កាលពីដើមសប្តាហ៍នេះ ក្រុមហ៊ុន OPPO បានបង្ហាញនូវស្មាតហ្វូន ដែលអាចបត់បានរបស់ខ្លួន គឺស្មាតហ្វូន OPPO X 2021។ ប៉ុន្តែក្រុមហ៊ុនផលិតស្មាត ហ្វូននេះ នៅមិនទាន់ប្រកាសចេញនូវរូបរាងផ្លូវការណ៍របស់ស្មាតហ្វូននេះនៅឡើយទេ គ្រាន់តែមានការទម្លាយនូវគំរូរបស់វាតែប៉ុណ្ណោះ។ ក្រុមហ៊ុននេះ បាននិយាយថា ស្មាតហ្វូននេះ គឺពិតជារឹងមាំមែនទែនក្នុងការប្រើប្រាស់។
នៅក្នុងការធ្វើបទបង្ហាញនេះ លោក Jin Xiang ដែលជាវិស្វករផ្នែកឌីស្សាញរបស់ក្រុមហ៊ុននេះ បាននិយាយអំពីស្មាតហ្វូន OPPO X 2021 ថា ស្មាតហ្វូននេះ បានឆ្លងកាត់នូវការធ្វើតេស្តជាច្រើន ហើយលទ្ធផលវិញនោះ ពិតជាល្អមិនធម្មតានោះទេ។ គាត់បង្ហាញថា ស្មាតហ្វូននេះ បានឆ្លងកាត់នូវការធ្វើតេស្តចំនួន 1 សែនដងទៅលើការបិទ និងបើករបស់វាដោយគ្មានបញ្ហានោះទេ។
ប្រធានផ្នែក Hardware របស់ក្រុមហ៊ុន OPPO បាននិយាយបន្ថែមថាលទ្ធផលនេះមិនមែនត្រឹមតែប៉ុណ្ណោះទេ។ ប្រសិនបើអ្នកបិទ និងបើកអេក្រង់របស់ស្មាតហ្វូននេះ 50 ដងក្នុងមួយថ្ងៃនោះ ស្មាតហ្វូននេះ គឺមិនមានបញ្ហានោះទេ ក្នុងការប្រើប្រាស់រយៈពេល 5 ឆ្នាំ។ សូមជំរាបថា ស្មាតហ្វូន OPPO X 2021 នៅមិនទាន់ដាក់លក់ទេ វាអាចនឹងបង្ហាញខ្លួននៅចុងឆ្នាំ 2021 ខាងមុខនេះ។ ស្មាតហ្វូននេះ មានអេក្រង់ប្រភេទ BOE OLED ដែលមានការបង្កើនទៅលើកម្រិតនៃការទស្សនាពី 6.7 អ៊ីង ទៅ 7.4 អ៊ីង ៕
