នៅពេលនេះ AI បាននឹងកំពុងតែក្លាយជាមុខងារដ៏សំខាន់ក្នុងការប្រើប្រាស់នៅលើស្មាតហ្វូនជាច្រើនក្នុងឆ្នាំ 2024 នេះ ជាពិសេសទៅលើការថតរូបភាព និងវីដូអូ។ បើមើលទៅលើមុខងារនេះ ឃើញថា អ្នកប្រើប្រាស់ អាចធ្វើការលុប Object ពីលើរូបភាពដែលលោកថតបាន តាមរយៈនៃបច្ចេកវិទ្យា AI ថ្មី ហើយនិងការកែប្រែទៅលើរូបភាពនេះបានថែមទៀតផង។ នៅពេលនេះ Pura 70 Series ដែលជាស្មាតហ្វូនចុងក្រោយបំផុតរបស់ក្រុមហ៊ុន Huawei គឺមានបំពាក់នូវមុខងារ Object Removal Function ដែលគាំទ្រដោយសមត្ថភាព AI ដ៏ខ្លាំងក្លា។
យោងតាមការបង្ហាញនៅលើវីដេអូដែលត្រួវបានគេទម្លាយចេញនេះ ត្រូវបានគេបញ្ជាក់ថា អាចនឹងបង្ករនូវបញ្ហាសម្រាប់សង្គមផងដែរ ដោយសារតែមុខងារនេះ អាចធ្វើការលុបនូវផ្នែកណាមួយនៃសម្លៀកបំពាក់របស់មនុស្សបាន។ អ្នកប្រើប្រាស់ជាច្រើនដែលមិនសប្បាយចិត្តទៅលើរឿងនេះ បានប្រើប្រាស់នូវវេទិកាបណ្តាញសង្គមរបស់ចិន Weibo តាមរយៈការបង្ហោះនូវវីដេអូមួយដែលនិយាយអំពីបញ្ហានេះ។ វីដេអូនេះ បានបង្ហាញអំពីមុខងារ AI នេះ ទៅលើការលុបចេញនូវផ្នែកខ្លះនៃសម្លៀកបំពាក់តាមរយៈការប្រើប្រាស់នូវមុខងារ “smart AI retouching” របស់ស្មាតហ្វូននេះ។
បញ្ហាខាងលើនេះ គឺបានក្លាយជារឿងមួយដ៏ចម្រូងចម្រាស់មួយ ដោយអ្នកណា ក៏អាចធ្វើការកែប្រែរូបភាពបាន និងមើលទៅលើផ្នែកណាមួយនៃរាងកាយរបស់មនុស្សបានដោយប៉ះពាល់ទៅលើឯកជនភាពយ៉ាងធ្ងន់ធ្ងរមែនទែន។ បច្ចេកវិទ្យានេះ ត្រូវបានគេបញ្ជាក់ថា អាចនឹងបង្ករទៅជាបញ្ហានៃការចែកចាយមាតិកាដែលមិនសមរម្យថែមទៀតនាពេលខាងមុខនេះ។ សេវាកម្មអតិថិជនរបស់ក្រុមហ៊ុន Huawei បានដឹងអំពីបញ្ហានេះ និងបាននិយាយថានេះ បច្ចេកវិទ្យានេះ អាចជាចន្លោះប្រហោងនៃផ្នែក AI algorithm ។ ពួកគេបញ្ជាក់ថា បញ្ហាទាំងនេះ នឹងដោះស្រាយបានតាមរយៈការអាប់ដេតទៅលើ system នាពេលខាងមុខ។
ប្រភពខាងលើនេះ បន្តថា ក្រុមហ៊ុន Huawei ត្រូវតែដោះស្រាយទៅលើបញ្ហានេះ អោយបានលឿនបំផុត ពីព្រោះថា សមត្ថភាពនៃមុខងារនេះ បានកំពុងតែធ្វើអោយមានការប៉ះពាល់ទៅលើផ្នែកសីលធម៌ ហើយក៏បង្ហាញអំពីការប្រើប្រាស់ខុសផ្លូវនៃបច្ចេកវិទ្យា AI ផងដែរ៕
