BYD Xia ដែលជាឡាន Plug-in-hybrid minivan ថ្មី នឹងចេញលក់នៅលើទីផ្សារសកលជាមួយនឹងស្លាកឈ្មោះថ្មីហៅថា “BYD M9”។ ឡាន MPV ស៊េរីថ្មីនេះ ត្រូវបានក្រុមហ៊ុនត្រៀមខ្លួនក្នុងការនាំចេញជាលើកដំបូលទៅកាន់ទីផ្សារសកល ហើយប្រទេសម៉ិចស៊ិក ទំនងជាទីផ្សារដំបូងគេដែល BYD M9 ចូលសុំចត។ BYD Xia ឬ M9 បានបង្ហាញខ្លួនជាលើកដំបូងនៅក្នុងព្រឹត្តិការណ៍ Chengdu Auto Show ក្នុងខែសីហា ឆ្នាំ 2024។ ក្នុងខែមករា ឆ្នាំ 2025 ឡាន MPV មួយនេះលក់បានចំនួន 8, 2025 គ្រឿងក្នុងទីផ្សារប្រទេសចិន។ ហើយសម្រាប់តម្លៃចេញលក់នៅទីផ្សារក្នុងស្រុក គឺចាប់ពីខ្ទង់ $34,750 ឡើងដល់ $43,100។ យ៉ាងណាមិញសម្រាប់តម្លៃនៅលើទីផ្សារសកលរបស់ BYD M9 នៅមិនទាន់បានប្រកាសបញ្ជាក់នៅឡើយទេ។
.jpg)
BYD M9 នឹងក្លាយជាឡាន MPV minivan ទីពីររបស់ BYD បន្ទាប់ពីម៉ូដែល BYD M6 Electric minivan ដែលកំពុងមានវត្តមានលក់ក្នុងចំនួនដ៏ច្រើននៅក្នុងទីផ្សារប្រទេសដូចជា ថៃ ឥណ្ឌូនេស៊ី ហុងកុង និងប្រទេសជាច្រើនផ្សេងទៀត។ ម៉ាករថយន្ត MPV របស់ BYD មួយនេះ ត្រូវបានក្រុមហ៊ុនលក់បានចំនួនប្រមាណ 40,000 គ្រឿងនៅទីផ្សារសកលកាលពីឆ្នាំទៅមិញ ហើយក្នុងឆ្នាំ 2025 នេះ BYD បានកំនត់ការលក់ឲ្យបានដល់ 80,000 គ្រឿង។ ទោះបីជា BYD ត្រូវបានគេដឹងថា មានបំណងចេញលក់ M9 minivan នៅក្នុងត្រីមាសទី 3 ឆ្នាំ 2025 ក៏ដោយ។ BYD Xia MPV បានបណ្តោយតួរខ្លួន 5,145mm/ទទឹង 1,970mm/ កំពស់ 1,805mm និងមានគម្លាតរវាងកង់មុខទៅកង់ក្រោយប្រវែង 3,045mm។
ផ្នែកខាងក្នុងរបស់ BYD Xia មានភ្ជាប់មកជាមួយកៅអីចំនួន 7 រៀបជា 2x2x3 ព្រមទាំងប្រើប្រាស់ទ្វារខាងក្រោយជាប្រភេទ Sliding doors។ នៅកាប៊ីនខាងក្នុងមានបំពាក់នូវប្រព័ន្ធអេក្រង់ចំនួន 3 ដោយក្នុងនោះមានអេក្រង់បម្រើការកម្សាន្តក្នុងរថយន្តនៅកណ្តាលមានទំហំធំដល់ 15.6-inch ខណៈអេក្រង់បង្ហាញព័ត៌មាន និងអេក្រង់នៅខាងមុខអ្នករួមដំណើរមានទំហំ 12.3-inch។ បន្ថែមពីនេះ នៅផ្នែកខាងក្នុងរបស់ BYD Xia សុទ្ធតែប្រើប្រាស់នូវប៊ូតុង Touch កម្រិតខ្ពស់ បានទូរទឹកកករមានមុខងារក្តៅត្រជាក់ កូនតុបត់ និងអេក្រង់កម្សាន្តទំហំធំភ្ជាប់នូវលើដំបូលថែមទៀតផង។
BYD Xia ឬ M9 Plug-in-hybrid minivan ដំណើរការដោយប្រព័ន្ធបច្ចេកវិទ្យា 5.0 DM System ភ្ជាប់ដំណើរការនៅលើម៉ាស៊ីន 1.5-liter turbocharged engine មានកម្លាំង 154 សេះ និងភ្ជាប់ដំណើរការដោយម៉ូទ័រអេឡិចត្រិចមួយកម្លាំង 268 សេះ ជាមួយជម្រើសកញ្ចប់ថ្មទំហំ 20.4kWh និង 36.6kWh ដែលសាកភ្លើងពេញម្តងអាចជិះបានចម្ងាយ 100km និង 180km ដោយប្រើថាមពលអគ្គិសនីសុទ្ធ។ BYD Xia MPV ត្រូវបានក្រុមហ៊ុនចេញលក់ក្នុងតម្លៃចាប់ពីខ្ទង់ $34,750 ដល់ $43,100 នៅទីផ្សារប្រទេសចិន បើធៀបនឹងតម្លៃម៉ូដែល Denza D9 ដែលជាម៉ូដែល High-end minivan វិញ គឺមានតម្លៃចាប់ពីខ្ទង់ $47,260 ដល់ $65,350៕
