រថយន្ត Plug-in-hybrid sedan ស៊េរីថ្មី Galaxy Starshine 7 របស់ Geely នឹងមកដល់ទីផ្សារក្នុងពេលឆាប់ៗនេះ។ ហើយថ្មីៗនេះស្ថាប័ន MIIT ប្រទេសចិនបានធ្វើការបង្ហាញចេញនូវលក្ខណៈសម្បត្តិមួយចំនួនរបស់ឡាន PHEV sedan ស៊េរីថ្មីនេះរួចហើយដែរ។ បើតាមរូបភាពដែលបានទម្លាយចេញមកនេះ បានបង្ហាញថា Galaxy Starshine 7 នៅតែរក្សាភាសាឌីស្សាញរូបរាងដូចគ្នានឹងគ្រួសារ Starshine Series ដែរ។ ឡាន PHEV Sedan ថ្មីនេះ មានប្រវែងដងខ្លួនជិត 5 ម៉ែត្រ រួមនឹងបំពាក់នូវប្រព័ន្ធបច្ចេកវិទ្យាជំនាន់ថ្មី NordThor Hybrid 2.0។
ទៅលើការឌីស្សាញផ្នែកខាងមុខរបស់ Galaxy Starshine 7 PHEV ថ្មីនេះ គឺមានភាពស្រដៀងគ្នាច្រើនទៅនឹងម៉ូដែល Galaxy Starshine 6 បច្ចុប្បន្ន ក្នុងនោះមានដូចជាការឌីស្សាញផ្នែកប៉ាណាមុខរាងបញ្ឍរបែបស្ទាយ Waterfall ជាមួយដៃទ្វារធម្មតា ហើយនៅផ្នែកខាងក្រោយមានការឌីស្សាញរំលេចសោភណ្ឌភាពដោយបណ្តុំចង្កៀងរចនាបែបស្លីមភ្ជាប់ជាមួយស្តុបអូសកាត់ពីម្ខាងទៅម្ខាង និងមានអក្សរ GEELY នៅកណ្តាល។ ជាមួយគ្នានេះ យើងក៏ឃើញមានសែនស័រកាមេរ៉ានៅលើថ្ពាល់ចំហៀង មានយ៉ាន់កងកាំរាយ សែនស័រ radar និងកញ្ចក់ឯកជនភាពជាដើម។ Galaxy Starshine 7 នឹងមានជម្រើសប្រើសម្បកកង់ខ្នាត 225/55R18/235/45R19។
ឡាន Plug-in-hybrid Sedan ជំនាន់ថ្មីនេះ មានបណ្តោយ 4,958mm/ ទទឹង 1,915mm/ កំពស់ 1,505mm និងគម្លាតរវាងកង់មុខទៅកង់ក្រោយ 2,852mm។ Galaxy Starshine 7 PHEV មានទំងន់ 1,850kg និង 1,860kg អាស្រ័យទៅលើទំហំកញ្ចប់ថ្ម។ ចំពោះប្រព័ន្ធ NordThor AI hybrid 2.0 ជំនាន់ថ្មីដែលដំណើរការនៅលើ Starshine 7 គឺត្រូវពឹងផ្អែកទៅលើម៉ាស៊ីនសាំង 1.5L លេខ BHE15-BFN ដែលមានកម្លាំង 110 សេះ (82kW) និងភ្ជាប់ជាមួយកញ្ចប់ថ្មប្រភេទ lithium iron phosphate រួមនឹងប្រព័ន្ធម៉ូទ័រអគ្គិសនីមួយ។ យ៉ាងណាមិញសម្រាប់កំលាំងម៉ូទ័រ និងទំហំថ្មរបស់ Galaxy Starshine 7 នៅមិនទាន់បានបង្ហាញលម្អិតនៅឡើយទេ។
ងាកមកម៉ូដែល Galaxy Starshine 6 បច្ចុប្បន្ន ដែលដំណើរការដោយប្រព័ន្ធ NordThor Hybrid 2.0 វិញ គឺប្រើម៉ាស៊ីន 1.5L កំលាំង 82kW និងមានម៉ូទ័រអគ្គិសនីមួយកំលាំង 120kW រួមនឹងកញ្ចប់ថ្មទំហំ 8.5kWh និង 17kWh Lithium iron phosphate battery ដែលសាកភ្លើងពេញម្តងជាជិះបានចម្ងាយ 60km និង 125km ដោយប្រើថាមពលថ្មសុទ្ធ។ បច្ចុប្បន្នតម្លៃរបស់ Galaxy Starshine 6 គឺមានចន្លោះពី $12,025 ទៅ $16,650 ចំនែក Galaxy Starshine 8 មានតម្លៃចន្លោះពី $16,300 ទៅ $21,900 នៅទីផ្សារប្រទេសចិន។ យ៉ាងណាមិញសម្រាប់តម្លៃរបស់ Galaxy Starshine 7 PHEV ថ្មីនៅមិនទាន់ដឹងនៅឡើយទេ៕
