ខណៈពេលដែលស្មាតហ្វូនស៊េរីថ្មី Samsung Galaxy S8 និង Samsung Galaxy S8+ ចាប់ផ្តើមដាក់លក់នៅក្នុងសប្តាហ៍ដំបូងរបស់ខ្លួនហើយនៅហាងចែកចាយធំៗ និងក្រុមហ៊ុនលក់រាយជាច្រើន អ្នកវិភាគម្នាក់មកពី Yuanta Securities និយាយថា ក្រុមហ៊ុនបច្ចេកវិទ្យាយក្សរបស់កូរ៉េខាងត្បូងមួយនេះ នឹងលក់ស្មាតហ្វូនស៊េរីថ្មីនេះ ទូទាំងពិភពលោកបានចំនួន 50.4 លានគ្រឿងក្នុងឆ្នាំនេះ។ លោក Lee Jae-yoon សរសេនៅក្នុងលិខិតមួយនៅថ្ងៃនេះថា លោកមើលឃើញអំពីកំណើនកើនឡើងខ្លាំងនៃស្មាតហ្វូន Samsung Galaxy S8+ នៅក្នុងការលក់ឆ្នាំ 2017 នេះ។ នោះ គឺដោយសារតែអ្នកប្រើប្រាស់ជាច្រើននាក់ពេញនិយមក្នុងការលេងហ្គេម និងការទស្សនាវីដេអូនៅលើស្មាតហ្វូនដែលមានអេក្រង់ធំ។
យោងទៅតាមលោក Lee Jae-yoon ការលក់ស្មាតហ្វូន Samsung Galaxy S8+ នឹងមានចំនួនរហូតទៅដល់ 27.1 លានគ្រឿង ដែលស្មើនឹង 53.9% នៃការលក់ស្មាតហ្វូនសរុបរបស់ក្រុមហ៊ុនបច្ចេកវិទ្យា Samsung នៅក្នុងឆ្នាំ 2017 ខណៈពេលដែលស្មាតហ្វូន Galaxy S8 នឹងលក់បានត្រឹមចំនួន 23.3 លានគ្រឿងដែលស្មើនឹង 46.1% ។ ដោយសារតែស្មាតហ្វូន Galaxy S8+ មានតម្លៃថ្លៃជាងតិចតួចបើធៀបជាមួយនឹងស្មាតហ្វូន Galaxy S8 ទើបធ្វើឱ្យកំណើននៃការលក់កើនឡើងខ្លាំងនៅក្នុងឆ្នាំនេះ។
ស្មាតហ្វូន Samsung Galaxy S8 និង Samsung Galaxy S8+ មានលក្ខណៈសម្បត្តិដូចគ្នាច្រើន ខុសគ្នាតែតិចតួចប៉ុណ្ណោះ។ អេក្រង់របស់ស្មាតហ្វូន Galaxy S8+ មានទំហំ 6.2 អ៊ីងបើធៀបជាមួយនឹងអេក្រង់របស់ស្មាតហ្វូន Galaxy S8 មានទំហំត្រឹមតែ 5.8 អ៊ីងប៉ុណ្ណោះ។ ស្មាតហ្វូន Galaxy S8+ មានថាមពលថ្មធំទំហំ 3500mAh ខណៈពេលដែលស្មាតហ្វូន Galaxy S8 មានថាមពលថ្មទំហំ 3000mAh ។
កំណើននៃការកម្មង់ទិញស្មាតហ្វូនស៊េរីថ្មី Galaxy S8+ របស់ក្រុមហ៊ុនបច្ចេកវិទ្យា Samsung កើនឡើងខ្លាំងមិនមែនជារឿងដែលថ្មីនោះទេ។ ជាក់ស្តែង ស្មាតហ្វូន Samsung Galaxy S6 edge និង Samsung Galaxy S7 edge លក់បានច្រើនខ្ពស់ជាងស្មាតហ្វូន Samsung Galaxy S6 និង Samsung Galaxy S7 ។ ការលក់របស់ស្មាតហ្វូន Galaxy S6 edge នៅក្នុងឆ្នាំ 2015 មានចំនួន 51.3% ខណៈពេលដែលការលក់ស្មាតហ្វូន Galaxy S7 edge នៅក្នុងឆ្នាំ 2016 មានចំនួន 51.9% ។ ភាពខុសគ្នានៅក្នុងឆ្នាំនេះគឺទៅលើទំហំនៃអេក្រង់ស្មាតហ្វូនស៊េរីថ្មីនេះដែលមានគែមកោងបើធៀបជាមួយនឹងស្មាតហ្វូន Galaxy S6, Galaxy S6 edge, Galaxy S7 និង Galaxy S7 edge គឺមានតែស៊េរី ‘Edge’ ប៉ុណ្ណោះដែលមានគែមកោង៕