ថ្មីៗនេះ ក្រុមហ៊ុន Bentley បានបង្ហាញនូវរថយន្តម៉ូឌែលចុងក្រោយបំផុតរបស់ខ្លួននោះ គឺ Bentley Mulliner Continental GT Convertible Equestrian Edition ដែលពិតជាស្រស់ស្អាតខ្លាំងក្លាមែនទែន។ ក្រុមហ៊ុនផលិតរថយន្តរបស់អង់គ្លេសនេះបានបញ្ចេញនូវរថយន្តម៉ូឌែលពិសេសមួយចំនួន ហើយឆាប់ៗនេះ ក្រុមហ៊ុននេះ នឹងធ្វើការផលិតរថយន្ត Mulliner Bacalar ដែលមាន 2 កៅអីនៅក្នុងចំនួនត្រឹមតែ 12 គ្រឿងប៉ុណ្ណោះ។
រថយន្តម៉ូឌែលពិសេស Equestrian Edition នេះ គឺមានការជម្រុញពីព្រឹត្តិការណ៍ Cheltenham Festival ដែលជាព្រឹត្តិការណ៍ដ៏អស្ចារ្យបំផុតមួយដែលមានចំងាយត្រឹមតែ 10 ម៉ាយ៍ចេញពីទីលានប្រណាំង Cheltenham Racecourse ។ រថយន្ត Equestrian Edition នេះ គឺមានកៅអីចំនួន 4 ហើយវាមានស្បែកពណ៌ត្នោតដ៏ប្រណិត ដែលមានការឌីស្សាញជាមួយនឹងផ្នែកខាងក្រៅពណ៌ Cumbrian Green ដែលមើលទៅពិតជាសក្តិសមខ្លាំងបំផុតមែន។
សម្រាប់ពណ៌ពិសេសមួយទៀតនោះ គឺពណ៌ Spruce green ដែលជម្រើសនេះ គឺមានភ្ជាប់ជាមួយនឹងកង់ទំហំ 22-inch Mulliner Driving Specification wheels ពណ៌ខ្មៅយ៉ាងទាក់ទាញ។ រថយន្ត Equestrian Edition នេះ គឺប្រើប្រាស់នូវម៉ាស៊ីន 6.0-liter twin-turbo W12 ដែលមានកម្លាំង 626 សេះ ជាមួយនឹងចង្កឹះលេខ 8 វគ្គ dual-clutch transmission ថែមទៀត។ រថយន្តនេះគឺមានតម្លៃ $236,100 ៕
