នេះគឺជាម៉ាស៊ីនកុំព្យូទ័រយួរដៃស៊េរីថ្មីរបស់ MSI ម៉ូដែល GS76 Stealth។ កុំព្យូទ័រយួរដៃស៊េរីថ្មីនេះ ត្រូវបាន MSI ធ្វើការផលិតឡើងសម្រិតសម្រាំងយ៉ាងពិសេសសម្រាប់តម្រូវការប្រើប្រាស់ក្នុងកិច្ចការងារប្រចាំថ្ងៃ។ MSI GS76 Stealth ត្រូវក្រុមហ៊ុននាគរាជរបស់តៃវ៉ាន់មួយនេះរចនាឡើងមកបង្ហាញពីប្រណិតភាព ទាន់សម័យ និងភាពរឹងមាំបែប Premium សម្រាប់ការប្រើប្រាស់។
MSI GS76 Stealth ត្រូវបានក្រុមហ៊ុនដំឡើងមកនូវគ្រឿងបង្គុំខាងក្នុងម៉ាស៊ីនសុទ្ធតែខ្លាំងៗ និងប្រើនូវបច្ចេកវិទ្យាទំនើបៗដើម្បីសម្រួលដល់ការប្រើប្រាស់ឲ្យមានប្រសិទ្ធិភាពខ្ពស់បំផុត។
នៅក្នុងម៉ាស៊ីនរបស់ GS76 Stealth បានដំឡើងមកជាមួយ CPU ជំនាន់ចុងក្រោយបំផុតរបស់ Intel គឺ Intel-11th Generation Core i9 ដែលមាន 8-Core មានល្បឿនខ្ពស់បំផុតដល់ 4.9GHz គាំទ្រដោយមុខងារ Dual Core Turbo ដែលប្រើនូវប្រព័ន្ធ Intel® Turbo Boost Max Technology 3.0 (ITBM3.0) ដើម្បីជួយបង្កើនល្បឿនប្រើប្រាស់ដោយស្វ័យប្រវត្តិនៅពេលអូសការងារធំៗ។
ជាមួយគ្នានេះម៉ាស៊ីនរបស់ GS76 Stealth មានភ្ជាប់ជាមួយអង្គ GPU របស់ Nvidia ស៊េរីចុងក្រោយ GeForce RTX3080 ដែលមាន GDDR6 ទំហំធំបំផុតដល់ 16GB និងគាំទ្រល្បឿនប្រតិបត្តិការដោយរ៉េមស៊េរី DRR4-3200MHz ដែលគាំទ្រទំហំបានធំបំផុតដល់ 64GB តម្រូវតាមទំហំការងារប្រើប្រាស់ជាក់ស្តែងរបស់លោកអ្នក។ សម្រាប់ថាសផ្ទុកទិន្នន័យដែលបំពាក់នៅលើកុំព្យូទ័រយួរដៃស៊េរីថ្មីគឺជាប្រភេទថាសល្បឿនលឿន M.2 SSD ដែលប្រើនូវបច្ចេកវិទ្យាឆ្លាស់ទិន្នន័យ PCIe Gen 4។
បន្ថែមពីនេះនៅក្នុងប្រព័ន្ធម៉ាស៊ីនរបស់ MSI GS76 Stealth ក៏មានតម្លើងមកជាមួយប្រព័ន្ធបន្សាបកំដៅក្នុងម៉ាស៊ីនជាមួយនឹងបំពងសារធាតុត្រជាក់ចំនួន 6 ដើមភ្ជាប់នូវបច្ចេកវិទ្យា Cooler Boost Technology រួមជាមួយប្រព័ន្ធកង្ហាលត្រជាក់ចំនួន 3 ប្រើនូវប្រព័ន្ធ Cooler Boost Trinity+ ដើម្បីជួយសម្រួលដល់លំហូរកំដៅចេញពីក្នុងម៉ាស៊ីនបានល្អប្រសើរដល់ទៅ 15%។
ជាមួយគ្នានេះ MSI GS76 Stealth បានបំពាក់មកជាមួយថ្មទំហំធំដល់ទៅ 99.9Whr ដែលសាកពេញម្តងមានលទ្ធភាពកាន់ប្រើប្រាស់ជាប់បានដល់ 11 ម៉ោង។
ចូលមកផ្នែកអេក្រង់វិញ MSI GS76 Stealth មានបំពាក់នូវបន្ទះអេក្រង់មានល្បឿន refresh rate ខ្ពស់ដល់ទៅ 360Hz ទំហំធំដល់ទៅ 17.3 អ៊ីញផ្តល់នូវភាពទូលាយស្រឡះល្អសម្រាប់បំពេញកិច្ចការងារ។
ហើយអ្វីដែលធ្វើឲ្យផ្ទៃអេក្រង់របស់ GS76 Stealth មើលទៅកាន់តែស្រឡះល្អក៏ដោយសារតែគែមអេក្រង់របស់វាមានកម្រាស់ស្តើងត្រឹមតែ 4.9mm ប៉ុណ្ណោះ ហើយនៅលើគែមខាងលើក៏មានបង្កប់កាមេរ៉ាវ៉ិបខេមមួយគ្រាប់កម្រិត HD-720px ផងដែរ។ បន្ទះអេក្រង់របស់ MSI GS76 Stealth ជាប្រភេទបន្ទះបង្ហាញ IPS LCD គាំទ្រកម្រិតបង្ហាញ Full-HD នៅលើផ្ទៃបង្ហាញចេញសរុបប្រមាណជា 84%។
សម្រាប់មុខងារសំខាន់ៗមួយចំនួនទៀតដែលមាននៅលើ MSI GS76 Stealth គឺមានដូចជា រន្ធ Thunderbolt 4/USB-C 3.2 សម្រាប់សាកភ្លើង និងផ្ទេរទិន្នន័យ, USB-A3.2, Ethernet RJ45, Wi-Fi 6, Bluetooth 5.2, HDMI ដែលមានសមត្ថភាពបញ្ចូនរូបភាពបានដល់កម្រិត 8K@60Hz/ 4K@120Hz និងរន្ធដាក់ម៉េមូរីកាតប្រភេទ SD ជាដើម៕
