បន្ទះឈីប Apple M1 Pro និង M1 Max ដែលប្រើនៅលើ MacBook Pros ជំនាន់ថ្មីមានសមត្ថភាពខ្លាំងជាងជំនាន់មុនកម្រិតណា!

កំពូលឈីប MacBook Pros ជំនាន់ថ្មីត្រូវបាន Apple ប្រកាសចេញផ្លូវការណ៍ដែលមានជម្រើសពីរស៊េរីគឺ Apple M1 Pro និង M1 Max។ បន្ទះឈីបកំពូលជំនាន់ថ្មីនេះត្រូវបាន Apple ផលិតឡើងដោយឈរលើប្រព័ន្ធ ARM-based System-On-a Chip (SOCs) ដែល Apple បានអះអាងថា មានកំលាំង CPU ខ្លាំងជាងជំនាន់ M1 ចេញកាលពីខែវិច្ឆិកាឆ្នាំ 2020 ដល់ទៅ 70%។ បន្ទះឈីប MacBook Pro ជំនាន់ថ្មីទាំងពីរស៊េរីនេះត្រូវបានក្រុមហ៊ុនផលិតឡើងតាមគន្លងស្តង់ 5nm ប្រើនូវប្រព័ន្ធ Neural Engine ដែលមាន 16-core ដូចគ្នា។

សម្រាប់ល្បឿន GPU នៅលើស៊េរី M1 Pro ត្រូវបាន Apple អះអាងថា មានល្បឿនដំណើរការលឿនជាង GPU នៅលើ M1 ដល់ទៅ 2 ដង ខណៈនៅលើ M1 Max គឺមានល្បឿនខ្លាំងជាងដល់ទៅ 4 ដងឯណោះ។ GPU នៅលើ M1 Pro មានចំនួន 16-core មានល្បឿនប្រតិបត្តិការខ្លាំងជាង 8-core GPU ដែលប្រើនៅលើម៉ាស៊ីនកុំព្យូទ័រ Notebook បច្ចុប្បន្ន។

បន្ទះឈីបស៊េរីថ្មីនេះមាន CPU កម្រិត 10-core ដែល Apple បញ្ជាក់ថា មានល្បឿនដំណើរការខ្លាំងជាង 1.7 ដង ព្រមទាំងប្រើថាមពលតិចជាងដល់ទៅ 70% ទៀតផងបើធៀបនឹង CPU 8-Core របស់ Notebook។ Apple M1 Pro គាំទ្រជាមួយរ៉េមទំហំធំបំផុតដល់ 32GB ជាមួយកម្រិតល្បឿន Bandwidth 200GB/s និងមាន 33.7 billion transistors។

ចំនែកស៊េរី Apple M1 Max វិញគឺមានអង្គ CPU កម្រិត 10-core ដូចស៊េរី M1 Pro ដែរ ប៉ុន្តែ បានបង្កើនកម្រិត GPU ឡើងដល់ 32-Core និងមាន 57 billion Transistors។ កំពូលឈីប MacBook Pro ជំនាន់ថ្មីដ៏ខ្លាំងក្លានេះគាំទ្រជាមួយរ៉េមបានដល់ទំហំ 64GB ជាមួយកម្រិតល្បឿន Bandwidth ឡើងដល់ 400GB/s។ Apple បាននិយាយអួតថា M1 Max របស់ខ្លួនគឺមានលទ្ធភាពអូសល្បឿនដំណើរការបានលឿនរហ័សជាង M1 Pro ដល់ទៅ 70% និងលឿនជាងស៊េរី M1 ដល់ទៅ 3.5 ដងឯណោះ។ ដូច្នេះមានន័យថា M1 Max គឺជាបន្ទះឈីបដ៏មានឥទ្ធិពលបំផុតដែល Apple មិនធ្លាប់បានផលិតឡើង។ 

ហើយបើធៀបនឹង GPU នៅលើម៉ាស៊ីនកុំព្យូទ័រយួរដៃប្រភេទ Compact Pro និង PC Laptop គឺ M1 Max មានល្បឿនដំណើរការខ្លាំងជាង ប៉ុន្តែ ប្រើថាមពលតិចជាងដល់ទៅ 40%។ ស្របពេលជាមួយគ្នាដែរ Apple ក៏បានបញ្ជាក់ថា M1 Max ជំនាន់ថ្មីរបស់ខ្លួនគឺគាំទ្រកំលាំងភ្លើងក្រោម 100W។ បន្ថែមពីនេះ Apple បានអះអាងទៀតថា បន្ទះឈីប M1 Max ដែលប្រើនៅលើម៉ាស៊ីន MacBook Pro ជំនាន់ថ្មី គឺអាចដំណើរការក្នុងការ render វីដេអូនៅលើកម្មវិធី Final Cut Pro បានលឿនជាងជំនាន់ MacBook Pro 13-inch ដែលប្រើឈីប M1 បានដល់ទៅ 13 ដង និងល្បឿន transcode ProRes Video Compressor លឿនជាង MacBook Pro 16-inch ជំនាន់មុនដល់ទៅ 10 ដងផងដែរ៕