ស្ត្រីម្នាក់ត្រូវគេចាប់ខ្លួនពីបទព្យាយាមរត់ពន្ធ iPhone ចំនួន 102 គ្រឿងចូលទៅក្នុងប្រទេសចិនដោយរុំទូរស័ព្ទទាំងនេះភ្ជាប់នឹងរាងកាយរបស់នាង

ស្ត្រីម្នាក់ត្រូវគេចាប់ខ្លួនកាលពីថ្ងៃទី 11 ខែកក្កដានេះ ដោយមន្រ្តីគយជាច្រើននាក់នៅក្នុងទីក្រុង Shenzhen ប្រទេសចិន ដោយសារតែរូបនាងរុំព័ទ្ធទូរស័ព្ទ iPhone ទម្ងន់រហូតដល់ទៅ 40 ផោន និងនាឡិកា Tissot ដ៏ប្រណិតភ្ជាប់ទៅនឹងរាងកាយរបស់នាង និងព្យាយាមរត់ពន្ធទូរស័ព្ទទាំងនេះ ចូលក្នុងប្រទេសចិន នេះបើយោងតាមគេហទំព័រព័ត៌មានចិន XMNN ។  យោងតាមរបាយការណ៍នេះ បានឱ្យដឹងថា ស្ត្រីរូបនេះ ត្រូវបានគេចោទប្រកាន់ថាយកទូរស័ព្ទអាយហ្វូនចំនួន 102 គ្រឿង និងនាឡិកាដៃចំនួន 15 គ្រឿងដែលនាងព្យាយាមរត់ពន្ធពីហុងកុងមក។ ជាក់ស្តែង នេះគឺជាករណីនៃការរត់ពន្ធទូរស័ព្ទ iPhone ធំបំផុតដែលមន្ត្រីគយនៅក្នុងទីក្រុង Shenzhen រកឃើញនៅលើរាងកាយរបស់អ្នករត់ពន្ធ។

ជាធម្មតា មន្រ្តីគយតែងតែស្ទាក់ចាប់អ្នករត់ពន្ធ iPhone ចាប់ពី 70 ទៅ 80 គ្រឿង នេះបើយោងតាម XMNN។ ទូរស័ព្ទ iPhone មានតម្លៃខ្ពស់នៅក្នុងប្រទេសចិនដីគោកជាងនៅក្នុងទីក្រុងហុងកុង ដូច្នេះទូរស័ព្ទទាំងនេះ អាចត្រូវបានលក់សម្រាប់ការរកប្រាក់ចំណេញនៅពេលដឹកជញ្ជូនពីមួយកន្លែងទៅមួយកន្លែងទៀត។ យោងតាម XMNN ឱ្យដឹងថា ជនល្មើសរុំព័ទ្ធទូរស័ព្ទ iPhone ចំនួន 4 ស្រទាប់នៅលើរាងកាយរបស់នាង។ នាងត្រូវបានចាប់ខ្លួនដោយសារតែមន្រ្តីគយសង្ស័យនាងហាក់ដូចជាស្លៀកសម្លៀកបំពាក់ច្រើនជាងសម្លៀកបំពាក់សមរម្យសម្រាប់អាកាសធាតុក្តៅ។ មន្រ្តីគយនិយាយថាដងខ្លួនរបស់នាងហាក់ដូចជាមិនសមាមាត្រជាមួយនឹងដៃនិងជើងដ៏តូចៗរបស់នាង។

ដើម្បីបញ្ជាក់ការសង្ស័យរបស់ពួកគេ មន្រ្តីគយដាក់រូបនាងស្កែនតាមរយៈឧបករណ៍រាវដែកដែលបង្ហាញថា នាងគួរតែ "មានវត្ថុលោហៈជាច្រើន" នៅលើរូបនាង។ ទូរស័ព្ទដែលស្ត្រីនេះរត់ពន្ធទំនងជា iPhone6 ឬ iPhone 6s របស់ក្រុមហ៊ុន Apple មិនមែន iPhone 7 ដែលជាម៉ូដែលចុងក្រោយបំផុតនោះទេ។ ទូរស័ព្ទ iPhone7ប្រហែលជានឹងទទួលបានប្រាក់ចំណេញច្រើនជាងម៉ូដែលមុនៗ៕