Apple ត្រៀមដាក់បញ្ចូល iPhone SE 3 ដែលគាំទ្រប្រព័ន្ធសេវា 5G ក្នុងសង្វាក់ផលិតកម្មទ្រង់ទ្រាយធំឆាប់ៗនេះ

Apple បានប្រកាសចេញទូរស័ព្ទ iOS ដែលមានតម្លៃធូរថ្លៃម៉ូដែល iPhone SE Series មានចំនួនតែពីរម៉ូដែលប៉ុណ្ណោះនៅលើទីផ្សារមកទល់នឹងពេលបច្ចុប្បន្ននេះ។ ដោយម៉ូដែលដំបូងត្រូវបានប្រកាសចេញក្នុងឆ្នាំ 2016 និងម៉ូដែលទីពីរ គឺ iPhone SE 2 បានប្រកាសចេញក្នុងឆ្នាំ 2020។ យ៉ាងណាមិញក្រុមហ៊ុនបិតាបច្ចេកវិទ្យា Cupertino របស់អាមេរិកមួយនេះ ត្រូវបានប្រភពជាច្រើនបានព្យាករណ៍ថា នឹងប្រកាសចេញជំនាន់ទី 3 (iPhone SE 3) នៅឆ្នាំ 2022 ខាងមុខនេះ។ ហើយក្នុងពេលនេះមានប្រភពព័ត៌មានចុងក្រោយមួយបាននិយាយថា iPhone SE3 នឹងត្រូវដាក់បញ្ចូលនៅក្នុងសង្វាក់ផលិតកម្មទ្រង់ទ្រាយធំក្នុងពេលឆាប់ៗខាងមុខនេះ។ 

ប្រភពរបាយការណ៍បានបញ្ជាក់ទៀតថា ក្រុមហ៊ុនផ្គត់ផ្គង់សមាសភាគផលិតជាច្រើន ពេលនេះបានរៀបចំ នាំចេញសមាសភាគបង្គុំសម្រាប់ទូរស័ព្ទ iPhone SE ជំនាន់ថ្មីនេះរួចរាល់ហើយ។ បើតាមប្រភពរបាយការណ៍មួយចំនួនដែលបានចុះផ្សាយនាពេលកន្លងមកបាននិយាយថា iPhone SE 3 នឹងរក្សាទម្រង់នៃការរចនារូបរាងដូចគ្នានឹងជំនាន់ SE2 ដដែល ឬដូច iPhone 8។ ទូរស័ព្ទ iOS កម្រិតថវិកាជំនាន់ថ្មីនេះនឹងមានអេក្រង់ទំហំ 4.7 អ៊ីញ Retina HD  LCD Display និងមានប៊ូតុងហូមស្គ្រីនដែលភ្ជាប់ជាមួយសែនស័រ Touch ID ដូចគ្នាផងដែរ។

ទូរស័ព្ទ iOS កម្រិតថវិកាជំនាន់ថ្មីនេះ នឹងបំពាក់ឈីប A15 Bionic 5G ភ្ជាប់ដោយរ៉េមទំហំ 3GB ហើយក៏អាចនឹងមានម៉ូដែល SE 3 Plus មួយទៀតដែលនឹងមានរ៉េមទំហំ 4GB។ សម្រាប់កាមេរ៉ាវិញ iPhone SE3 ក៏នឹងនៅរក្សាលែនកាមេរ៉ាក្រោយមួយគ្រាប់ទំហំ 12MP ដូចជំនាន់មុខដដែល ប៉ុន្តែ នឹងមានការបង្កើននូវសមត្ថភាពក្នុងការថតរូបរួមជាមួយមុខងារថ្មីៗមួយចំនួន។

លោក J.P. Morgan ដែលជាអ្នកវិភាគល្បីឈ្មោះមួយរូប បានព្យាការណ៍ថ្មីៗនេះថា iPhone SE ជំនាន់ថ្មីនេះ ឬ SE 3 (2022) គឺអាចនឹងទាក់ទាញអ្នកប្រើប្រាស់ទូរស័ព្ទ Android កម្រិតមធ្យមបានយ៉ាងហោចណាស់ក៏ជិត 1.4 ពាន់លាននាក់ និងអ្នកប្រើប្រាស់ iPhone ស៊េរីចាស់ៗប្រហែល 300 លាននាក់ផងដែរ។ លោក Morgan បានបន្ថែមថា iPhone SE 2022 អាចនឹងលក់ចេញបានចំនួន 30 លានគ្រឿង ហើយសម្រាប់ការនាំចេញ iPhone សរុបក្នុងឆ្នាំ 2022 អាចនឹងមានចំនួន 250 លានគ្រឿង គឺកើនឡើង 10 លានគ្រឿងធៀបនឹងឆ្នាំ 2021 នេះ៕