កាលពីថ្ងៃសៅរ៍ទី 07 ខែធ្នូ ឆ្នាំ 2019 កន្លងទៅនេះ ក្រុមហ៊ុន រ៉ូបូស៊ីង កម្ពុជា បានសហការជាមួយមជ្ឈមណ្ឌលកម្សាន្តកុមារ Urban Space ដើម្បីប្រារព្ធពិធីប្រគល់វិញ្ញាបនបត្រទៅ ដល់សិស្សានុសិស្សដែលបានបញ្ចប់វគ្គសិក្សាថ្នាក់សាងសង់គ្រឿងយន្ត និងសរសេរកូដកម្រិត 1 កម្រិត 2 កម្រិត 3 និងវគ្គសិក្សាខ្លី (Summer Fun Camp) ដែលមានសិស្សចំនួន 100 នាក់មកពីសាលាដៃគូមានដូចជា សាលាអន្តរជាតិ យូ អេស អេ ច្បារអំពៅ យូ អេស អេ ទួលទំពូង និងថ្នាក់ចុងសប្តាហ៍នៅមជ្ឈមណ្ឌលកំសាន្តកុមារ Urban Space ។
លោក ណាំ ទ្រី នាយកសិក្សាធិការ នៃកម្មវិធីរ៉ូបូស៊ីង បានថ្លែងថា៖ គិតមកទល់ពេលនេះ ប្អូនៗកុមារ ដែលបានចូលរួមវគ្គសិក្សាពិសេស ទាក់ទងនឹងចំណេះដឹងផ្នែកសាងសង់គ្រឿងយន្តនិងសរសេរកូដក្នុងកម្មវិធីរ៉ូបូស៊ីង មានការរីកចម្រើនគួរឲ្យកត់សម្គាល់។ ហើយលោក សង្ឃឹមថា វគ្គសិក្សានេះ នឹងបានរួមចំណែកបណ្ដុះបណ្ដាលជំនាញបច្ចេកទេសនេះ ដល់ប្អូនៗសិក្សានុសិស្សកម្ពុជា មានសមត្ថភាពកាន់តែខ្ពស់ថែមមួយកម្រិតទៀត ជាពិសេសដើរឲ្យទាន់ការវិវឌ្ឍន៍នៃឧស្សាហកម្មជំនាន់ 4.0 នាពេលបច្ចុប្បន្ន។ កម្មវិធីរ៉ូបូស៊ីង ជាកម្មវិធីសិក្សាបែបស្ទែមលំដាប់ពិភពលោកពីសហរដ្ឋអាមេរិក ដែលជាកម្មវិធីសិក្សាថ្នាក់សាងសង់គ្រឿងយន្ត និងសរសេរកូដសំរាប់កុមារដំបូងគេបង្អស់នៅក្នុងព្រះរាជាណាចក្រកម្ពុជា។
យោងតាមប្រសាសន៍របស់ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំយុវជន និងកីឡា ក៏ធ្លាប់បានលើកឡើងផងដែរថា៖ "ដើម្បីឲ្យមានសេដ្ឋកិច្ចបែបឌីជីថល លុះត្រាតែមានការអប់រំបែបឌីជីថល"។ ហេតុដូច្នេះហើយ ទើបកម្មវិធីសិក្សាបែបស្ទែម រួមចំណែកយ៉ាងសំខាន់មួយ ក្នុងការដុសខាត់ចមណេះដឹងសិកស្សានុសិស្សដែលបានឆ្លងកាត់វគ្គសិក្សានេះឲ្យកាន់តែទូលំទូលាយ អាចប្រកួតប្រជែងផ្នែកចំណេះ និងជំនាញជាមួយសិស្សានុសិស្សនាប្រទេសផ្សេងៗ លើឆាកអន្តរជាតិបានពេញលេញ។
ថ្លែងក្នុងកម្មវិធីនោះដែរ ស្ថាបនិកវ័យក្មេងកម្មវិធីរ៉ូបូស៊ីង លោកគុយ ប៉ាន់ឆ័យ លើកឡើងថា៖ កម្មវិធីរ៉ូបូស៊ីង ដែលជាកម្មវិធីសិក្សាបែបស្ទែមលំដាប់ពិភពលោកមកពីសហរដ្ឋអាមេរិក មកប្រទេសកម្ពុជា ក្នុងនោះដែរ លោក បានប្តេជ្ញាចិត្តយ៉ាងមុតមាំ ក្នុងការបណ្តុះស្មារតី និងទឹកចិត្តកុមារកម្ពុជាទាំងអស់ឲ្យស្រទ្បាញ់វិស័យអប់រំតាមបែបបច្ចេកវិទ្យានិងវិទ្យាសាស្រ្តទំនើប ក្នុងគោលដៅលើកកម្ពស់សេដ្ឋកិច្ចជាតិស្របតាមសេដ្ឋកិច្ចបែបឌីជីថល។
គួរបញ្ជាក់ថា ថ្នាក់រៀន កម្មវិធីរ៉ូបូស៊ីង គឺជាកម្មវិធីសិក្សាបែបវិទ្យាសាស្ត្រទំនើបសម័យចុងក្រោយបំផុត ស្របតាមស្តង់ដារអន្តរជាតិពីសហរដ្ឋអាមេរិក ដោយមានគ្រូជំនាញ មានទាំងជនជាតិបរទេស និងបញ្ញវន្តខ្មែរដែលទទូលបានការបណ្តុះបណ្តាលផ្ទាល់ពីក្រុមជំនាញវិស្វកររ៉ូបូស៊ីងសហរដ្ឋអាមេរិក៕