ក្រុមហ៊ុនបច្ចេកវិទ្យាយក្សរបស់ប្រទេសកូរ៉េខាងត្បូង Samsung បានចាប់ផ្តើមនូវការផលិតស្មាតហ្វូន Galaxy S8 នៅក្នុងចំនួនយ៉ាងច្រើននៅក្នុងរោងចក្រផលិតរបស់ខ្លួននៅក្នុងប្រទេសវៀតណាម ហើយក្រុមហ៊ុនរំពឹងថា ក្រុមហ៊ុននឹងលក់បានចំនួនច្រើនជាង 10 លានគ្រឿងសម្រាប់ព្រឹត្តិការណ៍ “Next Big Thing” ខាងមុខនេះ។ យោងទៅតាមរបាយការណ៍មួយរបស់ប្រព័ន្ធផ្សព្វផ្សាយ Naver របស់ប្រទេសកូរ៉េ បានបញ្ជាក់ថា ក្រុមហ៊ុន Samsung នឹងប្រកាសបង្ហាញនូវស្មាតហ្វូនស៊េរីថ្មីចំនួន 2 ម៉ូដែលគឺ Galaxy S8 និង Galaxy S8 Plus ដែលស្មាតហ្វូនទាំងពីរនេះ សុទ្ធតែមានអេក្រង់គែមកោង អេក្រង់ Full Screen ដូចគ្នាគ្រាន់តែខុសគ្នាទៅលើទំហំ និងថាមពលថ្មតែប៉ុណ្ណោះ។
ក្រុមហ៊ុន Samsung ក៏កំពុងតែត្រៀមខ្លួនក្នុងការវាយលុកទីផ្សារពិភពលោកជាមួយនឹងវត្តមានរបស់ស្មាតហ្វូន Galaxy S8 ហើយក្រុមហ៊ុនប្រហែលជាចាប់ផ្តើមលក់ស្មាតហ្វូននេះនៅក្នុងកាលបរិច្ឆេទដូចគ្នាសម្រាប់ទីផ្សារពិភពលោករបស់ខ្លួន។ របាយការណ៍នេះ បានបន្ថែមទៀតថា ក្រុមហ៊ុន Samsung នឹងធ្វើការផលិតស្មាតហ្វូនត្រកូល Galaxy S8 ចំនួន 4.7 លានគ្រឿងនៅក្នុងខែមីនា និង 7.8 លានគ្រឿងនៅក្នុងខែមេសា។ ចំនួនសរុបនៃស្មាតហ្វូននេះ មានចំនួនដល់ទៅ 12.5 លានគ្រឿងសម្រាប់ខែដំបូងនៃការបង្ហាញខ្លួនរបស់ Galaxy S8 នៅថ្ងៃទី 29 ខែមីនា ហើយវា គ្រោងនឹងដាក់លក់ឆាប់ៗបន្ទាប់ពីប្រកាសបង្ហាញខ្លួនជាផ្លូវការផងដែរ។
វានៅមិនទាន់មានព័ត៌មានលម្អិតណាមួយសម្រាប់ស្មាតហ្វូន Samsung Galaxy S8 និង Galaxy S8 Plus នៅឡើយទេ ប៉ុន្តែសូមលោកអ្នកកត់សម្គាល់ថាស្មាតហ្វូន Galaxy S8 នឹងមានអេក្រង់ទំហំដល់ទៅ5.8 អ៊ីងដែលមានកម្រិត 2:1 Aspect Ratio ហើយវាមានរូបរាងខ្ពស់ជាងស្មាតហ្វូន Galaxy S7 ដែលពិតជាងាយស្រួលមែនទែនក្នុងការប្រើប្រាស់ដៃម្ខាងដើម្បីកាន់។ ចំនែកស្មាតហ្វូន Galaxy S8 Plus វិញត្រូវបានគេដឹងថា នឹងមានអេក្រង់ធំជាងទំហំអេក្រង់របស់ស្មាតហ្វូន Galaxy S7 Edge ៕
