គិតត្រឹមពេលនេះ ស្មាតហ្វូនស៊េរីថ្មី Samsung Galaxy S10 series បានចាប់ផ្តើមដាក់លក់ជាផ្លូវការហើយ។ ថ្មីៗនេះ ស្មាតហ្វូននេះបំបែកនូវកំណត់ត្រានៃការកម្មង់ទិញមុនទាំងនៅក្នុងសហរដ្ឋអាមេរិក និងចក្រភពអង់គ្លេស។ ស្មាតហ្វូននេះ ក៏មានការចាប់អារម្មណ៍យ៉ាងខ្លាំងពីអ្នកប្រើប្រាស់នៅក្នុងប្រទេសចិនជាច្រើនផងដែរ។ តាមការបញ្ជាក់អំពីប្រភពឧស្សាហកម្មខាងក្នុងនេះ បានបញ្ជាក់ថា សម្រាប់តួរលេខនៃការលក់ស្មាតហ្វូននេះគឺពិតជាគួរអោយភ្ញាក់ផ្អើលខ្លាំងមែនទែន។
នៅចុងខែមិថុនាខាងមុខនេះ ស្មាតហ្វូនស៊េរីថ្មីចុងក្រោយបំផុតរបស់ក្រុមហ៊ុន Samsung នេះ ត្រូវបានគេរំពឹងថា នឹងមានការនាំចេញរហូតដល់ទៅ 20 លានគ្រឿង។ ក្រុមហ៊ុនអ្នកដឹកជញ្ជូនជាច្រើនត្រូវបានវគេរំពឹងថា ការនាំចេញគឺមានរហូតដល់ទៅ 10 លានគ្រឿងនៅក្នុងខែនេះផងដែរ។ សម្រាប់ 10 លានគ្រឿងទៀត អាចនឹងត្រូវចែកចាយចាប់ពីខែមេសា ដល់ខែមិថុនានោះ។ បើធ្វើការប្រៀបធៀបនូវតួរលេខនៃការព្យាករណ៍នេះ ជាមួយនឹងស្មាតហ្វូនជំនាន់មុននោះ ស្មាតហ្វូន Galaxy S9/S9+ គឺលក់បានចំនួនដល់ទៅ 19.2 លានគ្រឿងនៅក្នុងអំឡុងពេលឆមាសទី 1 ឆ្នាំ 2018 នេះ មានន័យថា ប្រសិនបើស្មាតហ្វូនស៊េរីថ្មី Galaxy S10 series នេះ ដំណើរការល្អដូចការរំពឹងទុកនោះ វាអាចនឹងមានចំនួនច្រើនជាងស្មាតហ្វូនជំនាន់មុនដល់ទៅ 1 លានគ្រឿង។
នៅត្រឹមចុងឆ្នាំ 2019 នេះ អ្នកវិភាគ Ming-Chi Kuo ថ្មីៗនេះ ក៏វិភាគថា ការលក់ស្មាតហ្វូននេះ អាចមានចំនួនពី 40 ទៅ 45 លានគ្រឿង។ ប្រសិនបើនេះគឺជាការពិតនោះ វាគឺជាលើកដំបូងបំផុតរបស់ក្រុមហ៊ុនបច្ចេកវិទ្យា Samsung ដែលសម្រេចនូវការលក់បានច្រើនជាង 40 លានគ្រឿងចាប់តាំងពីឆ្នាំ 2016 នៅពេលដែលក្រុមហ៊ុននេះ បានបង្ហាញនូវស្មាតហ្វូនត្រកូល Galaxy S7 series ដែលមានការពេញនិយមខ្លាំងជាមួយនឹងការនាំចេញរហូតដល់ទៅ 48.7 លានគ្រឿងនៅចុងឆ្នាំនោះ។
សម្រាប់ការប្រកួតប្រជែងនេះ ក្រុមហ៊ុន Huawei គ្មានអាថ៌កំបាំងនោះទេក្នុងការបង្ហាញអំពីគម្រោងជាច្រើនរបស់ខ្លួនក្នុងការយកឈ្នះក្រុមហ៊ុន Samsung នៅឆ្នាំក្រោយនេះ។ សម្រាប់ស្មាតហ្វូនជំនាន់ថ្មីនេះ ហាក់ដូចជាក្រុមហ៊ុនបច្ចេកវិទ្យាយក្សរបស់ចិននេះ ពិតជាមានមហិច្ឆិតាខ្លាំងក្លាមែនទែន។ បើធ្វើការប្រៀបធៀបវិញនោះ ស្មាតហ្វូនស៊េរីថ្មី Huawei Mate 20 series នេះចំណាយពេលវេលាដល់ទៅ 4.5 ខែសម្រាប់ការនាំចេញស្មាតហ្វូនចំនួន 10 លានគ្រឿង ខណៈពេលដែលស្មាតហ្វូន Galaxy S10 Series នេះ ត្រូវបានគេរំពឹងថា នឹងសម្រេចនូវគោលដៅនេះនៅក្នុងរយៈពេលតែ 3 សប្តាហ៍នោះ៕
