ខណៈពេលដែលការមកដល់នៃរថយន្តស៊េរីថ្មីម៉ាក Kia K4 នៅថ្ងៃទី 27 ខែមេសាខាងមុខនោះ នៅពេលនេះក្រុមហ៊ុនធ្វើការបង្ហាញរូបរាងនៃការឌីស្សាញផ្នែកខាងក្រៅ
និងផ្នែកខាងក្នុង។ បើមើលទៅលើការឌីស្សាញរូបរាងរបស់ Kia K4 ហាក់មិនសូវជាខុសគ្នាពីម៉ូដែល Kia K3 ដែលបានបង្ហាញវត្តមានកាលពីឆ្នាំ 2023 ប៉ុន្មានទេ ប៉ុន្តែ Kia បានបញ្ជាក់ថា K4 គឺមានការបន្ថែមនូវលក្ខណៈឌីស្សាញថ្មីឲ្យមើលទៅកាន់តែមានភាពប្រណិត បែបរចនាបថរយន្តនាពេលអនាគត។
យ៉ាងណាមិញសម្រាប់លក្ខណៈសម្បត្តិបច្ចេកទេសដែលប្រើនៅរថយន្តស៊េរីថ្មីរបស់ Kia មួយនេះមិនត្រូវបានបង្ហាញលម្អិតនោះទេ។ បើតាមប្រភព Kia K4 នឹងមានម៉ូដែលប្រើប្រាស់ម៉ាស៊ីនចំហេះក្នុង ឬ ICE រួមជាមួយប្រព័ន្ធអគ្គិសនីសម្រាប់ការចេញលក់នៅទីផ្សារសកល។ បើតាមរូបភាពដែលបានបង្ហាញចេញមកនេះ ឃើញថា ការឌីស្សាញរបស់ Kia K4 ត្រូវបានរចនាឡើងជាមួយប្រភេទរថយន្ត Compact Sedan ជាមួយការឌីស្សាញចង្កៀងខាងមុខស្រដៀងនឹងមុខរបស់ខ្លារខិន (Tiger Face)។
ចំណុចពិសេសបំផុតនៃផ្នែកខាងក្រៅរបស់ Kia K4 គឺទ្វារខាងក្រោយ និងការរចនាបែប C-Pillar។ ដោយបង្អួចខាងក្រោយមានការកាត់បញ្ឈរ ហើយតំបន់បង្អួចសំខាន់មួយផ្សេងទៀតត្រូវបានដកចេញពីទ្វារខាងក្រោយ។ នៅលើដៃទ្វារខាងក្រោយរបស់ Kia K4 ត្រូវបានរចនាបែប "លាក់ជិត ឬ Hidden Handle Door" ផងដែរ ដែលនេះ គឺជាការរួមបញ្ចូលគ្នាជាមួយនឹងរចនាប័ទ្មបែបរថយន្ត fastback ដែលមើលទៅហាក់បីដូចជាទ្វារទាំងពីរគឺមានដៃទ្វារតែមួយ។
អនុប្រធានប្រតិបត្តិនៃក្រុមហ៊ុន Kia Global Design លោក Karim Habib បាននិយាយថា “រាល់វណ្ឌវង្ក នៃខ្សែកោង និងព័ត៌មានលម្អិតរបស់ K4 ត្រូវបានគិតគូរយ៉ាងយកចិត្តទុកដាក់ និងត្រូវបានបង្កើតឡើងដើម្បីប្រកាន់ខ្ជាប់នូវទស្សនវិជ្ជានៃការរចនារបស់ក្រុមហ៊ុន Kia ដោយប្រើនៅភាសារចនា Opposites United ដែលនាំមកនូវផ្ទៃខាងមុខនៃរថយន្តប្រកបដោយភាពស្រស់ស្អាត និងព័ត៌មានលម្អិតផ្នែកបច្ចេកវិទ្យានៅក្នុងដ៏អស្ចារ្យ។ ដោយគ្រប់ផ្នែកទាំងអស់នៃ Kia K4 ត្រូវបានគិតគួរយកចិត្តទុកដាក់យ៉ាងខ្លាំង ដើម្បីឲ្យរថយន្តថ្មីនេះមើលទៅប្រកបដោយប្រណិតភាព និងទំនើបភាព។
សម្រាប់ការឌីស្សាញនៅផ្នែកខាងក្នុងវិញ យើងឃើញថាមានបំពាក់នូវអេក្រង់វែងនៅលើ Dashboard ប្រព័ន្ធកំនត់ម៉ាស៊ីនត្រជាក់ ប្រអប់លេខនៅកណ្តាល ថតសម្រាប់ដាក់កែវទឹកធំចំនួនពីរ កន្លែងសាកថ្មទូរស័ព្ទឥតខ្សែ និងការរចនាដៃចង្កូតរាងអក្សរ D ដោយមានការបំពាក់នូវប៊ូតុងបញ្ជាមុខងារជាច្រើនថែមទៀតផង។ រថយន្តទំនើបស៊េរីថ្មី Kia K4 នឹងបង្ហាញវត្តមានផ្លូវការណ៍នៅថ្ងៃទី 27 ខែមេសា ឆ្នាំ 2024 នៅក្នុងព្រឹត្តិការណ៍ពិព័រណ៌រថយន្តនៅទីក្រុងញ៉ូយ៉ក New York Auto Show ដូចមនេះ គុណសម្បត្តិ និងប្រព័ន្ធបច្ចេកវិទ្យាលម្អិតរបស់រថយន្តស៊េរីថ្មីនេះនឹងត្រូវបង្ហាញលម្អិតនៅថ្ងៃនោះហើយ៕