ពិតជាមិនធម្មតានោះទេ ដែលត្រឹមតែរយៈពេល 13 ឆ្នាំប៉ុណ្ណោះ ក្រុមហ៊ុន Facebook ទទួលបានការគាំទ្រខ្លាំងទៅលើបណ្តាញសង្គម ដែលពេញនិយមបំផុតនៅក្នុងពិភពលោក ដែលកម្មវិធីនេះ គឺបានផ្តោតខ្លាំងទៅលើការទំនាក់ទំនង ការចែករំលែកព័ត៌មាន និងការបង្ហាញនូវអ្វីដែលថ្មីទៅកាន់ពិភពលោកទាំងមូល។ នៅថ្ងៃនេះ Facebook បាន ប្រកាសថា បណ្តាញសង្គម Social Network នេះ មានអ្នកប្រើប្រាស់រហូតដល់ទៅ 2 ពាន់លាននាក់ហើយ “ការភ្ជាប់ទំនាក់ទំនង និងការបង្កើតនូវសមាគមន៍ជាច្រើននៅលើ Facebook ជារៀងរាល់ខែ។” ដើម្បីអបអរនៅក្នុងឱកាសនេះ Facebook បានបង្ហាញនូវមុខងារមួយចំនួន ដើម្បីដឹងគុណទៅដល់អ្នកប្រើប្រាស់ដែលនឹងដំណើរការជាច្រើនថ្ងៃផងដែរ។ លោក Mark Zuckerberg ស្ថាបនិកក្រុមហ៊ុន Facebook ក៏បានបង្ហោះសារមួយជាការដឹងគុណរបស់លោកនៅលើ Facebook ផងដែរ។
នៅក្នុងមុខងារដែលប្រព័ន្ធបណ្តាញសង្គមនេះបង្ហាញទៅកាន់អ្នកប្រើប្រាស់នោះ គឺការអបអរសាទរដ៏ពិសេសមួយដែលមានភាពសាមញ្ញ និងរីករាយបំផុត។ ក្រុមហ៊ុន Facebook ដំណើរការនូវយុទ្ធនាការ Good Adds Up ដើម្បីជួយបង្ហោះនូវសារនេះទៅកាន់សហគមន៍ និងអ្នកប្រើប្រាស់ទាំងអស់ដើម្បីចែករំលែកបន្តររឿងដ៏អស្ចារ្យនេះ។ នៅក្នុងពាក្យស្លោកថា “Good Adds Up” ក្រុមហ៊ុន Facebook ក៏បង្កើតវីដេអូសម្រាប់លោកអ្នកផងដែរដោយប្រើប្រាស់នូវរូបភាពរបស់អ្នក និងការបន្ថែមនូវរូបភាពកំប្លែងទាក់ទាញជាច្រើនទៀត បន្ថែមពីនេះទៀត អ្នកប្រើប្រាស់នឹងទទួលបានសារបង្ហោះថា “Thank you” របស់ក្រុមហ៊ុន Facebook ដោយផ្ទាល់នៅលើ News Feeds របស់ពួកគេផងដែរ បន្ទាប់ពីពួកគេចូលចិត្ត ឬស្រឡាញ់នូវសារបង្ហោះនេះដើម្បីជូនពរអ្នកណាម្នាក់នៅក្នុងឱកាសខួបកំណើត ឬការបង្កើតក្រុម ។ ក្រុមហ៊ុន Facebook នៅមិនទាន់កំណត់ចំនួនថ្ងៃនៃការប្រើប្រាស់មុខងារនេះនៅឡើយនោះទេ។
នៅក្នុងពាក់កណ្តាលឆ្នាំ 2010 វាមានអ្នកប្រើប្រាស់ 500 លាននាក់ក្នុងមួយខែ ដែលធ្វើអោយក្រុមហ៊ុន Facebook មានកំណើនលើសពី 20% ក្នុងមួយឆ្នាំ ហើយក្រុមហ៊ុននៅតែបន្តរការកើនឡើងខ្លាំងនៅក្នុងរយៈពេល 7 ឆ្នាំចុងក្រោយនេះ។ បើធៀបជាមួយនឹងបណ្តាញសង្គមដ៏ល្បីមួយទៀតគឺ YouTube មានចំនួនអ្នកប្រើប្រាស់ 1 ពាន់លាននាក់ និង Instagram មានចំនួនអ្នកប្រើប្រាស់ 700 លាននាក់៕