ពីមួយថ្ងៃទៅមួយថ្ងៃ ព័ត៌មានរបស់ស្មាតហ្វូនស៊េរីថ្មី HTC U11 បន្តរចែកចាយនៅលើអ៊ីនធឺណិត ហើយស្របពេលជាមួយគ្នានេះវាក៏មានព័ត៌មានអំពីស្មាតហ្វូនស៊េរីថ្មីត្រកូល Pixel 2 និង Pixel XL 2 ផងដែរ។ នៅថ្ងៃនេះ ក្រុមអ្នកអភិវឌ្ឍ XDA Developers បង្ហាញថា ពួកគេបាននិយាយជាមួយនឹងប្រភពមួយដែលអះអាងទម្លាយនូវលក្ខណៈសម្បតិ្តរបស់ស្មាតហ្វូនស៊េរីថ្មី Pixel 2 នេះ។ យោងតាមប្រភពមួយដែលបញ្ជាក់អោយដឹងពី XDA អេក្រង់របស់ស្មាតហ្វូនស៊េរីថ្មី Pixel 2 (Walleye) នឹងមានអេក្រង់ទំហំ 5 អ៊ីងកម្រិតភាពច្បាស់ 1080P។ ស្មាតហ្វូន Pixel 2 នឹងមានការរចនាស៊ុមព័ទ្ធអេក្រង់ដូចគ្នាទៅនឹង Google Pixel ដែរ។ ស្មាតហ្វូននេះនឹងបំពាក់បន្ទះឈីប Snapdragon 835 chipset រ៉េមផ្ទុកទិន្នន័យបណ្តោះអាសន្នទំហំ 4GB ម៉េមូរីក្នុងម៉ាស៊ីនទំហំ 64GB និងរន្ធដោតកាសស្តាប់ 3.5 mm headphone jack ថែមទៀត។
ប្រភពដែលបានអះអាងពី XDA បន្ថែមទៀតថា សម្រាប់ស្មាតហ្វូន Google Pixel XL 2 នឹងមានអេក្រង់ធំ ហើយវាមានលេខកូដ Taimen ។ ស្មាតហ្វូននេះ នឹងភ្ជាប់ជាមួយអេក្រង់ OLED screen ទំហំ 6 អ៊ីងដែលផលិតដោយក្រុមហ៊ុនបច្ចេកវិទ្យា LG ជាមួយកម្រិតភាពច្បាស់ 1440x2560 ភិចសែល។ ស៊ុមព័ទ្ធជុំវិញអេក្រង់របស់ស្មាតហ្វូននេះស្តើង ជាពិសេសវាដំណើរការនូវបន្ទះឈីប Snapdragon 835 SoC រ៉េមផ្ទុកទិន្នន័យបណ្តោះអាសន្នទំហំ 4GB និងម៉េមូរីក្នុងម៉ាស៊ីនទំហំ 128GB ។ ផ្នែកខាងក្រោយរបស់ស្មាតហ្វូននេះ ធ្វើពីលោហធាតុជាមួយនឹងកញ្ចក់ ប៉ុន្តែកញ្ចក់របស់វានៅមិនទាន់មានលទ្ធភាពបង្កប់នូវប្រព័ន្ធស្កែនក្រយ៉ៅដៃនៅឡើយទេ។ នៅផ្នែកខាងក្រោយមានកាមេរ៉ាតែមួយគត់ភ្ជាប់ជាមួយរន្ធដោតកាស 3.5 mm headphone jack ។ ជាចុងក្រោយប្រភពនេះនិយាយទៀតថា ស្មាតហ្វូនលេខកូដ Taimen នឹងតម្លើងនូវកម្មវិធី Software ស្កែនក្រយ៉ៅដៃឈ្មោះថា "Nexus Imprint" ខណៈពេលដែលស្មាតហ្វូនលេខកូដ Walleye នឹងតម្លើងនូវកម្មវិធី Software ស្កែនក្រយ៉ៅដៃឈ្មោះថា "Pixel Imprint" ។ គួរបញ្ជាក់ផងដែរថា ស្មាតហ្វូនស៊េរីថ្មីត្រកូល Pixels នេះអាចនឹងបង្ហាញខ្លួននៅក្នុងខែកញ្ញាខាងមុខនេះហើយ!