៅឡើយទេ ប៉ុន្តែ បើតាមប្រភពព័ត៌មានចុងក្រោយ Xpeng AeroHT អាចនឹងចេញលក់ផ្លូវការណ៍នៅឆ្នាំ 2025 បន្ទាប់ពីទទួលបានច្បាប់អនុម័តផ្លូវការណ៍ពីស្ថាប័នពាក់ព័ន្ធក្នុងប្រទេសចិន៕