មួយរយះនៃការចាប់ផ្តើមនៃឆ្នាំ 2017 នេះ យើងសង្កេតឃៀញថា ទូរស័ព្ទស្មាតហ្វូនជាច្រើនម៉ូដែលបានបង្ហាញខ្លួននៅលើទីផ្សារនៅលើពិភពលោក រួមទាំងទីផ្សារប្រទេសកម្ពុជាផងដែរ។ យ៉ាងណាមិញ ក្រុមហ៊ុន Sony ក៏បានបង្ហាញចេញនូវទូរស័ព្ទស្មាតហ្វូនជំនាន់ថ្មីរបស់ខ្លួន ដើម្បីដណ្តើមនិងប្រជែងនៅលើទីផ្សារដូចគ្នាដែរ តួរយ៉ាងដូចជាម៉ូដែល Sony Xperia XZ Premium ដែលជាកំពូលទូរស័ព្ទស្មាតហ្វូន ពោរពេញដោយសមត្ថភាពក្នុងការបំពេញចិត្តអ្នកប្រើប្រាស់។.
ជាមួយនឹងរូបរាងដ៏ស្រស់ស្អាត ត្រូវបានរចនាឡើងយ៉ាងសម្រិតសម្រាំង ចេញជារូបរាងដ៏ទាន់សម័យបំផុត ធ្វើឲ្យ Sony Xperia XZ Premium កាន់តែមានភាពទាក់ទាញបំផុតក្នុងការប្រើប្រាស់។ ពេលនេះយើងមកមើលពីរូបរាងផ្នែកខាងមុខរបស់ Sony Xperia XZ Premium ដែលត្រូវបានលាតសន្ធឹងដោយកញ្ចក់អេក្រង់យ៉ាងរលើបរលោង ដោយខាងលើអេក្រង់មានបង្កប់នូវ កាមេរ៉ាខាងមុច ស៊ែនស័រ និងឧបាល័រស្តាប់ការសន្ទនា ចំែនកខាងក្រោមវិញមានរន្ឌឧបាល័របំពងសម្លេង ចំណែកប៊ូតុងទាំងបីគឺនៅជាប់លើអេក្រង់ផ្នែកខាងក្រោមតែម្តង។ យើងមកមើលពីការរចនាវ័ន្តជុំវិញរបស់វាវិញ ដោយសារតែរូបរាងរបស់វាមានរចនាបទ Unibody បន្ស៊ីគ្នាខាងមុខខាងក្រោយយ៉ាងជាប់ល្អ និងផ្សំគ្នាពីលោធាតុ អាលុយមីញ៉ូមកាន់តែចែងចាំង និងទាក់ទាញបំផុត រចនាបទរាងមូល ហើយនៅផ្នែកស្តាំមានប៊ូតុងឡើងចុះសម្លេង និងប៊ូតុងចាក់សោរអេក្រង់ និងបិតបើកទូរស័ព្ទ និងប៊ូតុងកាមេរ៉ា។
ខាងលើវិញមានរន្ធដោតកាសខ្នាត 3.5 មម និងស៊ិុនស័រតូចមួយសម្រាប់បញ្ជាដូចជាមុខងារ Bluetooth ជាដើម។ ចំណែកខាងឆ្វេងមានរន្ធស៊ីមការ និងមេម៉ូរីកាត មកដល់ខាងក្រោមមានរន្ធដោត USB Type C ។ យើងងាកមកចាប់អារម្មណ៍ផ្នែកខាងក្រោយរបស់វាវិញ កាន់តែពិសេសជាមួួនឹងការបំពាក់នូវកញ្ចក់ Corning Gorilla Glass 5 និងមានកាមេរ៉ា អមដោយស៊ិនស័រចាប់រូបភាព និងអំពូល LED Flash។
Sony Xperia XZ Premium ត្រូវបានបំពាក់ដោយកញ្ចក់អេក្រង់ទំហំ 5.5 អីុង ប្រភេទ IPS LCD ហើយវាក៏ជាអេក្រង់ទូរស័ព្ទដំបូងដែលភ្ជាប់មកជាមួយបច្ចេកវិទ្យា HDR 10 compliant, Triluminos display, X-Reality Engine ដែលវាជាបច្ចេកវិទ្យាអស្ចារ្យ ដែលធ្លាប់តក្រុមហ៊ុនប្រើនៅលើទូរទស្សន៍ ដែលអាចបង្ហាញចេញនូវកម្រិតរីសូលូហ្សិន 4K HDR ដែលមានសមត្ថភាពពេញលេញក្នុងការបង្ហាញចេញនូវរូបភាព និង វិដេអូនៅលើកញ្ចក់អេក្រង់បានយ៉ាងច្បាស់ត្រជាក់ភ្នែកតែម្តង ជាពិសេសជាមួយនឹងហ្គេមដែលមានក្រាហ្វិចធំៗ គឺអាចលេងបានយ៉ាងងាយស្រួលនិងរហ័សទាន់ចិត្តផងដែរ និងត្រូវបានបំពាក់នូវកញ្ចក់ការពារកកិត Corning Gorilla Glass 5។
Sony Xperia XZ Premium មានកាមេរ៉ាក្រោយទំហំ 19 មេហ្គាភិចសែល , f/2.0, 25mm, EIS (gyro ជាមួយនឹងស៊ិនស័រ 1/2.3" sensor size ជាពិសេសជាមួយនឹងបច្ចេកវិទ្យាកាមេរ៉ាផ្ទាល់ខ្លួន Sony បានបំពាក់នូវបច្ចេកវិទ្យាថតរូប Exmor RS™ for mobile , Sony G Lens, និង BIONZ™ for mobile ដែលរួមបញ្ចូលគ្នា ធ្វើឲ្យសមត្ថភាពក្នុងការថតរូបភាព នឹងវិដេអូនៅលើ Xperia XZ Premium បានយ៉ាងច្បាស់ល្អឥតខ្ចោះតែម្តង លំដាប់ 4K និងចាប់យកសកម្មភាពបានយ៉ាងរហ័សតែម្តង។ ចំណែកកាមេរ៉ាមុខរបស់វាមានទំហំ 13 មេហ្គាភិចសែល ជាមួយនឹងស៊ិនស័រ f/2.0, 22mm, 1/3" sensor size, 1.12 µm pixel size ដែលផ្តល់ជូននូវការថតរូបភាពបានយ៉ាងច្បាស់ ពិសេសគឺមុខងារ Selfie តែម្តង។
Sony Xperia XZ Premium ប្រើប្រាស់បន្ទះឈីបប្រភេទ Qualcomm MSM8998 Snapdragon 835 អមដោយអង្គគណនាប្រាំបីគ្រាប់ Octa-core (4x2.45 GHz Kryo & 4x1.9 GHz Kryo) ជាងនេះទៅទៀត Sony Xperia XZ Premium ក៏មាន RAM ទំហំ 4GB និងប្រើប្រាស់អង្គក្រាហ្វិច Adreno 540 ដែលធ្វើឲ្យសមត្ថភាពក្នុងការធ្វើកិច្ចការរបស់ស្មាតហ្វូនមួយនេះ ហាក់ខា្លំងក្លា ដែលអាចនិយាយបានថា គ្មានការរអាក់រអួលអ្វីសោះឡើយ ។ សម្រាប់ទំហំផ្ទុុកទិន្នន័យក្នុងម៉ាស៊ីនវិញមានទំហំ 64GB និងអាចដាក់បន្ថែមបានរហូតដល់ 256GB ប្រភេទ microSD ។ Sony Xperia XZ Premium ក៏ត្រូវបានភ្ជាប់មកជាមួយថ្មខ្នាត Li-Ion 3230mAh ដែលអាចផ្តល់ជូននូវការប្រើប្រាស់បានកាន់តែយូរជាងមុនទ្វេរដង។
Sony Xperia XZ Premium ដំណើរការដោយប្រព័ន្ធប្រតិបត្តិការ Android ជំនាន់ចុងក្រោយ 7.0 Nougat ជាមួយនឹងការភ្ជាប់មកជាមួយអិុនធើហ្វេសផ្ទាល់ខ្លួនថ្មី ដែលបន្ថែមភាពទាក់ទាញបំផុតសម្រាប់កម្មវិធីប្រើប្រាស់នៅលើអេក្រង់ផ្ទាល់។ ជាមួយប្រព័ន្ធប្រតិបត្តិការជំនាន់ថ្មីនេះដែរ ក៏ត្រូវបានបំពាក់មកជាមួយមុខងារនិងកម្មវិធីសម្រាប់ប្រើប្រាស់ ទំនាក់ទំនង និងការកម្សាន្តបានយ៉ាងសំបូរបែបបំផុតផងដែរ។ សរុបមក Sony Xperia XZ Premium គឺជាទូរស័ព្ទស្មាតហ្វូនស៊េរីថ្មីដ៏ល្អវិចិត្រសម្រាប់ការប្រើប្រាស់ ព្រោះថា វាល្អទាំងរូបរាង ល្អទាំងកម្មវិធីក៏ដូចជាមុខងារសម្រាប់ប្រើប្រាស់ ដែលផ្តល់ជូនលោកអ្នកនៅគ្រប់កិច្ចការងារទាំងអស់ ក៏ដូចជាតម្លៃក៏សមល្មមក្នុងការជាវយកទៅប្រើប្រាស់ផងដែរ៕