នេះគឺជាឡានភីកអាប់អគ្គិសនី Chevrolet Silverado EV ស៊េរីឆ្នាំ 2026 ដែលទើបតែបានបង្ហាញខ្លួនជាផ្លូវការ ដោយមានតម្លៃចាប់ពីខ្ទង់ $54,000 ដល់ $88,000 នៅលើទីផ្សារសហរដ្ឋអាមេរិក។ Chevrolet Silverado EV ឆ្នាំ 2026 ថ្មីនេះ ចែកចេញជា 3 ម៉ូដែល គឺ Work Truck, LT និង Trail Boss ហើយក្នុងម៉ូដែលនិមួយៗ មាន 3 ប្រភេទដូចគ្នា គឺ Standard មានចម្ងាយបើកបរខ្ទង់ 460 KM, Extended មានចម្ងាយបើកបរខ្ទង់ 680 KM និង Max មានចម្ងាយបើកបរខ្ទង់ 790 KM។
ចំពោះម៉ូដែល Extended អាចអូសសណ្តោងបានទម្ងន់ 5.6 តោន និង ដឹកបានទម្ងន់ 950 គីឡូគ្រាម ខណៈម៉ូដែល Max ប្រើម៉ូទ័រអគ្គិសនី 2 និង ប៉ុង 2 (4WD) មានកម្លាំង 725 HP និង កម្លាំងរមួល 1,049 NM។ ដោយឡែក សម្រាប់ការសាកភ្លើងវិញ វាគាំទ្រការសាកល្បឿនលឿន 350 kW DC Fast Charging ដែលអាចឲ្យវាសាកភ្លើងត្រឹម 10 នាទី អាចជិះបាន 160 KM។ អ្វីដែលពិសេសនោះគឺ វានឹងមានបំពាក់ប្រព័ន្ធ PowerBase Charging System ដែលប្រៀបបីដូចជា ប្រែក្លាយភីកអាប់អគ្គិសនីមួយនេះ ទៅជាម៉ាស៊ីនភ្លើងអីចឹង ដោយអ្នកអាចសាកឧបករណ៍ប្រើប្រាស់ផ្សេងៗ រហូតដល់ទៅ 10 គ្រឿងឯណោះ។
គួរឲ្យដឹងដែរថា ចំពោះម៉ូដែល Trail Boss នឹងលើកកម្ពស់ 2 អ៊ីញមកស្តង់ដារ ដែលជួយឲ្យវាមានកម្ពស់ពីបាតឡានទៅដី ខ្ពស់ជាងម៉ូដែលផ្សេងទៀត 24%។ មិនតែប៉ុណ្ណោះ Chevrolet ក៏បានធ្វើការ Tuned ទៅលើប្រព័ន្ធជើងក្រោម ដូចជា រឺស័រ និង Rebound Control System ព្រមទាំងបន្ថែមមុខងារ Terrain Mode ដែលជាមុខងារកំណត់ល្បឿនថេរ សម្រាប់ការ Off-road នៅល្បឿនយឺត និង ប្រព័ន្ធចង្កូត 4-Wheel Steering សម្រាប់ការឆ្លើយតបនៃប្រព័ន្ធចង្កូត កាន់តែប្រសើរ នៅពេលបើកបរ Off-road ផងដែរ។
លើសពីនេះទៅទៀត សម្រាប់ម៉ូដែល Trail Boss ក៏បានបំពាក់នូវសំបកកង់ ប្រភេទ All-terrain ទំហំ 35 អ៊ីញ ស្រោបលើយ៉ាន់កង់ ទំហំ 18 អ៊ីញ, បន្ថែមទំពក់អូសពណ៌ក្រហម និង តែមនៅលើតួខ្លួនផ្នែកខាងក្រៅ ដើម្បីឲ្យវាមានសភាពលេចធ្លោជាងគេ ទៀតផង។
មិនតែប៉ុណ្ណោះ គ្រប់ម៉ូដែល Chevrolet Silverado EV ឆ្នាំ 2026 ទាំងអស់ នឹងមានបំពាក់ប្រព័ន្ធជំនួយការបើកបរ Super Cruise ដែលដំណើរការជាមួយ Google Maps ដោយផ្ទាល់ តែម្តង ហើយប្រព័ន្ធនេះ នឹងអនុញ្ញាតឲ្យអ្នកបើកបរ ដកដៃចេញពីចង្កូតឡាន ហើយជួយឲ្យឡានស្ថិតនៅចំកណ្តាលគន្លងផ្លូវ និងសម្របខ្លួនតាមឡានខាងមុខ ផងដែរ។
