បើតាមប្រភពព័ត៌មានចេញពីបុគ្គលមួយរូបដែលស្និតទៅនឹងក្រុមហ៊ុន Apple បានបង្ហើបអោយដឹងថា ក្រុមហ៊ុនបិតាបច្ចេកវិទ្យា Cupertino សហរដ្ឋអាមេរិកមួយនេះ នឹងប្រកាសចេញនូវឧបករណ៍បន្ទះស្តើងជំនាន់ថ្មីដែលហៅថា iPad Pro Series 2021 ក្នុងពេលឆាប់ៗនេះ។ ប្រភពដដែលនេះក៏បានបញ្ជាក់ថា iPad Pro ជំនាន់ថ្មីរបស់ Apple នឹងមកដល់ផ្លូវការណ៍នាខែមេសា ឆ្នាំ 2021 ខាងមុខនេះ ហើយជាមួយគ្នានោះ Apple ក៏នឹងដាក់បង្ហាញ iPad mini មួយស៊េរីទៀតផងដែរ។
បើតាមប្រភពព័ត៌មានចចាមអារាមមួយចំនួនបាននិយាយថា iPad Pro ជំនាន់ថ្មីឆ្នាំ 2021 នឹងប្រើប្រាស់នូវបន្ទះឈីប Apple M1 ដែលប្រើនៅលើ MacBook Series និង Mac mini 2020។ ប្រភពក៏បានបញ្ជាក់ទៀតថា iPad Pro series 2021 ក៏នឹងពង្រឹងសមត្ថភាពបន្ថែមទៅលើប្រព័ន្ធកាមេរ៉ាថតរូប និងវីដេអូ ខណៈការឌីស្សាញរួមទាំងទំហំអេក្រង់គឺនឹងរក្សាដូចជំនាន់ឆ្នាំ 2020 ដដែល។ សម្រាប់ iPad Pro 12.9-Inch ជំនាន់ឆ្នាំ 2021 ត្រូវបានគេដឹងថា នឹងប្តូរមកប្រើនូវបច្ចេកវិទ្យាបន្ទះអេក្រង់ថ្មីហៅថា mini-LED Display ដែលជាបន្ទះអេក្រង់មានគុណភាពកម្រិតពន្លឺ និងពណ៌ច្បាស់ដិតជាមួយកម្រិត Contrast ratio ខ្ពស់ជាងជំនាន់ iPad Pro 12.9-Inch ឆ្នាំ 2020។
ហើយអ្វីដែលកាន់តែបន្ថែមការចាប់អារម្មណ៍ជាងនេះទៅទៀតនោះគឺប្រភពបានបញ្ជាក់ថា iPad Pro Series 2021 នឹងប្រើប្រាស់នូវរន្ធដោតប្រភេទ Thunderbolt ដែលនឹងផ្តល់នូវលទ្ធភាពក្នុងការតភ្ជាប់ iPad ទៅកាន់ឧបករណ៍ជាច្រើនដូចជា អេក្រង់ម៉ូនីទ័រ, ឧបករណ៍ផ្ទុកទិន្នន័យ (Hard Drive) និងឧបករណ៍ប្រើនូវរន្ធប្រភេទយ Peripherals ផ្សេងទៀតបានលឿនរហ័សជាងរន្ធប្រភេទ USB-C៕
