Xiaomi បញ្ចេញនូវកង់អេឡិចត្រូនិចស៊េរីថ្មីរបស់ខ្លួនមានសមត្ថភាពពិសេសអាចបត់បានទំហំប៉ុនក្រដាស A3 ប៉ុណ្ណោះ

នៅពេលនេះ ក្រុមហ៊ុនខ្សែសង្វាក់ផ្គត់ផ្គង់ផ្នែកអេកូឡូស៊ី Himo របស់ក្រុមហ៊ុន Xiaomi គឺកំពុងតែមានទទួលបានការពេញនិយមខ្លាំងជាមួយនឹងផលិតផលជាច្រើនរបស់ខ្លួន ពិសេស គឺកង់អេឡិចត្រូនិច។ កាលពីពេលថ្មីៗនេះ ក្រុមហ៊ុនបច្ចេកវិទ្យានេះ ទើបតែបង្ហាញនូវកង់ដែលអាចបត់បានរបស់ខ្លួនដែលប្រើប្រាស់នូវប្រព័ន្ធអេឡិចត្រូនិចឈ្មោះហៅថា Himo H1។ នេះគឺម៉ូឌែលដែលមានរូបរាងតូចងាយស្រួលដាក់តាមខ្លួនបំផុតចាប់តាំងពីក្រុមហ៊ុននេះធ្លាប់ផលិតមក។ កង់នេះ អាចធ្វើការបត់បានជាមួយនឹងទំហំប៊ុនក្រដាស A3 ហើយវាមានទម្ងន់ត្រឹមតែ 13 គីឡូក្រាមតែប៉ុណ្ណោះ។

នៅក្នុងប្រអប់នេះ គឺមានកង់អេឡិចត្រូនិចដែលអាចបត់បាន សៀវភៅការណែនាំ ឆ្នាំងសាកថាមពល និង accessories ជាច្រើនទៀត។ សម្រាប់កង់អេឡិចត្រូនិចនេះគឺងាយស្រួលក្នុងការផ្គុំមែនទែន។ អ្នកដែលអ្នកត្រូវធ្វើនោះគឺពន្លារវា សាកថ្ម និងប្រើប្រាស់វាតែម្តង។ នៅពេលដែលបត់កង់នេះវាមានទំហំប៉ុនក្រដាស A3 ។ សម្រាប់កម្ពស់ទៅលើដៃកាន់របស់កង់នេះគឺអាចធ្វើការកែប្រែបានទៅតាមចំណង់ចំណូលចិត្តរបស់អ្នកប្រើប្រាស់។ វាក៏មានបន្ទះអេក្រង់ LED Display សម្រាប់ប្រាប់ព័ត៌មានជាច្រើនដូចជាល្បឿននៅក្នុងការបើកបរ និងថាមពលថ្មផងដែរ។

កង់អេឡិចត្រូនិចដែលអាចបត់បាន Himo H1 នេះ គឺមានការឌីស្សាញរូបរាងយ៉ាងស្រស់ស្អាតជាមួយនឹងការប្រើប្រាស់នូវម៉ូទ័រដែលមានកម្លាំង 180W DC ជាមួយនឹងកម្លាំង 36V។ កង់អេឡិចត្រូនិចនេះអាចធ្វើការដោះថាមពលថ្មចេញបានដែលស្ថិតនៅក្រោមកែបរបស់វានោះ។ ថាមពលថ្មនេះមានទំហំ 6000mAh ដែលត្រូវការពេល 5 ម៉ោងដើម្បីបញ្ចូលពេញ ហើយវាអាចប្រើប្រាស់បានរយៈពេល 2 ឆ្នាំ។ សម្រាប់ល្បឿនលឿនបំផុតរបស់កង់នេះគឺ 18km/h ៕