បន្ទាប់ពីមានការប្រកួតប្រជែងទៅលើអេក្រង់អស់រយ់ពេលច្រើនឆ្នាំមក ពេលនេះ ក្រុមហ៊ុនផលិតស្មាតហ្វូនជាច្រើនកំពុងតែធ្វើការឌីស្សាញរូបរាងថ្មីនិងគំនិតថ្មី ក៏ដូចជាមុខងារថ្មីៗជាច្រើនសម្រាប់ស្មាតហ្វូនរបស់ខ្លួន។ ថ្មីៗនេះ ស្មាតហ្វូន ដែលមានអេក្រង់អាចបត់បានជាច្រើន ក៏បានក្លាយជាការពេញនិយមផងដែរ ដោយសារតែស្មាតហ្វូននេះ គឺមានអេក្រង់ច្រើនជាង 1។
នៅថ្ងៃនេះ យោងតាមការទម្លាយចេញពី ‘Digital Chat Station’ បានអះអាងថា នឹងមានស្មាតហ្វូនចំនួន 2 ដែលនឹងបង្ហាញខ្លួននៅឆ្នាំនេះ ដែលនឹងមានអេក្រង់ទី 2 នៅផ្នែកខាងក្រោយរបស់ស្មាតហ្វូននេះ។ ថ្មីៗនេះ ស្មាតហ្វូន Mi 11 Ultra របស់ក្រុមហ៊ុន Xiaomi ក៏មានការបែកធ្លាយនៅលើអនឡាញ ហើយរូបភាពរបស់ស្មាតហ្វូននេះ មានការបង្ហាញនូវអេក្រង់ទី 2 ដែលស្ថិតនៅកន្លែងកាមេរ៉ាផ្នែកខាងក្រោយរបស់ស្មាតហ្វូននេះ។
យើងបានឃើញស្មាតហ្វូនមួយចំនួនផងដែរ កាលពីមុនដេលមានកាមេរ៉ាទី 2 ដែលមានការបង្ហាញនូវព័ត៌មានមួយចំនួនដូចជាសាររំលឹក ពេលវេលា អាកាសធាតុ និងមុខងារថ្មីៗជាច្រើនទៀត។ កាលពីប៉ុន្មានឆ្នាំមុននេះ ក្រុមហ៊ុន Meizu បានបង្ហាញនូវស្មាតហ្វូន Meizu Pro 7 ដែលមានអេក្រង់ទី 2 នៅផ្នែកខាងក្រោយរបស់ស្មាតហ្វូននេះផងដែរ។ វាពិតជាគួរអោយចាប់អារម្មណ៍មែនទែននៅពេលដែលក្រុមហ៊ុន Xiaomi មានគម្រោងសម្រាប់ប្រើប្រាស់នូវអេក្រង់ទី 2 នៅលើស្មាតហ្វូន Mi 11 Ultra នេះ។
ស្មាតហ្វូន Mi 11 Ultra នេះ គឺនឹងបង្ហាញខ្លួននៅឆ្នាំក្រោយនេះ ដូចនេះ យើងនឹងរង់ចាំរយៈពេលជាច្រើនសប្តាហ៍ទៀតដើម្បីដឹងកាន់តែច្បាស់អំពីស្មាតហ្វូននេះ។ កាលពីឆ្នាំមុននេះ ក្រុមហ៊ុន Huawei ក៏មានប៉ាតង់ទៅលើការឌីស្សាញស្មាតហ្វូនដែលមានអេក្រង់ទី 2 នៅផ្នែកខាងក្រោយរបស់ស្មាតហ្វូននេះ ជាមួយនឹងកាមេរ៉ាផងដែរ៕