TOYOTA បាននាំយករថយន្តអគ្គិសនីស៊េរីថ្មីចំនួនពីរម៉ូដែល ទៅដាក់តាំងបង្ហាញក្នុងព្រឹត្តិការណ៍ពិព័រណ៌រថយន្ត Beijing Auto Show 2024

ក្រុមហ៊ុនផលិតរថយន្តម៉ាកល្បីបំផុតរបស់់ប្រទេសជប៉ុន TOYOTA បាននាំយករថយន្តអគ្គិសនីស៊េរីថ្មីចំនួនពីរម៉ូដែលទៅដាក់តាំងបង្ហាញនៅក្នុងព្រឹត្តិការណ៍ពិព័រណ៌រថយន្តប្រចាំឆ្នាំ 2024 Beijing Auto Show។ រថយន្តអគ្គិសនីស៊េរីថ្មីទាំងពីរម៉ូដែលរបស់ TOYOTA បានប្រើស្លាកឈ្មោះថា bZ3C និង bZ3X ហើយរថយន្តស៊េរីថ្មីទាំងពីរម៉ូដែលនេះត្រូវបាន គេដឹងថានឹងចេញលក់ផ្លូវការណ៍នៅលើទីផ្សារនាឆ្នាំក្រោយនេះ (2025)។

សម្រាប់ម៉ូដែល TOYOTA bZ3C គឺជាប្រភេទរថយន្តអគ្គិសនី Sedan ដែលមានការសហការផលិតដោយក្រុមហ៊ុន BYD ដែលជាក្រុមហ៊ុនឈានមុខគេក្នុងទីផ្សាររថយន្តអគ្គិសនីរបស់ប្រទេសចិន។ រថយន្តស៊េរីថ្មីនេះ គឺជាផលិតផលដែលកកើតចេញពីគំរូរថយន្ត bZ Sport Crossover Concept ដែលក្រុមហ៊ុនបានធ្វើការដាក់បង្ហាញនៅក្នុងព្រឹត្តិការណ៍ Shanghai Auto Show កាលពីឆ្នាំមុន។ ដោយផ្នែកខាងមុខមានការឌីស្សាញជាមួយភ្លើងចង្កៀងរាងអក្សរ C ឬហៅថា  C shaped light clusters ជាមួយផ្ទាំង Bumper ប្រហាក់ប្រហែលគ្នានឹងម៉ូដែល TOYOTA Pruis ជំនាន់ថ្មីដែរ។ 

នៅលើផ្នែកដំបូលខាងមុខមានបំពាក់នូវប្រព័ន្ធសែនស័រ LiDAR រីដៃទ្វារត្រូវបានរចនាបែបលាក់ចូលក្នុងហៅថា Concealed door handles និងនៅផ្នែកខាងក្រោយបានរំលេចជាមួយស្តុបបំភ្លឺខាងក្រោយជាប្រភេទ LED ច្បាស់រាងអក្សរ C កាត់ពីម្ខាងទៅម្ខាងនៃកឃ្លុបខាងក្រោយតែម្តង។ ចូលមកផ្នែកខាងក្នុងរបស់ bZ3C ត្រូវបានរចនាជាមួយកៅអីបែបរថយន្តប្រណាំងជាមួយពណ៌ក្រហម ជាមួយអេក្រង់កម្សាន្តធំមួយនៅកណ្តាល Dashboard ចំនែកអក្រង់បង្ហាញព័ត៌មាន Digital Instrument ស្ថិតនៅលើ Dashboard ជិតនឹងកញ្ចក់ដំបូលខាងមុខ។ TOYOTA bZ3C នឹងត្រូវផលិតដោយក្រុមហ៊ុន FAW Toyota ហើយអាចនឹងត្រូវចេញលក់នៅលើទីផ្សារនៅឆមាសទីពីរក្នុងឆ្នាំ 2025។

ចំនែក bZ3X ត្រូវបានសហការផលិតដោយក្រុមហ៊ុន GAC Toyota ហើយត្រូវបានផលិតឡើងដោយប្រើនូវគំរូ bZ FlexSpace Concept របស់ក្រុមហ៊ុនដែលបានបង្ហាញកាលពីឆ្នាំមុន។ សម្រាប់ការឌីស្សាញ គឺមានលក្ខណៈពិសេសជាងម៉ូដែល bZ3C បន្តិច។ ដោយនៅផ្នែកខាងមុខមានការរចនាជាមួយអំពូល Daytime running light មួយខ្សែរាងអក្សរ C អូសកាត់ពីម្ខាងទៅម្ខាននៃក្បាលរថយន្ត និងមានចង្កៀងបំភ្លឺពេលរាត្រីស្ថិតនៅខាងក្រោមបន្តិច។ រថយន្ត Large-side SUV ស៊េរីថ្មីនេះ មានបំពាក់នៅប្រព័ន្ធ Lidar នៅលើកញ្ចក់ដំបូលខាងមុខផងដែរ។ ផ្នែកខាងក្រៅរបស់ Toyota bZ3X មានការឌីស្សាញជាពីរផ្នែក two-tone body ដោយមួយផ្នែកចាប់ពីកញ្ចក់ទ្វារទៅដំបូល គឺមានពណ៌ខ្មៅ។

រថយន្តនេះមានដំបូលរចនាបែប Large panoramic  roof ដែលអាចបើកបានមួយល្វែងលើតែម្តង។ ចំនែកផ្នែកខាងក្នុងវិញ ឃើញមានអេក្រង់់គ្រប់គ្រងការកម្សាន្តទំហំធំនៅកណ្តាល និងអេក្រង់បង្ហាញព័ត៌មានសំខាន់ៗមួយចំនួនរបស់រថយន្តនៅខាងក្រោយចង្កូតដែលមានទំហំតូច។ ទោះជាយ៉ាងណា TOYOTA មិនបានបង្ហាញលម្អិតអំពីបច្ចេកវិទ្យារថយន្ត និងសមត្ថភាពថាមពលរបស់រថយន្តអគ្គិសនីស៊េរីថ្មីទាំងពីរម៉ូដែលរបស់ខ្លួននោះទេ ក្នុងពេលនេះ។ យ៉ាងណាមិញ សម្រាប់ថាមពលដំណើរការរបស់រថយន្ត Powertrain វិញ ត្រូវបានគេដឹងថា នឹងប្រើកញ្ចប់អាគុយប្រភេទ Blade Battery របស់ BYD ដែលផលិតដោយក្រុមហ៊ុន FinDream៕