នៅថ្ងៃនេះក្រុមហ៊ុនផលិតរថយន្តអគ្គិសនីម៉ាក Xpeng បានធ្វើការប្រកាសចេញពីគម្រោងក្នុងការផលិតរថយន្តអគ្គិសនីថ្មីដែលបំពាក់នូវប្រព័ន្ធបច្ចេកវិទ្យាបើកបរទំនើបដំបូងសម្រាប់យុវវ័យសម័យថ្មី ឬហៅថា “The First AI-Driven smart cars for youth people”។ ដោយរថយន្តអគ្គិសនីម៉ូដែលថ្មីនេះនឹងមានតម្លៃចន្លោះពីខ្ទង់ $15,213 ទៅ $23,251 នៅទីផ្សារប្រទេសចិន។
រថយន្តអគ្គិសនីយីហៅថ្មី “AI-Defined” របស់ Xpeng នេះ នឹងមានវត្តមានសម្រាប់ទីផ្សារសកល ក្រោយពីការប្រកាសចេញនៅទីផ្សារប្រទេសចិនជាលើកដំបូង។ តាមរូបភាពគំរូនៃរថយន្តថ្មីដំបូងចេញពីម៉ាកយីហោថ្មីរបស់ Xpeng នេះ ជាប្រភេទរថយន្ត EV Sedan ដែលត្រូវចាត់បញ្ចូលនៅក្នុងចំនោមរថយន្តបែប A-Class EV។
ក្រុមហ៊ុន XPeng បាននិយាយនៅក្នុងសេចក្តីប្រកាសព័ត៌មានផ្លូវការរបស់ខ្លួនថា សម្រាប់តម្លៃនេះគឺ "ជាជម្រើសចម្បងសម្រាប់អ្នកប្រើប្រាស់ចិន" ដោយសារ "រថយន្តជាង 8 លានគ្រឿងត្រូវបានលក់ជារៀងរាល់ឆ្នាំ"។ ដូច្នេះ បានបង្ហាញថា គឺមាន "តម្រូវការទីផ្សារខ្ពស់" និង "សក្តានុពលនៃការអភិវឌ្ឍន៍ខ្លាំង"។ សម្រាប់ជួរនៃតម្លៃរថយន្តដ៏ល្អនេះ គឺមានចំនួន 34% នៃទីផ្សារលក់រថយន្តនៅប្រទេសចិនកាលពីឆ្នាំមុន ដែលកើនឡើងពី 31% ធៀបនឹងឆ្នាំ 2022។
Xpeng បានធ្វើការកត់សំគាល់ឃើញថា បច្ចុប្បន្ន គឺមានការផលិតរថយន្តដែលបំពាក់នូវប្រព័ន្ធបើកបរឆ្លាតវៃជាមួយប្រព័ន្ធបច្វេកវិទ្យា AI-Driven Smart Drive តែមួយចំនួនប៉ុណ្ណោះ។ ហើយនៅពេលអនាគត “AI-Defined” ដែលជាស្លាកយីហោរថយន្តថ្មីរបស់ Xpeng នឹងផ្តល់នូវជម្រើសរថយន្តជាច្រើនដែលមានបំពាក់នូវប្រព័ន្ធបច្ចេកវិទ្យាខុសៗគ្នាសម្រាប់សមត្ថភាពក្នុងការបើកបរដ៏ឆ្លាតវៃ ដែលផ្តល់ឱ្យអ្នកប្រើប្រាស់នូវបទពិសោធន៍បើកបរឆ្លាតវៃល្អបំផុតសម្រាប់ការប្រើប្រាស់រថយន្តប្រចាំថ្ងៃ"។
បើតាមការបញ្ជាក់ពី Xpeng សម្រាប់រថយន្ត AI-Defined ឬ AI-Driven ដែលនឹងមកដល់់នៅពេលអនាគតខាងមុខនេះ នឹងគាំទ្រដំណើរការដោយប្រព័ន្ធបច្ចេកវិទ្យាកម្រិត "L2-level-and-above ADAS”។ Xpeng មានគម្រោងក្នុងការបំពាក់នូវប្រព័ន្ធឆ្លាតវៃ AI-Large Models សម្រាប់រថយន្ត ដោយនឹងចាប់ផ្តើមក្នុងការផលិតបច្ចេកវិទ្យា AI ក្នុងបរិមាណច្រើន ដើម្បីផ្តល់ជួយនៅជំនួយការសម្រាប់ឧស្សាហកម្មរថយន្តចាប់ពីត្រីមាសទីពីរ ក្នុងឆ្នាំ 2024 នេះទៅ។
បន្ថែមពីនេះ Xpeng បានធ្វើការអះអាងថា ប្រព័ន្ធ XNGP ADAS របស់ខ្លួនទទួលបានការកោតសរសើរ និងទំនុកចិត្តក្នុងការប្រើប្រាស់ខ្លាំង ព្រមទាំងទទួលបានភាពឈានមុខគេសម្រាប់ការប្រើប្រាស់ជាប្រចាំ ហើយដើម្បីរក្សាភាពឈានមុខគេ Xpeng គ្រោងនឹងធ្វើការវិនិយោគទឹកប្រាក់បន្ថែមចំនួន 3.5 ពាន់លានយ៉ាន់ ឬជា $492 លានដុល្លារ នៅក្នុងមជ្ឈមណ្ឌលស្រាវជ្រាវ និងអភិវឌ្ឍន៍ (R&D) របស់ខ្លួន ព្រមទាំងប្រកាសជ្រើសរើសបុគ្គលិកថ្មីបន្ថែមចំនួន 4,000 នាក់ថែមទៀតផង៕
