របាយការណ៍ថ្មី៖ Samsung អាចនិងផ្តួលក្រុមហ៊ុន Intel និងក្លាយជាក្រុមហ៊ុនផលិតបន្ទះឈីបធំបំផុតលើពិភពលោកនៅត្រីមាសទី 2 ក្នុងឆ្នាំនេះ

Intel បានក្លាយជាក្រុមហ៊ុនបច្ចេកវិទ្យាផលិតបន្ទះឈីបធំបំផុតនៅលើពិភពលោកតាំងពីឆ្នាំ 1993 មកម្ល៉េះ។ យោងទៅតាមរបាយការណ៍ថ្មីមួយរបស់ IC Insights បញ្ជាក់ថា ក្រុមហ៊ុន Intel មិនអាចរក្សាដំណែងនេះ បានយូរតទៅទៀតនោះទេ។ អ្វីជាច្រើនត្រូវគេរំពឹងថា នឹងមានការផ្លាស់ប្តូរនៅក្នុងត្រីមាសទី 2 នៅឆ្នាំនេះ នៅពេលដែលក្រុមហ៊ុនបច្ចេកវិទ្យាយក្ស Samsung នឹងដណ្តើមយកចំណាត់ថ្នាក់លេខ 1 មកគ្រប់គ្រង។

ក្នុងអំឡុងពេលពីខែមេសាដល់ខែមិថុនា រោងចក្រផលិតបន្ទះឈីបរបស់ក្រុមហ៊ុនបច្ចេកវិទ្យា Samsung ត្រូវបានគេរំពឹងថា នឹងលក់បានទឹកប្រាក់ចំនួន 14.6 ពាន់លានដុល្លារអាមេរិច ដែលមានការកើនឡើង 4.1% បើធៀបនឹងរយៈពេលដូចគ្នាកាលពីឆ្នាំមុននេះ។ ទោះជាយ៉ាងណាក៏ដោយ ក្រុមហ៊ុនបច្ចេកវិទ្យា Intel ត្រូវគេរាយការណ៍ថានឹងមានការលក់ក្នុងទឹកប្រាក់ត្រឹម 14.4 ពាន់លានដុល្លារអាមេរិច។ វាមានន័យថា ក្រុមហ៊ុនបច្ចេកវិទ្យា Samsung ពិតជាក្លាយជាក្រុមហ៊ុនផលិតបន្ទះឈីបដែលធំជាងគេបំផុតនៅក្នុងពិភពលោកខណៈពេលដែលក្រុមហ៊ុនបច្ចេកវិទ្យា Intel នឹងធ្លាក់មកឈរនៅចំណាត់ថ្នាក់ទី 2 វិញ។

ប្រតិបត្តិការហិរញ្ញវត្ថុរបស់ក្រុមហ៊ុនបច្ចេកវិទ្យា Samsung គឺមានការកើនឡើងនៅក្នុងបន្ទះ DRAM និង NAND Flash Chips ដែលត្រូវគេរំពឹងថានឹងមានការកើនឡើងពី 39% និង 25% នៅក្នុងឆ្នាំនេះ។ វាមានន័យថា វាពិតជាអាចទៅរួចដែលក្រុមហ៊ុនបច្ចេកវិទ្យាយក្សរបស់កូរ៉េខាងត្បូងមានសមត្ថភាពក្នុងការលក់ Semiconductors របស់ខ្លួនខ្ពស់ជាងក្រុមហ៊ុន Intel ផងដែរ។

កាលពីឆ្នាំមុននេះ អាជីវកម្មស្មាតហ្វូនហាក់ដូចជាមិនជោគជ័យនោះទេ សម្រាប់ក្រុមហ៊ុន Samsung ដោយសារតែបញ្ហារបស់ហ្វាប់ប្លេត Galaxy Note 7 ប៉ុន្តែការលក់បន្ទះឈីបរបស់ក្រុមហ៊ុន Samsung មានការកើនឡើងខ្លាំង។ នៅក្នុងឆ្នាំនេះ រឿងជាច្រើននឹងមានការផ្លាស់ប្តូរសម្រាប់ក្រុមហ៊ុន Samsung ។ ក្រុមហ៊ុន Samsung ទើបតែបង្ហោះនូវលទ្ធផលត្រីមាសទី 1 របស់ខ្លួនដ៏ល្អបំផុត ហើយពេលនេះយើងកំពុងតែតាមដានមើលថា តើក្រុមហ៊ុន Samsung ពិតជាអាចផ្តួលក្រុមហ៊ុន Intel ដែលមានឈ្មោះជាក្រុមហ៊ុនផលិតបន្ទះឈីបធំបំផុតលើពិភពលោករយៈពេល 24 ឆ្នាំបានដែរឬទេ?