នៅមួយថ្ងៃបន្ទាប់ពីក្រុមហ៊ុន តូយ៉ូតា បានប្រកាសចងសម្ព័ន្ធភាពជាមួយក្រុមហ៊ុនបច្ចេកវិទ្យាប្រទេសចិនមាន Xiaomi, Huawei និង Momenta សម្រាប់ការអភិវឌ្ឍន៍ផលិតរថយន្តជំនាន់ក្រោយរបស់ខ្លួន ដែលជាយុទ្ធសាស្ត្រថ្មីក្នុងប្រគូតប្រជែងទីផ្សាររថយន្តក្នុងប្រទេសចិនកាន់តែទូលំទូលាយ ដែលក្រុមហ៊ុនជប៉ុននេះ បាននឹងកំពុងផ្តោតការយកចិត្តទុកដាក់កាន់តែខ្លាំង។
ក្រុមហ៊ុន Toyota កំពុងពង្រីកបណ្តាញអភិវឌ្ឍន៍រួមគ្នាក្នុងស្រុករបស់ខ្លួនដើម្បីរួមបញ្ចូលម៉ាកយីហោរថយន្តជាមួយសម្ព័ន្ធក្រុមហ៊ុនផលិតរថយន្តធំៗក្នុងប្រទេសចិនដូចជា Hongqi ស្ថិតក្រោមដំបូល FAW ជាមួយដៃគូដែលមានស្រាប់ GAC និង BYD ជាដើម។ ការផ្លាស់ប្តូរនេះធ្វើឱ្យស៊ីជម្រៅយ៉ាងខ្លាំងដល់ការធ្វើមូលដ្ឋានីយកម្មរបស់ Toyota នៅក្នុងទីផ្សាររថយន្តដ៏ធំបំផុតរបស់ពិភពលោកមួយនេះ។
បើយោងតាមរបាយការណ៍ថ្មីមួយបានបញ្ជាក់ថា កិច្ចខិតខំប្រឹងប្រែងអភិវឌ្ឍន៍រួមគ្នារបស់ក្រុមហ៊ុនតូ Toyota របស់ជប៉ុន នឹងមិនត្រូវបានកំណត់ចំពោះត្រកូលរថយន្តអគ្គិសនី bZ-Series របស់ខ្លួនទៀតនោះទេ។ ដោយម៉ូដែលស្នូលរបស់ Toyota ដែលមានតាំងពីដូចតាមកដូចជា RAV4, Highlander និង Sienna ជាដើមក៏នឹងត្រូវបានធ្វើមូលដ្ឋានីយកម្មនៅក្នុងប្រទេសចិនផងដែរ ជាមួយនឹងបច្ចេកវិទ្យាសំខាន់ៗដែលផ្គត់ផ្គង់ដោយដៃគូចិន។ កិច្ចខិតខំប្រឹងប្រែងទាំងនេះត្រូវបានគេរំពឹងថា នឹងបង្កើតមូលដ្ឋានគ្រឹះជាយុទ្ធសាស្រ្តរបស់ក្រុមហ៊ុន Toyota ដើម្បីរក្សាការប្រកួតប្រជែងយ៉ាងហោចណាស់នៅត្រឹមឆ្នាំ 2027។
ការផ្លាស់ប្តូរនេះត្រូវបានជំរុញដោយក្របខ័ណ្ឌ RCE ឬ Regional Chief Engineer ថ្មីរបស់តូយ៉ូតា ដែលបានបង្កើតឡើងនៅក្នុងខែមេសា ឆ្នាំ 2025។ ដែល RCE ត្រូវបានផ្ទេរអំណាចទៅលើការសម្រេចចិត្តសម្រាប់ការអភិវឌ្ឍន៍ផលិតផលទៅឱ្យក្រុមវិស្វករនៅក្នុងស្រុក។
ក្រុមហ៊ុន Toyota បានដាក់ចេញនូវម៉ូដែលរថយន្តគំរូផ្លូវការណ៍ជាច្រើនរបស់ខ្លួនដែលចាប់ដៃជាមួយក្រុមហ៊ុនចិនរួចហើយក្នុងនោះរួមមាន FAW Toyota bZ5, GAC Toyota bZ3X និង bZ7 ដែលត្រៀមបង្ហាញខ្លួនក្នុងពេលឆាប់ៗខាងមុខនេះ។ ជាមួយគ្នានេះ BYD គឺជាក្រុមហ៊ុនផ្គត់ផ្គង់សមាសធាតុក្នុងការផលិតរថយន្តអគ្គិសនីដ៏សំខាន់ៗសម្រាប់ម៉ូដែល bZ5 ខណៈពេលដែល GAC ជាអ្នករអភិវឌ្ឍន៍ផលិតសម្រាប់ម៉ូដែល bZ3X និង bZ7។
បន្ថែមពីលើគម្រោងទាំងនេះ Toyota នឹងបង្ហាញគំរូរថយន្ត FAW Toyota ថ្មីដែលត្រូវបានបង្កើតឡើងដោយឈរលើប្រព័ន្ធគ្រោងឆ្អឹង NEV Platform ដែលបង្កើតឡើងដោយ Hongqi។ ដែលវាជាផ្នែកមួយនៃការរៀបចំរចនាសម្ព័ន្ធឡើងវិញកាន់តែទូលំទូលាយ របស់ Toyota ដែលបានប្រមូលផ្តុំកិច្ចខិតខំប្រឹងប្រែងសម្រាប់មជ្ឈមណ្ឌល R&D កណ្តាលនៅទូទាំងក្រុមហ៊ុន FAW Toyota, GAC Toyota, BYD Toyota និង IEM ផ្ទាល់របស់ខ្លួន (Intelligent Electric Vehicle R&D Centre) ក្រោមយុទ្ធសាស្ត្រ "One R&D"។
ជាមួយនឹងការកើនឡើងនៃដៃគូជាមួយក្រុមហ៊ុនបច្ចេកវិទ្យា និងផលិតរថយន្តរបស់ចិន និងការរៀបចំឡើងវិញនៃមជ្ឈមណ្ឌល R&D ក្រុមហ៊ុន Toyota កំពុងរៀបចំមូលដ្ឋានគ្រឹះរបស់ខ្លួនយ៉ាងឆាប់រហ័ស ដើម្បីរក្សាការប្រកួតប្រជែងនៅក្នុងទីផ្សារដែលមានតម្រូវការឆាប់រហ័សសម្រាប់រថយន្តអគ្គិសនីដែលមានប្រសិទ្ធិភាព ភាពទំនើប និងបំពាក់មុខងារឆ្លាតវៃ៕
