ឡានអគ្គិសនី SUV ស៊េរីថ្មីទំនើបម៉ូដែល Xpeng G7 មានការបញ្ជាទិញមុនប្រមាណជា 10,000 គ្រឿង នៅត្រឹមរយះពេល 46 នាទី នៅក្រោយការប្រកាសចេញផ្លូវការណ៍ដែលបានធ្វើឡើងនៅប្រទេសចិន។ Xpeng G7 គឺជារថយន្តអគ្គិសនីដំបូងរបស់ Xpeng ដែលបានសហការក្នុងការប្រើប្រាស់នូវបច្ចេកវិទ្យាកម្រិតខ្ពស់ជាមួយក្រុមហ៊ុន Huawei។ឈរបង្ហាញរាងដ៏ទាក់ទាញជាមួយនឹងតួរខ្លួនប្រវែង 4,892mm/ ទទឹង 1,925mm/ កំពស់ 1,655mm ជាមួយគម្លាតចន្លោះកង់មុខទៅកង់ក្រោយ 2,890mm រថយន្ត SUV អគ្គិសនីថ្មីនេះប្រើប្រាស់សម្បកង់ខ្នាត 18-inch និង 20-inch។
នៅផ្នែកខាងក្នុងរបស់ Xpeng G7 មានការតុងតែងលម្អយ៉ាងប្រណិតជាមួយនឹងអេក្រង់កម្សាន្តនៅកណ្តាលតាបឡូទំហំ 15.6-inch, ប្រព័ន្ធភ្លើងបំភ្លឺតាមកាប៊ីន Ambient lighting ចំនួន 256 ពណ៌, កន្លែងសាកថ្មស្មាតហ្វូនឥតខ្សែចំនួនពីរមានកម្លាំង 50W, ប្រព័ន្ធបំពងសំឡេងចំនួន 20 គ្រាប់ និងកញ្ចក់មើលក្រោយជាប្រភេទ rear-view-mirror។
ឡានអគ្គិសនីនេះមិនមានអេក្រង់បង្ហាញព័ត៌មាននោះទេ ដោយវាបានជំនួសមកវិញនូវមុខងារបង្ហាញនៅលើកញ្ចក់ដំបូលមុខហៅថា AR-HUD ដែលមានកម្រិតបង្ហាញបានក្នុងទំហំ 87-inch អភិវឌ្ឍន៍រួមគ្នារវាង Xpeng និង Huawei។ សម្រាប់ប្រព័ន្ធដំណើរការទូទៅនៅលើ Xpeng G7 គឺគាំទ្រដោយបន្ទះឈីបថ្មី Turing AI Chip ដែលអភិវឌ្ឍន៍ផលិតដោយ Xpeng ផ្ទាល់។ បន្ទះឈីបខួរក្បាលរថនយន្តឆ្លាតវៃនេះគាំទ្រកម្រិតឆ្លាតវៃដល់ 2,200 TOPS។
បន្ថែមពីនេះ Xpeng G7 ក៏គាំទ្រនូវប្រព័ន្ធជំនួយការបើកបរស្វ័យប្រវត្តិកម្រិត Level 3 autonomous driving ដែលគាំទ្រដោយប្រព័ន្ធ XNGP system។ Xpeng G7 ដំណើរការដោយប្រព័ន្ធម៉ូទ័រអគ្គិសនីមួយ ឬប៉ុងមួយមានកម្លាំង 292 សេះ ដែលផ្តល់ថាមពលដោយកញ្ចប់ថ្មប្រភេទ LFP ផលិតដោយ CALB ដែលមានជម្រើសពីរទំហំ គឺ 68.5kWh និង 80.8kWh ដែលសាកភ្លើងពេញម្តងអាចជិះបានចម្ងាយ 602km និង 702km សម្រាប់ម៉ូដែលប្រើយ៉ាន់កង់ទំហំ 18-inch ខណៈម៉ូដែលប្រើយ៉ាន់កង់ទំហំ 20-inch អាចជិះបានចម្ងាយផ្លូវ 577km ឬ 677km៕
