ថ្មីៗនេះ ក្រុមហ៊ុនផលិតរថយន្តរបស់ប្រទេសអាល្លឺម៉ង់ Volkswagen បានប្រកាសថា ខ្លួននឹងធ្វើការផ្គត់ផ្គត់នូវរថយន្តអគ្គិសនីប្រើប្រាស់ថាមពលចេញពីក្រុមហ៊ុន Samsung SDI និង LG Chem នៅក្នុងឆ្នាំ 2025 នៅក្នុងទ្វីបអ៊ឺរ៉ុប ហើយប្រទេសចិនក៏កំពុងតែពង្រីកទីផ្សាររបស់ខ្លួននៅក្នុងឧស្សាហកម្មនៃថាមពលថ្មនេះផងដែរ។ កាលពីសប្តាហ៍មុននេះ ក្រុមហ៊ុន Volkswagen ប្រកាសនៅក្នុងទីក្រុងប៊ែកឡាំងថា ខ្លួនសម្រេចជ្រើសរើសយកក្រុមហ៊ុនផលិតថាមពលថ្មរបស់ប្រទេសកូរ៉េខាងត្បូង Samsung SDI និង LG Chem រួមទាំងក្រុមហ៊ុនបច្ចេកវិទ្យា Contemporary Amperex Technology របស់ប្រទេសចិនដើម្បីធ្វើការផ្គត់ផ្គង់ថាមពលថ្មសម្រាប់រថយន្តអគ្គិសនីនាពេលខាងមុខរបស់ខ្លួននៅក្នុងរោងចក្រនៅអ៊ឺរ៉ុប និងប្រទេសចិន ហើយវាគ្រោនឹងដាក់លក់នៅទីផ្សារនៃអាមេរិកខាងជើងផងដែរ។
ក្រុមហ៊ុនផលិតរថយន្តរបស់អាល្លឺម៉ង់នេះ មានគម្រោងក្នុងការបង្កើតរថយន្តអគ្គិសនីប្រមាណជា 3 លានគ្រឿង នៅត្រឹមឆ្នាំ 2025 ជាមួយនឹងការផ្គត់ផ្គង់ថាមពលថ្មដែលមានតម្លៃដល់ទៅ 25 ពាន់លានដុល្លារអាមេរិក។ កិច្ចព្រមព្រៀងនេះគឺជារឿងមួយនៅក្នុងចំណោមកិច្ចព្រមព្រៀងចំនួន 30 ផ្សេងទៀតដែលធានាដោយក្រុមហ៊ុន LG Chem ជាមួយនឹងក្រុមហ៊ុនផលិតរថយន្តនេះ នេះបើតាមការបញ្ជាក់របស់នាយកប្រតិបត្តិរបស់ក្រុមហ៊ុន LG Chem គឺលោក Park Jin-soo នៅក្នុងសន្នីសិទកាសែតមួយ។ អ្នកវិភាគ Kang Dong-jin នៅក្រុមហ៊ុន Hyundai Motor Investment and Securities និយាយថា ក្រុមហ៊ុននេះមានរោងចក្រនៅក្នុងសហរដ្ឋអាមេរិក ហើយវាទំនងជាក្រុមហ៊ុន LG Chem នឹងទទួលយកនូវកិច្ចព្រមព្រៀងក្នុងការផ្គត់ផ្គង់នៅអាមេរិកខាងជើងផងដែរ។
លោក Kang បានកត់សម្គាល់ថា ក្រុមហ៊ុនផលិតថាមពលថ្មរបស់ប្រទេសជប៉ុន Panasonic មិនមានវត្តមាននៅក្នុងកិច្ចព្រមព្រៀងនេះនោះទេ។ និន្នាការរបស់ក្រុមហ៊ុនជប៉ុន គឺការទទួលបាននូវកិច្ចព្រមព្រៀងក្នុងការផ្គត់ផ្គង់រួមគ្នាទៅលើការពង្រីកនូវភាពជាដៃគូ និងការបង្កើនចំណែកទីផ្សាររបស់ក្រុមហ៊ុនជាច្រើននៅប្រទេសកូរ៉េនោះ។ ក្រុមហ៊ុនស្រាវជ្រាវផ្នែកទីផ្សារ SNE Research បានទស្សន៍ទាយថា ការលក់រថយន្តអគ្គិសនីនៅលើពិភពលោកនោះគឺមានប្រហែលជា 1 លានគ្រឿងនៅឆ្នាំ 2017 និងកើនឡើងដល់ 3.9 លានគ្រឿងនៅក្នុងឆ្នាំ 2020 នោះ។
យោងតាមអ្នកវិភាគ Kim Ji-san របស់ក្រុមហ៊ុន Kiwoom បានបញ្ជាក់ថា ក្រុមហ៊ុន Samsung SDI និងLG Chem ផ្គត់ផ្គង់ប្រមាណជា 60% នៃទីផ្សារ ESS របស់ខ្លួន។ បច្ចេកវិទ្យានេះទាមទារអោយមានការបង្កើតនូវប្រព័ន្ធ Energy Storage Systems ផងដែរ។ក្រុមអ្នកវិភាគនៅក្រុមហ៊ុន Hana Financial Investment ទស្សន៍ទាយថា នៅឆ្នាំ 2018 នេះ ភាគហ៊ុនទីផ្សាររបស់ក្រុមហ៊ុន Samsung SDI នៅក្នុងទីផ្សារ ESS នឹងមានការកើនឡើង 40% ផងដែរ៕
