ទូរស័ព្ទ Gionee M2017 ពេលនេះ បានទទួលនូវការបញ្ជាក់នូវវិញ្ញាបនប័ត្រពី TENAA នៅក្នុងប្រទេសចិនហើយ។ ទូរស័ព្ទនេះ មិនអាចយល់ច្រឡំគ្នាជាមួយនឹងទូរស័ព្ទបត់បាន SM-W2017 របស់ក្រុមហ៊ុន Samsung នោះទេ ព្រោះវា មានថាមពលថ្មរហូតទៅដល់ 7000mAh ដែលផ្តល់នូវការប្រើប្រាស់បានរយៈពេលយូរបំផុត។ មិនថាលោកអ្នកប្រើប្រាស់នូវទូរស័ព្ទនេះ ច្រើនកម្រិតណានោះទេ លោកអ្នកមិនចាំបាច់ព្រួយបារម្ភនោះទេ ព្រោះថាមពលថ្មនេះ អាចប្រើប្រាស់បានច្រើនជាងរយៈពេល 2 ថ្ងៃ។ ទូរស័ព្ទ Gionee M2017 បំពាក់នូវអេក្រង់ទំហំ 5.7 អ៊ីងកញ្ចក់អេក្រង់ប្រភេទ AMOLED ជាមួយនឹងកម្រិតភាពច្បាស់ 1440 x 2560 ភិចសែល។ វាប្រើប្រាស់នូវបន្ទះឈីប MediaTek Helio P10 SoC ដែលមាន CPU ចំនួន 8 គ្រាប់ដែលមានល្បឿន 1.95GHz រួមទាំង GPU ប្រភេទ Mali-T860 ថែមទៀត។
ក្រៅពីនេះវានៅមានរ៉េមផ្ទុកទិន្នន័យបណ្តោះអាសន្នទំហំ 6GB និងម៉េមូរីក្នុងម៉ាស៊ីនទំហំ 128GB ហើយវាមិនមានរន្ធដោត microSD កាតនោះទេ។ នៅផ្នែកខាងក្រោយរបស់ទូរស័ព្ទនេះមានកាមេរ៉ាទំហំ 13 មេហ្គាភិចសែល ហើយកាមេរ៉ាផ្នែកខាងមុខរបស់វាមានទំហំ 8 មេហ្គាភិចសែលសម្រាប់ធ្វើការថតរូប Selfies និងវីដេអូខល។ ប្រព័ន្ធស្កែនក្រយ៉ៅដៃត្រូវបានបង្កប់នៅត្រង់ប៊ូតុង Home ហើយប្រព័ន្ធប្រតិបត្តិការ Android 6.0.1 ត្រូវបានតម្លើងរួចជាស្រេច។ ទូរស័ព្ទនេះមានកម្រាស់ត្រឹមតែ 10.65 mm និងមានទម្ងន់ត្រឹមតែ 230 ក្រាម។ ទូរស័ព្ទ Gionee M2017 ទំនងជាមានពណ៌ដែលពេញនិយមក្នុងពេលបច្ចុប្បន្ននេះនោះគឺពណ៌ខ្មៅ។ បន្ទាប់ពីការទទួលស្គាល់នូវវិញ្ញាបនប័ត្រពី TENAA នោះ យើងប្រហែលជាមើលឃើញថាទូរស័ព្ទ Gionee M2017 នឹងធ្វើការប្រកាសបង្ហាញខ្លួននារយៈពេលដ៏ខ្លីខាងមុខនេះ៕