នៅទីបំផុតស្មាតហ្វូនស៊េរីថ្មីដែលអាចបត់បាន Samsung Galaxy Fold បង្ហាញខ្លួននៅលើទីផ្សារហើយ ជាពិសេសពេលនេះ Zack ដែលមកពី JerryRigEverything ក៏ចាប់ផ្តើមធ្វើតេស្ត៍ទៅលើភាពខ្លាំងរបស់ស្មាតហ្វូនដែលអាចបត់បានជំនាន់ទី 2 របស់ Samsung នេះ។ សម្រាប់អេក្រង់ផ្នែកខាងក្រៅទំហំ 4.6 អ៊ីង ធ្វើតេស្ត៍ទៅលើភាពឆ្កូតរបស់វានៅក្នុងកម្រិតទី 6 ទើបឃើញមានស្នាម ខណៈពេលដែលអេក្រង់គោលរបស់វាទំហំ 7.3 អ៊ីង polymer នេះ មានស្នាមឆ្កុតនៅក្នុងកម្រិតទី 2 តែប៉ុណ្ណោះនៅក្នុងការធ្វើតេស្ត៍នេះ។ តាមការបង្ហាញក្នុងវីដេអូននេះ បន្ទះអេក្រង់របស់ស្មាតហ្វូននេះ ក៏ងាយស្រួលក្នុងការឆ្កូតផងដែរត្រឹមតែក្រចករបស់អ្នកប្រើប្រាស់តែប៉ុណ្ណោះ។
បើនិយាយទៅលើត្រចៀកបត់សម្រាប់ស្មាតហ្វូន Galaxy Fold នេះ គឺមានការឌីស្សាញកាន់តែល្អជាងមុន ហើយវាមិនងាយស្រួលក្នុងការចូលធូលីនោះទេ។ សម្រាប់ផ្នែកចំហៀង ប៊ូតុង និងត្រចៀកបត់របសស្មាតហ្វូននេះគឺផលិតឡើងពីលោហធាតុ ខណៈពេលដែលផ្នែកខាងក្រោយរបស់ស្មាតហ្វូននេះគឺធ្វើឡើងពីកញ្ចក់ដ៏រឹងមាំបំផុត។ អ្វីដែលគួរអោយចាប់អារម្មណ៍នោះ អេក្រង់ផ្លាស្ទិករបស់ស្មាតហ្វូននេះគឺឆ្លងកាត់នូវការធ្វើតេស្តទៅលើការដុតបានយ៉ាងរលូនទោះបីជាព្យាយាមជាច្រើនដងក៏ដោយ។ ជាចុងក្រោយនេះ យើងឃើញមានការធ្វើតេស្តទៅលើការបត់ស្មាតហ្វូននេះ។
ទោះបីជាមានការបត់ខ្លាំងយ៉ាងណាក៏ដោយនោះ ស្មាតហ្វូននេះ យើងមិនអាចធ្វើអោយមានបញ្ហានៅលើអេក្រង់នេះទេ។ ការខូចខាតដែលអាចមើលឃើញតែមួយគត់នៅលើស្មាតហ្វូននេះ គឺមានស្នាមប្រេះទៅលើខ្សែបន្ទាត់អង់តែនផ្លាស្ទិករបស់វា។ នៅក្នុងការធ្វើតេស្តទៅលើរន្ធប្រហោងនៅលើអេក្រង់ជាមួយនឹងកាំបិតនោះ គេសង្កេតឃើញថាពាក់កណ្តាលនៃអេក្រង់របស់ស្មាតហ្វូននេះគឺមិនអាចដំណើរការបាននោះទេ៕