កាលពីប៉ុន្មានថ្ងៃមុននេះ ក្រុមហ៊ុន Samsung ទើបតែបង្ហាញអំពីព័ត៌មានថេប្លេត Android របស់ខ្លួនជាមួយនឹងការប្រកាសថា ក្រុមហ៊ុនបច្ចេកវិទ្យារបស់ប្រទេសកូរ៉េខាងត្បូងមួយនេះ អាចនឹងបញ្ចេញនូវថេប្លេតស៊េរីថ្មី Galaxy Tab A 10.1 ជំនាន់ថ្មីឆ្នាំ 2019 នៅក្នុងទីផ្សាររយៈពេលប្រហែលជា 2 ខែទៀត។ ថ្មីៗនេះ ក៏មានការលើកឡើងដែរថា ថេប្លេតស៊េរីថ្មីនេះ នឹងបង្ហាញវត្តមានជាមួយនឹងថេប្លេត Galaxy Tab S5e ជាផ្លូវការនៅក្នុងប្រទេសអាល្លឺម៉ង់ នឹងនៅក្នុងប្រទេសមួយចំនួនទៀតនៅក្នុងអ៊ឺរ៉ុបថែមទៀតផង។
ខុសប្លែកពីថេប្លេត Galaxy Tab S5e ដែលយើងធ្លាប់ដឹងហើយនោះ ថេប្លេត Galaxy Tab A 10.1 ជំនាន់ថ្មី 2019 នឹងមិនមានតម្លៃថ្លៃអោយអ្នកចំណាយលុយច្រើន ដើម្បីទិញនោះទេ ពោលគឺតម្លៃសមរម្យ។ នៅលើថេប្លេតនេះ នឹងមានម៉េមូរីពាក់កណ្តាលបើធៀបជាមួយនឹងថេប្លេត Galaxy Tab S5e ដែលមានរ៉េមទំហំ 2GB និងម៉េមូរីទំហំ 32GB (អាចបន្ថែម microSD Card ទំហំដល់ទៅ 400GB)។ ក្រុមហ៊ុន Samsung បានសម្រេចចិត្តក្នុងការប្រើប្រាស់នូវបន្ទះឈីប Exynos 7904។ សម្រាប់បន្ទះឈីបនេះ គឺមានអង្គគណនាចំនួន 8 ដូចគ្នាទៅនឹងបន្ទះឈីប Galaxy Tab S5e's Snapdragon 670 SoC ប៉ុន្តែសមត្ថភាពរបស់វានៅមិនទាន់ខ្លាំងក្លានៅឡើយទេ។
ថេប្លេត Galaxy Tab A 10.1 ជំនាន់ថ្មី 2019 នេះមានអេក្រង់ទំហំ 10.1-inch ជាមួយនឹងកម្រិតភាពច្បាស់ 1920x1200 px ប៉ុន្តែនេះមិនមែនជាអេក្រង់ Super AMOLED នោះទេ។ បន្ថែមពីនេះទៀត ថេប្លេតនេះ អនុញ្ញាតអោយអ្នកប្រើប្រាស់ធ្វើការថតរូបភាពជាមួយនឹងកាមេរ៉ាខាងក្រោយទំហំ 8MP និងកាមេរ៉ាខាងមុខទំហំ 5MP។ ថេប្លេតនេះដំណើរការនូវប្រព័ន្ធប្រតិបត្តិការ Android 9 Pie និងមានថាមពលថ្មដែលមានទំហំ 6150 mAh តូចជាងថេប្លេត Galaxy Tab S5e។ សម្រាប់ Galaxy Tab A 10.1 មានពីរជម្រើសគឺ Wi-Fi និង LTE ។ ថេប្លេតនេះមានតួខ្លួនធ្វើពីលោហធាតុ ដែលធ្វើអោយអ្នកមានអារម្មណ៍ប្រណិតបំផុតក្នុងការប្រើប្រាស់។
បើនិយាយអំពីតម្លៃ និងកាលបរិច្ឆេទរបស់ថេប្លេតនេះ Samsung Galaxy Tab A 10.1 អាចរកទិញបានជាមួយនឹងតម្លៃ €210 (Wi-Fi) និង €270 (LTE)។ ថេប្លេតនេះ នឹងដាក់លក់ជាមួយនឹង 3 ពណ៌សម្រាប់ធ្វើការជ្រើសរើសគឺពណ៌ខ្មៅ ពណ៌មាស និងពណ៌ទឹកប្រាក់។ Samsung ប្រកាសថា អតិថិជនជាច្រើនអាចធ្វើការកម្មង់ទិញមុនទៅលើថេប្លេត 2019 Galaxy Tab A 10.1 ចាប់ពីថ្ងៃទី 14 ខែមីនាដល់ថ្ងៃទី 4 ខែមេសាខាងមុខនេះ។ សម្រាប់អតិថិជនដែលធ្វើការកម្មង់ទិញមុនទៅលើថេប្លេត Galaxy Tab S5e នៅក្នុងអំឡុងពេលនេះនឹងទទួលបានកាសស្តាប់ AKG Headphones Y500 ពណ៌ខៀវដោយឥតគិតថ្លៃ។
មានការលើកឡើងថា ចាប់ផ្តើមពីថ្ងៃទី 5 ខែមេសាខាងមុខនេះ ក្រុមហ៊ុន Samsung នឹងដាក់លក់នូវ Covers ផ្សេងៗគ្នា និងជើងទម្រ POGO stand សម្រាប់ថេប្លេតទាំងពីរនេះផងដែរ។ ដូចដែលបានលើកឡើងកាលពីពេលមុននេះ ថេប្លេត Galaxy Tab A 10.1 ជំនាន់ថ្មី 2019 នឹងចាប់ផ្តើមដាក់លក់នៅក្នុងប្រទេសអាល្លឺម៉ង់ ប៉ុន្តែវាក៏នឹងដាក់លក់នៅក្នុងប្រទេសមួយចំនួនទៀតផងដែរ។ ថេប្លេត Galaxy Tab A ជាច្រើនទៀតរបស់ក្រុមហ៊ុន Samsung អាចរកទិញបាននៅក្នុងសហរដ្ឋអាមេរិកផងដែរ៕
