នេះគឺជាឡាន SUV អគ្គិសនី Tesla Model Y Standard ថ្មី ដែលទើបតែបានបង្ហាញខ្លួន សម្រាប់ទីផ្សារសហរដ្ឋអាមេរិក ហើយវាមានតម្លៃត្រឹមតែ $39,990 ប៉ុណ្ណោះ ពោលគឺធូរថ្លៃជាងមុន $5,000 បើប្រៀបធៀបនឹង ម៉ូដែល Tesla Model Y RWD Premium។
Tesla Model Y Standard ថ្មីនេះ បំពាក់ម៉ូទ័រអគ្គិសនី 1 និង ប៉ុង 1 (RWD) ហើយប្រើកញ្ចប់អាគុយ ទំហំ 69 kWh ដែលសាកភ្លើងមួយពេញ អាចបើកបរបានចម្ងាយ 321 ម៉ាយ៍ ឬប្រហែល 515 KM។ វាអាចរត់ស្ទុះពីកុងទ័រ 0-100 KM/H ប្រើពេល 6.8 វិនាទី និងមានល្បឿន Top Speed 201 KM/H។ បើនិយាយពីរូបរាងវិញ ឡាន SUV អគ្គិសនីមួយនេះ ក៏បានផ្លាស់ប្តូរមុខមាត់ថ្មីដែរ ដោយលែងប្រើ របា LED លាតពេញផ្នែកខាងមុខទៀតហើយ សូម្បីតែស្តុប LED ខាងក្រោយក៏ដូចគ្នាដែរ គឺលែងមានរបាកាត់ទទឹងពេញទៀតហើយ និងបំពាក់យ៉ាន់កង់ទំហំ 18 អ៊ីញមកស្តង់ដារ។
ក្រឡេកទៅមើលផ្នែកខាងក្នុងវិញ វានៅតែរក្សាការរៀបចំបែបតិចនិយម និងប្រើអេក្រង់កម្សាន្ត ទំហំធំជាងមុន 15.4 អ៊ីញ ប៉ុន្តែបានដក Option មួយចំនួនដូចជា លែងមានមុខងារកៅអីក្តៅត្រជាក់, លែងមានអេក្រង់ Touchscreen សម្រាប់អ្នកដំណើរផ្នែកខាងក្រោយ ទំហំ 8 អ៊ីញ, ដៃចង្កូតសារ៉េដៃធម្មតា, Speaker មានត្រឹម 7 គ្រាប់, កៅអីជួរទី 2 កាច់សារ៉េធម្មតា ហើយសូម្បីតែមុខងារភ្លើងឌីម Ambient Lighting ក៏លែងមានដែរ។
ចំណុចដែលគួរឲ្យកត់សម្គាល់មួយទៀតនោះគឺ ប្រព័ន្ធជើងក្រោមរបស់ Tesla Model Y Standard ក៏ខុសគ្នាពីម៉ូដែលផ្សេងដែរ។យ៉ាងណាក៏ដោយ ក្រុមហ៊ុន Tesla បានអះអាងថា Model Y មានកាប៊ីនស្ងាត់ និងប្រណីតជាងមុន ដោយសារតែ ការពង្រឹងទៅលើកម្រិត Aerodynamic, បំពាក់កញ្ចក់ប្រភេទ Acoustic Glass ថ្មី និង ប្រើសំបកកង់ដែលអាចកាត់សំឡេងរំខានបានថែមទៀតផង៕
