ក្រុមហ៊ុនបច្ចេកវិទ្យាយក្ស Samsung ទើបតែបង្ហាញជាផ្លូវការនូវការដាក់លក់ស្មាតហ្វូនត្រកូល Galaxy A Series 2019 របស់ខ្លួននៅក្នុងប្រទេសកាណាដា។ សម្រាប់ស្មាតហ្វូនថ្នាក់កណ្តាលរបស់ក្រុមហ៊ុន Samsung នេះនឹងដាក់លក់នៅទូទាំងប្រទេសនេះ នៅថ្ងៃទី 7 ខែមិថុនាឆ្នាំ 2019 នេះ។ សម្រាប់ស្មាតហ្វូនដែលនឹងដាក់លក់នៅក្នុងប្រទេសកាណាដានេះ គឺមានដូចជា Galaxy A20, Galaxy A50 និង Galaxy A70 ។ ទោះជាយ៉ាងណាក៏ដោយនោះ ក្រុមហ៊ុន Samsung ប្រហែលជានាំយកនូវស្មាតហ្វូន Galaxy A Series 2019 ជាច្រើនស៊េរីទៀតចូលទៅក្នុងប្រទេសកាណាដាដូចជា Galaxy A80 ជាដើម។
ក្រុមហ៊ុន Samsung បានបង្ហាញនូវស្មាតហ្វូនត្រកូល Galaxy A Series ជាច្រើននៅក្នុងឆ្នាំនេះដែលជាស្មាតហ្វូនថ្នាក់កណ្តាលរបស់ខ្លួន។ ស្មាតហ្វូនទាំងនេះទទួលបានជោគជ័យខ្លាំងក្លានៅក្នុងទីផ្សារជាច្រើននៃប្រទេសឥណ្ឌា។ ក្រុមហ៊ុនបច្ចេកវិទ្យានេះក៏ត្រៀមនាំយកនូវស្មាតហ្វូននេះទៅកាន់អាមេរិកខាងជើងផងដែរ។ ស្មាតហ្វូន Galaxy A20, A50 និង A70 នឹងមកដល់ប្រទេសកាណាដានៅចុងសប្តាហ៍នេះបន្ទាប់ពីចូលទៅក្នុងទីផ្សាររបស់អាមេរិករួចមក។
Galaxy A20 គឺជាស្មាតហ្វូនដែលមានតម្លៃថោកជាងគេនៅក្នុងចំណោមស្មាតហ្វូនទាំង ៣ នេះដែលមានអេក្រង់ទំហំ 6.4-inch HD+ Super AMOLED Infinity-V display ថាមពលថ្ម 4,000mAh ជាមួយនឹងបច្ចេកវិទ្យា 15W fast charging និងកាមេរ៉ាភ្លោះផងដែរ។ វាប្រើប្រាស់នូវបន្ទះឈីប Exynos 7884 SoC រួមជាមួយនឹងរ៉េមទំហំ 3GB និងម៉េមូរីក្នុងម៉ាស៊ីនទំហំ 32GB ។ ស្មាតហ្វូន Galaxy A50 ដែលជាស្មាតហ្វូនថ្នាក់កណ្តាលរបស់ក្រុមហ៊ុន Samsung គឺជាស្មាតហ្វូនដំបូងបំផុតដែលភ្ជាប់ជាមួយនឹងសេនស័រអុបទិកស្កេនក្រយ៉ៅដៃក្រោមអេក្រង់នោះ។ វាមានអេក្រង់ទំហំ 6.4-inch FHD+ Super AMOLED Infinity-U display ថាមពលថ្មទំហំ 4,000mAh ជាមួយនឹងបច្ចេកវិទ្យា 15W fast charging ដូចគ្នាទៅនឹងស្មាតហ្វូន Galaxy A20 ផងដែរ។ ស្មាតហ្វូននេះប្រើប្រាស់នូវបន្ទះឈីប Exynos 9610 chipset ជាមួយរ៉េមទំហំ 4GB និង 64GB ។ ស្មាតហ្វូន Galaxy A50 ក៏មានភ្ជាប់ជាមួយនឹងកាមេរ៉ាខាងក្រោយ ៣ គ្រាប់ផងដែរ។
ស្មាតហ្វូន Galaxy A70 មានអេក្រង់ធំទំហំដល់ទៅ 6.7-inch FHD+ Super AMOLED Infinity-U display និងថាមពលថ្ម 4,500mAh ជាមួយនឹងបច្ចេកវិទ្យា 25W fast charging ។ ស្មាតហ្វូននេះប្រើប្រាស់នូវបន្ទះឈីប Snapdragon 675 SoC និងរ៉េមទំហំ 6GB និង 128GB ។ ស្មាតហ្វូននេះប្រើប្រាស់នូវប្រព័ន្ធស្កេនក្រយ៉ៅដៃក្រោមអេក្រង់អុបទិកជាមួយនឹងកាមេរ៉ាគោល 32MP នៅខាងក្រោយ។ ក្រុមហ៊ុនបច្ចេកវិទ្យាយក្ស Samsung បញ្ចេញនូវតម្លៃសម្រាប់ស្មាតហ្វូន Galaxy A20, Galaxy A50 និង Galaxy A70 ដែលមានតម្លៃរៀងគ្នា $349.99, $449.99 និង $629.99 នៅក្នុងប្រទេសកាណាដានោះ។ ស្មាតហ្វូន Galaxy A20 និង Galaxy A70 គឺមានពណ៌ខ្មៅ ខណៈពេលដែលស្មាតហ្វូន Galaxy A50 មានពណ៌ខ្មៅ និងពណ៌ស។ ស្មាតហ្វូននេះអាចរកទិញបាននៅក្នុង Samsung Experience Stores, Samsung e-store ក្រុមហ៊ុនចែកចាយទូទាំងប្រទេស និងក្រុមហ៊ុនលក់រាយជាច្រើនទៀតចាប់ពីថ្ងៃទី 7 ខែមិថុនានេះ៕
