កាលពីប៉ុន្មានខែមុនេះ ក្រុមហ៊ុន Huawei បានបង្ហាញនូវស្មាតហ្វូន flagship របស់ខ្លួនដែលមានឈ្មោះហៅថា Mate 30 Pro នៅក្នុងទីផ្សាររបស់អ៊ឺរ៉ុប។ នៅថ្ងៃនេះ ក្រុមហ៊ុនបច្ចេកវិទ្យាយក្សរបស់ចិននេះ ក៏បន្តធ្វើការពង្រីកវត្តមានរបស់ស្មាតហ្វូននេះទៅកាន់តំបន់ជាច្រើនទៀតនៅក្នុងអ៊ឺរ៉ុបផងដែរ។ តាមការបញ្ជាក់របស់របាយការណ៍ថ្មីៗនេះ ចេញពី HuaweiCentral បានអោយដឹងថា ស្មាតហ្វូននេះ គឺនឹងបង្ហាញខ្លួននៅក្នុងប្រទេសចំនួន 2 ទៀតនោះគឺប្រទេសរ៉ូម៉ានី និងប៉ូឡូញ។
នៅក្នុងប្រទេសរ៉ូម៉ានី ស្មាតហ្វូនMate 30 Pro នេះគឺមានតម្លៃ 4,799 LEI ($1,113)។ ស្មាតហ្វូននេះ ចាប់ផ្តើមទទួលនូវការ Pre-order ផងដែរ។ ក្រុមហ៊ុនបច្ចេកវិទ្យានេះ ក៏ធ្វើការថែមជូននូវកាសស្តាប់ឥតខ្សែ FreeBuds 3 wireless headphones សម្រាប់អតិថិជនដែលធ្វើការបញ្ជាទិញមុនស្មាតហ្វូននេះចាប់ពីថ្ងៃទី 15 ដល់ថ្ងៃទី 29 ខែមករានេះផងដែរ។ នៅក្នុងប្រទេសប៉ូឡូញ ស្មាតហ្វូននេះគឺមានតម្លៃ 4,299 PLN ($1,124)។ ដូចគ្នាទៅនឹងទីផ្សាររបស់ប្រទេសរ៉ូម៉ានីផងដែរ ក្រុមហ៊ុនបច្ចេកវិទ្យានេះនឹងមានការថែមជូននូវកាសស្តាប់ឥតខ្សែដូចទៅនឹងប្រទេសប៉ូឡូញផងដែរ។ កាន់តែពិសេសជាងនេះទៀតនោះ ក្រុមហ៊ុនបច្ចេកវិទ្យានេះក៏មានការថែមជូននូវសេវាកម្ម VIP service និងនាឡិកា Huawei Band 4 នៅក្នុងតម្លៃប្រម៉ូសិនដ៏ពិសេសថែមទៀតផង។
ស្មាតហ្វូនស៊េរីថ្មី Mate 30 Pro នេះ មានអេក្រង់ដែលមានទំហំ 6.53-inch AMOLED កោងជាមួយនឹងកម្រិតភាពច្បាស់ 1176×2400 pixels និងដង់ស៊ីតេ 409 PPI ។អេក្រង់របស់ស្មាតហ្វូននេះមានភ្ជាប់ជាមួយនឹងnotch តូចមួយនៅលើអេក្រង់របស់វា ហើយផ្នែកខាងក្រោមនៃអេក្រង់នេះពិតជាតូចមែនទែនដែលធ្វើអោយអេក្រង់របស់វាមានទំហំដល់ទៅ 94.1% ។ បើនិយាយអំពីការការពារវិញនោះ ស្មាតហ្វូននេះប្រើប្រាស់ជាមួយនឹងកញ្ចក់ការពារប្រភេទ Corning Gorilla Glass 6 ហើយនឹងដំណើរការជាមួយនឹងបន្ទះឈីបHiSilicon Kirin 990 chipset ជាមួយនឹង 8GB RAM និងម៉េមូរីទំហំ 256GB storage ថែមទៀតផង ។
ស្មាតហ្វូនស៊េរីថ្មីនេះមានភ្ជាប់ជាមួយនឹងកាមេរ៉ា 4 គ្រាប់ដែលមានទំហំ 40MP primary sensor, 8MP telephoto lens, 40MP ultrawide angle lens និង 3D TOF ។ សម្រាប់ការថតរូបភាព Selfie វិញនោះ ស្មាតហ្វូននេះ មានកាមេរ៉ាភ្លោះខាងមុខដែលមានទំហំ 30MP+3D TOF ថែមទៀត។ ស្មាតហ្វូននេះមានភ្ជាប់ជាមួយនឹងថាមពលថ្មដែលមានទំហំ 4,500mAh ជាមួយនឹងបច្ចេកវិទ្យាបញ្ចូលថាមពលថ្មលឿន 40W fast charging តាមរយៈរន្ធដោត USB Type-C និងបច្ចេកវិទ្យាបញ្ចូលថាមពលថ្មឥតខ្សែ 27W wireless charging ថែមទៀត។ ស្មាតហ្វូននេះ ដំណើរការនូវ EMUI 10 ដែលផ្អែកនៅលើប្រព័ន្ធប្រតិបត្តិការ Android 10។ សម្រាប់លក្ខណៈសម្បត្តិជាច្រើនទៀតរបស់ស្មាតហ្វូននេះ គឺមានដូចជា reverse wireless charging បច្ចេកវិទ្យាស្កេនក្រយ៉ៅដៃអុបទិកនៅលើអេក្រង់ ប្រព័ន្ធ Bluetooth 5.1, NFC និង Infrared sensor ថែមទៀតផង៕