អតីតវិស្វកររបស់ក្រុមហ៊ុន Apple ម្នាក់ ត្រូវបានចោទប្រកាន់ពីបទលួចបច្ចេកវិទ្យាយានយន្តស្វយ័ត ឬ Autonomous Vehicle Technology របស់ Apple ហើយបានភៀសខ្លួនទៅប្រទេសចិន។ លោក Weibao Wang វ័យ 35 ឆ្នាំ បានចូលបម្រើការនៅក្នុងក្រុមហ៊ុន Apple ក្នុងឆ្នាំ 2016 ដោយបានបម្រើនៅក្នុងគម្រោងរថយន្តបើកបរដោយខ្លួនឯង ឬ Seft-driving vehicle technology របស់ Apple។ ហើយនៅឆ្នាំ 2017 លោក Wang បានទទួលយកមុខតំណែងថ្មីមួយនៅក្រុមហ៊ុនក្នុងប្រទេសចិន ដែលជាក្រុមហ៊ុនអភិវឌ្ឍលើបច្ចេកវិទ្យាយានយន្តបើកបរស្វ័យប្រវត្តិផងដែរ។ ទោះជាយ៉ាងណាក៏ដោយ Wang បានលាក់បាំងអំពីការផ្លាស់ប្តូរការងារនេះពី Apple អស់រយៈពេល 4 ខែ។
បន្ទាប់ពី Wang បានចាកចេញពី Apple ក្រុមហ៊ុន ក៏បានធ្វើការស៊ើបអង្កេតផ្ទៃក្នុង ហើយបានរកឃើញថា Wang បានចូលប្រើទិន្នន័យដែលមានកម្មសិទ្ធិក្នុងរយៈពេលប៉ុន្មានថ្ងៃនៃថ្ងៃដែលគាត់ត្រូវការចាកចេញពី Apple។ នៅក្នុងខែមិថុនា ឆ្នាំ 2018 ភ្នាក់ងារសហព័ន្ធបានវាយឆ្មក់ចូលឆែកឆេរផ្ទះរបស់លោក Wang និងបានរកឃើញ "ទិន្នន័យសំខាន់ៗដ៏ច្រើន" ដែលជាទិន្នន័យរបស់ក្រុមហ៊ុន Apple ។ លោក Wang បានភៀសខ្លួនទៅកាន់ប្រទេសចិនភ្លាមៗបន្ទាប់ពីការវាយឆ្មក់នោះ។
ក្រសួងយុត្តិធម៌អាមេរិកបានចោទប្រកាន់លោក Wang លើពីរករណី៖ គឺការលួចទិន្នន័យសម្ងាត់នៃពាណិជ្ជកម្ម ហើយនិងការដឹកជញ្ជូនអន្តររដ្ឋនៃទ្រព្យសម្បត្តិដែលបានលួច។ ប្រសិនបើត្រូវបានកាត់ទោស Wang អាចប្រឈមនឹងការជាប់ពន្ធនាគាររហូតដល់ ១០ ឆ្នាំសម្រាប់បទចោទនីមួយៗ។ លោក Matt Olsen ប្រធានផ្នែកសន្តិសុខជាតិរបស់ DOJ បាននិយាយថា "យើងមានការប្រុងប្រយ័ត្នខ្ពស់ក្នុងការពង្រឹងច្បាប់របស់សហរដ្ឋអាមេរិកដើម្បីបញ្ឈប់លំហូរនៃបច្ចេកវិទ្យារសើបចំពោះសត្រូវបរទេសរបស់យើង" ។ ហើយ «យើងប្តេជ្ញាធ្វើឱ្យអស់ពីសមត្ថភាពដើម្បីការពារឧបករណ៍ទំនើបទាំងនេះមិនឱ្យធ្លាក់ទៅក្នុងដៃបច្ចាមិត្តបរទេស»។
សម្រាប់បទចោទប្រកាន់លើលោក Wang គឺជាផ្នែកមួយនៃយុទ្ធនាការយ៉ាងទូលំទូលាយដោយរដ្ឋាភិបាលសហរដ្ឋអាមេរិក ដើម្បីទប់ស្កាត់ចារកម្មសេដ្ឋកិច្ច និងការលួចបច្ចេកវិទ្យា។ ក្នុងប៉ុន្មានឆ្នាំថ្មីៗនេះ បុគ្គល និងក្រុមហ៊ុនមួយចំនួនត្រូវបានចោទប្រកាន់ពីបទលួចអាថ៌កំបាំងពាណិជ្ជកម្មពីក្រុមហ៊ុនអាមេរិក។ ករណីនេះគូសបញ្ជាក់ពីសារៈសំខាន់នៃការការពារបច្ចេកវិទ្យារសើបពីការគំរាមកំហែងពីបរទេស៕
