យោងតាមពាក្យចចាមអារ៉ាមជាច្រើនបាននិយាយពីផលិតផលថ្មីរបស់ក្រុមហ៊ុន Apple ខណៈដែលថេប្លេត iPad Proនិង iPad Air មកដល់ពេលនេះ នៅមិនទាន់ទម្លាយនៅឡើយទេ។ បើតាមការបែលធ្លាយនៅពេលនេះ គឺមានការទម្លាយថា ថេប្លេតថ្មីនេះ អាចនឹងបង្ហាញខ្លួននៅក្នុងខែឧសភានេះហើយ។ ថេប្លេត iPad Pro នេះ នឹងមានអេក្រង់ OLED ដែលការផ្លាស់ប្តូរនេះត្រូវបានគេនិយាយថា គឺជាប្រវត្តិសាស្រ្តហើយដែលក្រុមហ៊ុន Apple អាចនឹងផ្តល់នូវទំហំអេក្រង់ចំនួន 2 សម្រាប់ iPad Air នេះ។
សូមជំរាបថា មកដល់ពេលនេះ គឺមានរយៈពេលជាង 1 ឆ្នាំកន្លះហើយ គិតចាប់តាំងពីការប្រកាសនូវថេប្លេត iPad Pro ហើយក៏ជារយៈពេលដ៏វែងបំផុតនៃប្រវត្តិសាស្រ្តរបស់ក្រុមហ៊ុន Apple នៅក្នុងការបញ្ចេញនូវថេប្លេតថ្មីទៅលើទីផ្សារផងដែរ។ ប្រភពខាងលើនេះបន្តថា ការប្រើប្រាស់នូវអេក្រង់ OLED នឹងធ្វើអោយថេប្លេតនេះ កាន់តែមានភាពស្តើងក្នុងការប្រើប្រាស់បំផុត។
មួយវិញទៀតសម្រាប់ការផលិតទ្រង់ទ្រាយធំ អាចនឹងមានការកើនឡើងផងដែរ។ ក្រុមហ៊ុននេះ បានរំពឺងថា ការលក់នូវថេប្លេតនេះ នឹងជួយបង្កើនទៅលើចំណែកទីផ្សាររបស់ខ្លួនឡើងវិញ បន្ទាប់ពីកាលពីឆ្នាំមុននេះ ក្រុមហ៊ុននេះ មានការធា្លក់ចុះ 25% ដែលខុសប្លែកពីរាល់ដង ដែល iPad គឺជាកាដូដ៏ពេញនិយមសម្រាប់រដូវឈប់សម្រាក។
សម្រាប់វត្តមានរបស់ iPad Pro នេះ គឺមានបំពាក់នូវបន្ទះឈីប M3 ហើយក៏មានការឌីស្សាញរូបរាងថ្មីជាមួយនឹង Magic Keyboard និង Apple Pencil ដែលអាចទ្រទ្រង់ក្នុងការប្រើប្រាស់បានជាមួយនឹង Vision Pro headset ថែមទៀតផង។ ថេប្លេត iPad Air នេះ នឹងមានបន្ទះឈីបថ្មី និងអេក្រង់ទំហំដល់ទៅ 12.9-អ៊ីង។ បើតាមគម្រោងដំបូងរបស់ក្រុមហ៊ុន Apple គឺ នឹងបង្ហាញនូវថេប្លេតថ្មីនៅចុងខែមីនានេះហើយ ប៉ុន្តែដោយសារតែក្រុមហ៊ុននេះ នៅមិនទាន់បញ្ចប់ទៅលើផ្នែក software ដែលជាហេតុផលបណ្តាលអោយមានការពន្យារពេល។ មួយវិញទៀត អេក្រង់ OLED អាចនឹងមានភាពស្មុគស្មាញក្នុងការផលិតផងដែរ៕
