Huawei Honor 7x នឹងចេញដាក់លក់ក្នុងទីផ្សារសហរដ្ឋអាមេរិកឆាប់ៗនេះ ជាមួយតម្លៃសមរម្យបំផុត

កាលពីខែមុនក្រុមហ៊ុន Huawei បានប្រកាសចេញទូរស័ព្ទស្មាតហ្វូនធុនមធ្យមមួយស៊េរីក្នុងត្រកូល Honor ម៉ូដែល Honor 7x។ ស្មាតហ្វូនស៊េរីថ្មីមួយនេះ ត្រូវបានភ្ជាប់មកជាមួយនូវគុណសម្បត្តិគាប់ប្រសើរជាច្រើន សម្រាប់ការប្រើប្រាស់ដូចជា មានបំពាក់មកជាមួយនូវបន្ទះអេក្រង់បង្ហាញកម្រិត 18:9 Aspect Ratio ទំហំ 5.93 អ៊ីង។ ហើយអ្វីដែលជាសោរសម្រាប់ការវាយលុកទីផ្សារស្មាតហ្វូនអេក្រង់លាតនេះ គឺតម្លៃរបស់វាតែម្តង។ Honor 7X ត្រូវបានក្រុមហ៊ុនប្រកាសចេញលក់ក្នុងទីផ្សារប្រទេសចិនក្នុងតម្លៃប្រហែលខ្ទង់ $200 ប៉ុណ្ណោះ។ 

ថ្ងៃនេះ ក្រុមហ៊ុន Huawei ក៏បានប្រកាសថា នឹងពាំនាំទូរស័ព្ទស្មាតហ្វូនស៊េរីថ្មីមួយនេះ ទៅប្រកាសដាក់លក់ក្នុងទីផ្សារផ្សេងៗ ទៀតនៅទូទាំងពិភពលោកផងដែរ នៅក្នុងនោះរួមមានទីផ្សារក្នុងសហរដ្ឋអាមេរិក និងចក្រភពអង់គ្លេសជាដើម។ សម្រាប់ព័ត៌មាននៃកាលបរិច្ឆេទប្រកាសចេញលក់ក្នុងទីផ្សារអន្តរជាតិ និងតម្លៃរបស់វានឹងប្រកាសអោយដឹងនៅថ្ងៃទី 05 ខែធ្នូ ឆ្នាំ 2017 ខាងមុខនេះ នៅក្នុងព្រឹត្តិការណ៍ធំមួយរបស់ Huawei ហៅថា (Honor’s big event in London) ដែលប្រារព្ធធ្វើឡើងនាទីក្រុងឡុងដ៏។ 

Honor 7X គឺជាស្មាតហ្វូនធន់មធ្យមដែលបំពាក់នូវបន្ទះអេក្រង់លាតកម្រិត aspect ratio 18:9 ទំហំ 5.93 អ៊ីងប្រភេទ IPS LCD ដែលមានលទ្ធភាពបង្ហាញចេញក្នុងទំហំ 1,080x2,160px។ វាប្រតិបត្តិការលើបន្ទះឈីប Kirin 659 មានស៊ីភីយួ 8-core ប្រភេទ Cortex-A53 ល្បឿន 2.36GHz ជាមួយរ៉េមទំហំ 4GB និងអង្គផ្ទុកទិន្នន័យស្រាប់ក្នុងម៉ាស៊ីនទំហំ 32GB ហើយក៏អាចបន្ថែមទំហំម៉េមូរីក្រៅបានផងដែរ។ ចំពោះកាមេរ៉ាវាបានបំពាក់កាមេរ៉ាពីរគ្រាប់សម្រាប់កាមេរ៉ាក្រោយដែលមានទំហំ 16MP+2.0MP ជាមួយអំពូលភ្លើង LED មួយគ្រាប់ និងកាមេរ៉ាមុខទំហំ 8.0MP។ ស្មាតហ្វូននេះ បំពាក់មកជាមួយថ្មកំលាំង 3,340 mAh, ដំណើរការលើប្រតិបត្តិការ Android 7.0 Nougat និងស្រោបដោយផ្ទៃ EMUI5.1៕