ស្មាតហ្វូន Samsung Galaxy S8 នៅសល់រយៈពេលមួយខែទៀត ដែលលោកអ្នក នឹងបានមើលឃើញ និងបានលឺអំពីពាក្យចចាមអារ៉ាមជាច្រើន អំពីវាមុនពេលដែលស្មាតហ្វូននេះនឹងដាក់បង្ហាញខ្លួននៅថ្ងៃទី 29 ខែមីនាខាងមុខនេះ។ ពេលនេះ យើងបានមើលឃើញអំពីព័ត៌មានបែកធ្លាយរបស់ស្មាតហ្វូននេះទៀតហើយ។ រោងចក្រផលិតនូវសម្បកទូរស័ព្ទដ៏ធំមួយនៅក្នុងប្រទេសចិនពេលនេះបានទម្លាយនូវរូបភាពជាច្រើនសន្លឹកដែលអះអាងថាជាស្មាតហ្វូនស៊េរីថ្មី Samsung Galaxy S8 ។
តាមរយៈរូបភាពទាំងនេះ យើងអាចមើលឃើញថាស្មាតហ្វូននេះនឹងប្រើប្រាស់នូវបន្ទះអេក្រង់គែមកោង។ នៅផ្នែកខាងលើនៃផ្ទៃខាងមុខ ស្មាតហ្វូននេះបំពាក់នូវសែនស័រជាច្រើនរួមជាមួយនឹងកាមេរ៉ាផងដែរ ហើយលោកអ្នកប្រាកដជាមើលឃើញនូវ Iris Scanner ដែលជាប្រព័ន្ធសុវត្ថិភាពមួយស្កែនដោយប្រស្រីភ្នែក។ នៅផ្នែកខាងក្រោមនៃទូរស័ព្ទនេះវិញ យើងអាចមើលឃើញនូវរន្ធដោត 3.5mm Jack, USB-C និង Speaker ដែលផលិតដោយក្រុមហ៊ុន Harman ។
អ្វីដែលកាន់តែអស្ចារ្យថែមទៀតនោះ ស្មាតហ្វូននេះនឹងប្រើប្រាស់នូវ Grace UX Menu ដែលពិតជាងាយស្រួលក្នុងការប្រើប្រាស់ និងផ្តល់នូវលក្ខណៈពិសេសជាច្រើនទៀត។ ស្មាតហ្វូន Samsung Galaxy S8 ប្រហែលជានឹងមិនមានស៊ុមព័ទ្ធជុំវិញអេក្រង់តូចដូចស្មាតហ្វូន Xiaomi Mi Mix នោះទេ ប៉ុន្តែទំហំអេក្រង់របស់ស្មាតហ្វូន Galaxy S8 ពិតជាទាក់ទាញមែនទែន។ ស្មាតហ្វូន Samsung Galaxy S8 នឹងមានពីរជម្រើសអេក្រង់សម្រាប់ជ្រើសរើសគឺទំហំ 5.7 អ៊ីង និង 5.8 អ៊ីង។ ចំនែកស្មាត ហ្វូន Galaxy S8+ នឹងមានអេក្រង់ទំហំ 6.2 អ៊ីង។ ស្មាតហ្វូននេះនឹងប្រើប្រាស់នូវបន្ទះឈីបថ្មីចុងក្រោយ Snapdragon 835 ហើយវានឹងបំពាក់នូវប្រព័ន្ធស្កែន ក្រយ៉ៅ ដៃនៅផ្នែកខាងក្រោយ រួមជាមួយនឹងជំនួយការឆ្លាតវៃ Bixby AI ថែមទៀតផង៕
