Volkswagen ស្វែងរកជំនួយពីក្រុមហ៊ុន Huawei ដើម្បីជួយក្នុងការកែលម្អការអភិវឌ្ឍន៍កម្មវិធីសម្រាប់រថយន្តអគ្គិសនី

ផ្នែកទន់ និងផ្នែករឹង ដែលហៅថា Software និង Hardware គឺជាធាតុផ្សំដ៏សំខាន់នៅក្នុងវិស័យបច្ចេកវិទ្យាទំនើប។ ហើយវាជារឿងមួយដែលពិបាកបំផុតក្នុងការផលិតផលិតផលមួយឲ្យទទួលបានជោគជ័យដោយធ្វើការបាច់រួមបញ្ចូលសមាសធាតុទាំងពីរនេះដើម្បីឲ្យដំណើរការទៅបានយ៉ាងរលូន។ បើយោងតាមរបាយការណ៍ចុងក្រោយនេះ Volkswagen បានជូបពិភាក្សាជាមួយ Huawei អំពីការប្រើប្រាស់កម្មវិធីរបស់ក្រុមហ៊ុនបច្ចេកវិទ្យាខ្នាតយក្សរបស់ប្រទេសចិនមួយនេះ នៅក្នុងរថយន្តរបស់ខ្លួននៅក្នុងប្រទេសចិន។

Volkswagen គឺជាក្រុមហ៊ុនផលិតរថយន្តដ៏មានសក្តានុពលបំផុតនៅក្នុងឧស្សាហកម្មរថយន្តរបស់ពិភពលោក។ ក្រុមហ៊ុនអាល្លឺម៉ង់នេះ បានផលិតរថយន្តដែលប្រើថាមពលឥន្ធនៈ និងរថយន្តអគ្គិសនីផងដែរ។ ហើយ Volkswagen បាននឹងកាន់កាប់តំណែងជួរមុខគេនៅក្នុងទីផ្សារមួយចំនួន រួមទាំងអឺរ៉ុប។ ទោះជាយ៉ាងណាក៏ដោយ បច្ចុប្បន្ន Volkswagen កំពុងប្រឈមមុខនឹងបញ្ហាសំខាន់មួយចំនួនទៅនឹងការផលិតរថយន្តអគ្គិសនី (EVs)និងអភិវឌ្ឍន៍បច្ចេកវិទ្យារថយន្តថ្មីៗ ជាពិសេសនៅក្នុងការអភិវឌ្ឍន៍កម្មវិធី ឬ Software តែម្តង។

យោងទៅលើរបាយការណ៍ថ្មីៗនេះបានបង្ហាញថា ផ្នែកសូហ្វវែរ (Software) របស់ Volkswagen ដែលមានឈ្មោះថា Cariad បានជួបប្រទះការពន្យារពេលដាក់ឲ្យប្រើប្រាស់ រួមនិងការចំណាយច្រើនក្នុងការអភិវឌ្ឍន៍។ ហើយជាលទ្ធផល ការចេញលក់រថយន្ត EV ស៊េរីថ្មីជាច្រើនដូចជា Audi Q6 e-tron និង Porsche Macan ត្រូវបានពន្យារពេល។ ស្ថានភាពនេះមិនត្រឹមតែបង្កការលំបាកដល់ក្រុមហ៊ុនរថយន្តខ្នាតយក្សរបស់អាល្លឺម៉ង់ប៉ុណ្ណោះទេ ថែមទាំងបង្កគ្រោះថ្នាក់ដល់ប្រតិបត្តិការនាពេលអនាគតរបស់ខ្លួនថែមទៀតផង។ ម៉្លោះហើយ Volkswagen បានរកឃើញដំណោះស្រាយថ្មីមួយដោយពិភាក្សាចាប់ដៃគូជាមួយ Huawei ដើម្បីជួយក្នុងការកែលម្អកម្មវិធីសម្រាប់ប្រើនៅក្នុងរថយន្តរបស់ខ្លួន។

កិច្ចពិភាក្សារវាង Volkswagen និង Huawei គឺស្ថិតក្នុងដំណាក់កាលដំបូងប៉ុណ្ណោះ ហើយនៅមិនច្បាស់ទេថា តើក្រុមហ៊ុនទាំងពីរនឹងអាចឈានដល់កិច្ចព្រមព្រៀងដែរឬទេ។ ទោះជាយ៉ាងណាក៏ដោយ ការពិតដែលថា ពួកគេកំពុងពិភាក្សាគ្នានេះ គឺជាសញ្ញានៃសារៈសំខាន់នៃកម្មវិធីដែលកំពុងកើនឡើងនៅក្នុងឧស្សាហកម្មរថយន្តក្នុងពេលបច្ចុប្បន្ន និងពេលអនាគត៕