នេះគឺជាម៉ាស៊ីនបញ្ចាំងរូបភាព ឬហៅថា “Projector” ស៊េរីថ្មីរបស់ក្រុមហ៊ុន EPSON ដែលវាត្រូវបានក្រុមហ៊ុនធ្វើការផលិតឡើងយ៉ាងពិសេសជាមួយភាពងាយស្រួលគ្រប់យ៉ាងសម្រាប់ការប្រើប្រាស់សម្រាប់ពិធីធ្វើបទបង្ហាញ(Presentation) ផ្សេងៗរបស់ស្ថាប័នផ្សេងៗ គ្រឹះស្ថានសិក្សា ក្រុមហ៊ុន សហគ្រាស និងជាច្រើនទៀត។ ម៉ាស៊ីនបញ្ចាំងស៊េរីថ្មីនេះមានចំនុចពិសេសៗជាច្រើនដែលផ្តល់នូវភាពងាយស្រួលទាំងការប្រើប្រាស់ ទាំងការតភ្ជាប់ និងទាំងការរៀបចំដំឡើង។
1. ផលិតឡើងដើម្បីភាពងាយស្រួលប្រើប្រាស់
សម្រាប់ការរចនារូបរាងខាងក្រៅរបស់ម៉ាស៊ីនបញ្ចាំងរូបភាព Epson Projector EB-U50 នេះគឺមានភាពសាមញ្ញប៉ុន្តែបង្ហាញពីភាពរឹងមាំ និងភាពធន់សម្រាប់ការប្រើប្រាស់។ ទំហំខ្លួនទាំងមូលរបស់ម៉ាស៊ីនបញ្ចាំងរូបភាពមួយនេះគឺតូចល្មមជាមួយទំហំវិមាត្ររួម 14.3" x 9.7" x 3.7" និងទំងន់ 3 គីឡូក្រាម។
នៅផ្នែកខាងមុខរបស់វាមានភ្ជាប់នូវអំពូលសម្រាប់បញ្ចាំងរូបភាពទៅកាន់ផ្ទាំងបង្ហាញដែលជាបច្ចេកវិទ្យាអំពូល 3 LCD Technology ជាប្រភេទអំពូល Focal Length ខ្នាត 20.42 – 24.50 mm ជាមួយកម្រិត Zoom Ratio:1-1.2 ដែលមានសមត្ថភាពបញ្ចូលរូបភាពបានច្បាស់បំផុតក្នុងទំហំធំទូលាយកម្រិត WUXGA ទំហំ 1920x1200 ភិចសែលជាមួយពណ៌ និងពន្លឺភ្លឺច្បាស់ក្នុងកម្រិត 3,700 lumens of equal color/white brightness3 និងប្រើបច្ចេកវិទ្យាបង្ហាញចេញ Vivid។
សម្រាប់អំពូលបញ្ចាំងរូបភាពរបស់ Epson Projector EB-U50 ជាប្រភេទអំពូល Ultra-long Lamps Life ដែលមានភាពធន់ និងមានអាយុកាលប្រើប្រាស់បានយូរអង្វែងគឺអាចប្រើបានដល់ទៅ 10,000 ម៉ោងសម្រាប់ការប្រើលើមុខងារ Normal Mode និង 17,000 ម៉ោងនៅលើមុខងារ ECO Mode។ ចំពោះការរៀបចំដំឡើងវិញគឺមានភាពងាយស្រួលបំផុតដោយយើងអាចដាក់វាផ្ទាល់នៅលើតុ ឬចាប់ភ្ជាប់ទៅនឹងពិដានក្នុងបន្ទប់ ឬសាលប្រជុំក៏បាន។
ចំនុចពិសេសមួយទៀតសម្រាប់ម៉ាស៊ីនបញ្ចាំងរូបភាពស៊េរីថ្មីរបស់ EPSON មួយនេះគឺការភ្ជាប់មកជាមួយស្រាប់នូវឧបករណ៍បំពងសំឡេងដែលមានសមត្ថភាពបន្លឺសំឡេងចេញបានក្នុងកម្រិត 5W បែប mono sound ដូចនេះវាពិតជាល្អបំផុតសម្រាប់ពិធីធ្វើបទបង្ហាញរបស់លោកអ្នកនៅក្នុងបន្ទប់តូចល្មមដោយមិនចាំបាច់ប្រើឧបករណ៍សំឡេង (Speaker) ជំនួយខាងពីក្រៅឡើយ។
2. ផលិតឡើងដើម្បីផ្តល់នូវភាពងាយស្រួលក្នុងការតភ្ជាប់
និយាយដល់ការតភ្ជាប់សម្រាប់ឧបករណ៍បញ្ចាំងរូបភាព-វិដេអូម៉ាក Epson Projector EB-U50 វិញគឺអាចធ្វើបានតាមរបៀបច្រើនយ៉ាងតាមតម្រូវការជាក់ស្កែងរបស់យើងដូចជាការតភ្ជាប់តាមរយះរន្ធដោត HDMI ចំនួនពីរដែលទ្រទ្រង់ការបញ្ចូនរូបភាពបានច្បាស់ក្នុងកម្រិតគុណភាពខ្ពស់បំផុត, រន្ធ D-Sub 15-pin ឬ VGA ចំនួនពីរ, រន្ធ D-Sub 15-pin monitor out ចំនួនពីរ, រន្ធ USB-Type-A និង Type-B, រន្ធភ្ជាប់បណ្តាញ ប្រភេទ Ethernet RJ45, រន្ធ Audio-in ចំនួនពីរទ្រទ្រង់ជាមួយបច្ចេកវិទ្យាសំឡេងកម្រិត Mini Stereo និងរន្ធ Audio Out ដែលទ្រទ្រង់ជាមួយ Mini Stereo Speaker កំលាំង 5W។
ហើយអ្វីដែលកាន់តែពិសេសបំផុតនោះគឺវាមានភ្ជាប់នូវមុខងារ Wireless Networking ដែលផ្តល់នូវភាពងាយស្រួលបន្ថែមទៀតក្នុងការភ្ជាប់ទៅកាន់ឧបករណ៍ enterprise level-security (WPA2-PSK) ជាមួយប្រព័ន្ធ Wi-Fi ប្រភេទ 802.11g/b/n ល្បឿន 2.4 GHz ជាមួយល្បឿនបញ្ចូនទិន្នន័យបានដល់ 130Mb/s ផ្តល់នូវភាពងាយស្រួលក្នុងការភ្ជាប់ពីឧបករណ៍ផ្សេងៗដូចជាស្មាតហ្វូនជាដើមដោយមិនចាំបាច់ប្រើខ្សែ និងមានស្ថេរភាពល្បឿនបញ្ចូនរូបភាពល្អបំផុត។ ម៉ាស៊ីនបញ្ចាំងរូបភាពស៊េរីថ្មីនេះមានលទ្ធភាពទ្រទ្រង់បានជាមួយនឹងម៉ាស៊ីនកុំព្យូទ័រ ឬម៉ាស៊ីនកុំព្យូទ័រ Mac របស់ Apple ដែលមានកម្រិត Contract ratio ខ្ពស់ដល់ទៅ 16,000:1 និងកម្រិតពណ៌ដល់ទៅ 1.07 ពាន់លានពណ៌ឯណោះ។
3. ភ្ជាប់បានឧបករណ៍ 50 ក្នុងពេលតែមួយ
ហើយអ្វីដែលកាន់តែអស្ចារ្យ និងលើសពីភាពអស្ចារ្យទៅទៀតនោះគឺត្រង់ថាម៉ាស៊ីនបញ្ចាំងរូបភាព Epson Projector EB-U50 ស៊េរីថ្មីនេះ អាចអោយយើងធ្វើការភ្ជាប់បានជាមួយនឹងឧបករណ៍ផ្សេងៗបានដល់ 50 ក្នុងពេលតែមួយដែលម៉ាស៊ីន Projector ផ្សេងមិនអាចធ្វើបាន ហើយវាទ្រទ្រង់បានជាមួយនឹងឧបករណ៍ដូចជាកុំព្យូទ័រ Chromebook, Mac, PC រួមនឹងឧបករណ៍ដើរដោយ iOS និង Android ផងដែរ។ ជាមួយគ្នានេះដែរវាអាចអោយយើងធ្វើការចែករំលែកមាតិកាសម្រាប់ធ្វើបទបង្ហាញចេញពីឧបករណ៍ចំនួន 4 ក្នុងពេលដំណាលគ្នាតាមរយះកម្មវិធី Epson iProjection។ រីឯការបញ្ជា និងគ្រប់គ្រងទៅលើមាតិកាក្នុងពេលធ្វើបទបង្ហាញ (Remote Control) គឺទ្រទ្រង់ជាមួយការបញ្ជាតាមរយះការប្រើឧករណ៍បញ្ចា Crestron, AMX, និង PJLink។
ម៉ាស៊ីនបញ្ចាំងរូបភាពនេះប្រើប្រាស់ដុំភ្លើងកំលាំងចរន្ត (Voltage): 100 – 240 V AC ±10%, 50/60 មានមុខងារ Power Consumption កំលាំង 298W ពេលប្រើលើមុខងារ Normal mode និង 226W ពេលប្រើលើមុខងារ ECO Mode។
សរុបសេចក្តីមក…! Epson Projector EB-U50 គឺជាម៉ាស៊ីនបញ្ចាំងរូបភាពស៊េរីថ្មីដែលមានគុណសម្បត្តិគ្រប់គ្រាន់ និងគុណភាពល្អបំផុតសម្រាប់ការប្រើប្រាស់ក្នុងពិធីធ្វើបទបង្ហាញទាំងឡាយសម្រាប់ក្រុមហ៊ុន សហគ្រាស ស្ថាប័នផ្សេងៗ ប្រើសម្រាប់កិច្ចប្រជុំនានា និងជាពិសេសសម្រាប់ប្រើនៅក្នុងពិធីធ្វើសិក្ខាសាលាផ្សេងៗ សម្រាប់ការបង្ហាត់បង្រៀនរបស់លោកគ្រូអ្នកគ្រូ ក៏ដូចជាការធ្វើបទបង្ហាញរបស់សិស្សនិសិត្សសម្រាប់ការសិស្សរបស់ពួកគេផងដែរ៕