កាលពីខែមុននេះ ស្មាតហ្វូនស៊េរីថ្មី OPPO F11 Pro ទទួលបានការបញ្ជាក់វិញ្ញាបនបត្រជាច្រើនពីប្រទេសមួយចំនួនដូចជាថៃ និងឥណ្ឌូនេស៊ីជាដើម។ ស្មាតហ្វូន OPPO F11 Pro នេះគឺ មានលេខម៉ូដែល CPH1969។ តាមរយៈរូបភាពបែកធ្លាយជាច្រើនដែលបានទម្លាយនៅដើមឆ្នាំនេះ បានបង្ហាញថា ស្មាតហ្វូន OPPO F11 Pro ប្រហែលជាភ្ជាប់ជាមួយនឹងកាមេរ៉ាផុសឡើង និងកាមេរ៉ាខាងក្រោយចំនួន 3 គ្រាប់ថែមទៀតផង។
នៅថ្ងៃនេះ ប្រព័ន្ធផ្សព្វផ្សាយនៅក្នុងប្រទេសឥណ្ឌា បានធ្វើការចែករំលែកនូវរូបភាព Renders របស់ស្មាតហ្វូន OPPO F11 Pro ជាមួយនឹងលក្ខណៈសម្បត្តិពិសេសមួយចំនួន។ ស្មាតហ្វូននេះ អាចនឹងបង្ហាញខ្លួននៅដើមសប្តាហ៍ទី 1 នៅខែក្រោយនេះក្នុងប្រទេសឥណ្ឌា។ រូបភាព Renders របស់ស្មាតហ្វូន OPPO F11 Pro បានបង្ហាញថា ស្មាតហ្វូននេះ នឹងមានអេក្រង់លាតពេញគែមតែម្តង ហើយស៊ុមព័ទ្ធអេក្រង់វិញពិតជាស្តើងមែនទែន។ នៅផ្នែកកណ្តាលខាងលើនៃផ្នែកខាងក្រោយ គឺមានភ្លើង LED។
ស្មាតហ្វូននេះ មានកាមេរ៉ាបញ្ឈរស្ថិតនៅកៀកទៅនឹងផ្នែកខាងលើតែម្តង។ នៅក្រោមប្រព័ន្ធកាមេរ៉ាខាងក្រោយនេះ គេសង្កេតឃើញមានប្រព័ន្ធស្កេនក្រយ៉ៅដៃ ហើយវាថែមទាំងប្រើប្រាស់នូវពណ៌ Gradient ថែមទៀត។ ស្មាតហ្វូននេះ នឹងមានច្រើនពណ៌សម្រាប់ធ្វើការជ្រើសរើសទៅតាមចិត្តរបស់អ្នក។ ស្មាតហ្វូន OPPO F11 Pro នឹងភ្ជាប់ជាមួយនឹងកាមេរ៉ាគោលទំហំ 48-megapixel ដំណើរការជាមួយនឹងសេនស័រប្រភេទ Samsung ISOCELL GM1 sensor ដែលធ្លាប់ប្រើប្រាស់នៅលើស្មាតហ្វូន Redmi Note 7 កន្លងមក។
សូមជំរាបថា សេនស័រដូចគ្នានេះ ត្រូវបានគេរំពឹងថានឹងប្រើប្រាស់នៅលើស្មាតហ្វូន Vivo V15 Pro ដែលគ្រោងនឹងបង្ហាញខ្លួនជាផ្លូវការនៅថ្ងៃទី 20 ខែកុម្ភៈខាងមុខនេះផងដែរ។ ស្មាតហ្វូន OPPO F11 Pro នឹងមានកាមេរ៉ាផុសឡើងទំហំ 32-megapixel pop-up selfie ដូចគ្នាទៅនឹងស្មាតហ្វូន Vivo V15 Pro ដែរ។ ស្មាតហ្វូននេះ មានសមត្ថភាពក្នុងការថតរូបភាពច្បាស់នៅកន្លែងដែលមានពន្លឺតិចថែមទៀតផង។ ស្មាតហ្វូនស៊េរីថ្មីនេះ ប្រហែលជាប្រើប្រាស់នូវបន្ទះឈីប MediaTek រ៉េមទំហំ 6GB និងម៉េមូរីក្នុងម៉ាស៊ីនទំហំ 128GB ។ ស្មាតហ្វូននេះអាចនឹងបង្ហាញខ្លួននៅក្នុងសប្តាហ៍ទី ១ នៃខែមីនានេះ។ ស្មាតហ្វូននេះអាចមានតម្លៃ Rs. 25,000 (~$350) នៅក្នុងប្រទេសឥណ្ឌា៕