ក្រុមហ៊ុនផលិតស្មាតហ្វូនរបស់ប្រទេសចិន Xiaomi កំពុងតែសម្លឹងមើលក្នុងការបោះជំហានថ្មីមួយទៀតនៅក្នុងផ្នែកឧស្សាហកម្មចល័តជាមួយនឹងការបង្ហាញនូវស្មាតហ្វូនស៊េរីថ្មីមួយគ្រឿងទៀតដែលប្រើប្រាស់នូវបន្ទះឈីបថ្មីដែលផលិតដោយក្រុមហ៊ុនផ្ទាល់តែម្តង នេះបើតាមការបញ្ជាក់នៃរបាយការណ៍ដែលត្រូវបានចុះផ្សាយនៅលើសារព័ត៌មាន The Wall Street Journal ។
សារព័ត៌មានដ៏ធំមួយនេះបានចុះផ្សាយថា ក្រុមហ៊ុនបច្ចេកវិទ្យារបស់ប្រទេសចិនជាច្រើនបានចាប់ផ្តើមនូវការវិនិយោគកាន់តែខ្លាំងទៅលើបច្ចេកវិទ្យារបស់ពួកគេដើម្បីធ្វើឱ្យមានភាពខុសប្លែកគ្នាដើម្បីទទួលបានការគាំទ្រពីអ្នកប្រើប្រាស់របស់ខ្លួន។ ការបង្កើតនូវបន្ទះឈីបផ្ទាល់ខ្លួននឹងជួយឱ្យក្រុមហ៊ុនបច្ចេកវិទ្យាទាំងនេះកាត់បន្ថយនូវការផ្គត់ផ្គង់ពីខាងក្រៅពិសេសក្រុមហ៊ុន MediaTek និងក្រុមហ៊ុន Qualcomm ។ ប្រភពព័ត៌មានបានអះអាងថា បន្ទះឈីប “Pinecone” របស់ក្រុមហ៊ុន Xiaomi គ្រោងនឹងធ្វើការផលិតឱ្យបញ្ចប់ជារួចរាល់ក្នុងរយៈពេលត្រឹមតែ 1 ខែប៉ុណ្ណោះ។ ប្រសិនបើព័ត៌មាននេះជាការពិតនោះ ក្រុមហ៊ុន Xiaomi នឹងក្លាយជាក្រុមហ៊ុនបច្ចេកវិទ្យាទីពីរហើយរបស់ប្រទេសចិនដែលផលិតនូវបន្ទះឈីបផ្ទាល់ខ្លួននោះបន្ទាប់ពីក្រុមហ៊ុន Huawei ។
នៅក្នុងឆ្នាំ 2014 ក្រុមហ៊ុន Xiaomi មានកុលបុត្រសម្ព័ន្ធមួយឈ្មោះថា Beijing Pinecone Electronics ដែលទិញយកមកពីក្រុមហ៊ុនបច្ចេកវិទ្យា Leadcore Technology Ltd នៅក្នុងតម្លៃ 15 លានដុល្លារអាមេរិច នេះបើតាមការបញ្ជាក់របស់ Journal ។ ក្រុមហ៊ុន Beijing Pinecone Electronics គឺជាក្រុមហ៊ុនផលិតនូវបន្ទះឈីបរបស់ក្រុមហ៊ុន Xiaomi ។ សារព័ត៌មាន Journal បានបន្ថែមថា វាមានភស្តុតាងនៃការបញ្ជាក់នៅលើវេបសាយ និងការបញ្ជាក់នៅក្នុងគណនីនៃបណ្តាញសង្គមអំពីការអភិវឌ្ឍនៃបន្ទះឈីបរបស់ក្រុមហ៊ុន Xiaomi ។
ទោះបីជាអាចបង្កើតនូវបន្ទះឈីបថ្មីដោយខ្លួនឯងក្តី វានៅមិនទាន់មានការបណ្តាក់ទុនច្រើនសម្រាប់ក្រុមហ៊ុន Xiaomi នោះទេ។ ក្រុមហ៊ុនបច្ចេកវិទ្យាជាច្រើនដូចជាក្រុមហ៊ុន Apple បានទទួលនូវផលចំណេញជាច្រើនទៅលើការផលិតនូវបន្ទះ Hardware និង Software ដោយខ្លួនឯង ប៉ុន្តែសម្រាប់ក្រុមហ៊ុន Xiaomi នៅមិនទាន់អាចធ្វើការផលិតនូវកម្មវិធី Software បានដោយខ្លួនឯងនៅឡើយទេ។ ជាមួយគ្នានេះផងដែរជាច្រើនឆ្នាំមកនេះ សម្រាប់ក្រុមហ៊ុន Huawei វិញបានទទួលនូវផលប្រយោជន៍ជាច្រើនអំពីឧបករណ៍បណ្តាញ Network របស់ខ្លួន និងផលិតផលជាច្រើនទៀតផងដែរ៕