ក្រុមហ៊ុន Samsung បញ្ជាក់រួចហើយថា ក្រុមហ៊ុន នឹងបង្ហាញស្មាតហ្វូនស៊េរីថ្មី Galaxy S8 នៅថ្ងៃទី 29 ខែមីនាខាងមុខនេះ ប៉ុន្តែយើងនៅតែជជែកពិភាក្សាទៅលើកាលបរិច្ឆេទនៃការបញ្ជាទិញមុន (Pre-Order) សម្រាប់ស្មាតហ្វូននេះ។ ពេលនេះ ប្រព័ន្ធផ្សព្វផ្សាយមួយរបស់ប្រទេសកូរ៉េខាងត្បូង បានទទួលព័ត៌មានពីក្រុមហ៊ុន Samsung អំពីកាលបរិច្ឆេទនៃការកម្មង់ទិញមុនហើយ គឺនៅថ្ងៃទី 7 ខែមេសា។ ស្មាតហ្វូន Galaxy S8 និង Galaxy S8+ ត្រូវបានគេសន្មត់ថា អាចបញ្ជាទិញមុននៅក្នុងប្រទេសកូរ៉េខាងត្បូងចាប់ពីថ្ងៃទី 7 ខែមេសាតទៅ ខណៈពេលការបញ្ជាទិញមុននឹងបញ្ចប់នៅថ្ងៃទី 17 ខែមេសា ស្មាតហ្វូនស៊េរីថ្មីនេះ នឹងចាប់ផ្តើមដាក់លក់នៅលើទីផ្សារដំបូងបំផុតនៅថ្ងៃទី 21 ខែមេសា។ សារព័ត៌មាន Korean Media រាយការណ៍ថា ក្រុមហ៊ុន Samsung នឹងរៀបចំព្រឹត្តិការណ៍ដាក់លក់មុន (Pre-Launch Events) នៅថ្ងៃទី 18 ខែមេសានៅក្រុមហ៊ុនចែកចាយធំៗទាំង 3 នៅក្នុងប្រទេសនេះ។
ទោះជាយ៉ាងណាក៏ដោយ មានតែអតិថិជនជ្រើសរើសប៉ុណ្ណោះដែលអនុញ្ញាតឱ្យចូលរួមក្នុងព្រឹត្តិការណ៍ដាក់លក់មុន (Pre-Launch Events) ខណៈពេលដែលពួកគេមានឱកាសអាចឈ្នះពានរង្វាន់ជាច្រើនរហូតដល់ 3 លានវ៉ុន (2645 ដុល្លារ)។ ក្រុមហ៊ុន Samsung នឹងផ្តល់ជូនរង្វាន់ជាច្រើនរួមមាន Galaxy S8 និង Galaxy S8+ រួមទាំងនាឡិកាស្មាតវ៉ច Gear S3 សម្រាប់អ្នកមានសំណាងដែលបានចូលរួមក្នុងព្រឹត្តិការណ៍នេះថែមទៀតផង។
ចាប់ពីថ្ងៃទី 18 ខែមេសារហូតដល់ថ្ងៃទី 20 ខែមេសា ក្រុមហ៊ុនចែកចាយធំៗរបស់កូរ៉េនឹងបើកឱកាសអោយអតិថិជនដែលចង់ធ្វើការតេស្តសាកល្បងទៅលើស្មាតហ្វូនស៊េរីថ្មី Galaxy S8 ។ នៅថ្ងៃបន្ទាប់ (ថ្ងៃទី 21 ខែមេសា) ស្មាតហ្វូន Samsung Galaxy S8 និង Galaxy S8+ នឹងចេញលក់នៅក្នុងប្រទេសកូរ៉េ។ យោងតាមបុគ្គលិកធ្វើការនៅក្រុមហ៊ុន Samsung ព្រឹត្តិការណ៍ដាក់លក់មុន (Pre-Launch Events) សម្រាប់ស្មាតហ្វូន Galaxy S8 បានសម្រេចចិត្តនៅវិនាទីចុងក្រោយ។ ព្រឹត្តិការណ៍នេះអាចបង្កើនអោយមានចំនួនការទិញកើនឡើង។ ការដាក់លក់ស្មាតហ្វូន Galaxy S8 និង Galaxy S8+ នៅលើពិភពលោកប្រហែលជាកំណត់នៅថ្ងៃទី 28 ខែមេសា ប៉ុន្តែពេលនេះយើងបានដឹងត្រឹមតែកាលបរិច្ឆេទនៃការកម្មង់ទិញមុនតែប៉ុណ្ណោះ៕
